Virun allem déi Gréng an der Regierung hätten hien uerg enttäuscht a missten ëmdenken, esou de President vun der Landwirtschaftskammer, de Guy Feyder.

Joerzéngtelaang huet d’Bauerenzentral am Agrarsecteur den Toun uginn an d’national Politik matbestëmmt; iwwer d’Lëtzebuerger Landwirtschaft gëschter, haut a muer, iwwer dat traditionellt an dat neit Bewirtschaften, dat Buedemstännegt, grad wéi den exzessive Buedemverbrauch hu mir dëse Samschdeg am Background geschwat.

Ronderëm den Dësch hunn 3 Vertrieder vu Cepal, Landwirtschaftskammer a Jongbaueren diskutéiert.

Invitéen am Background waren:

de Marc Fisch, President vun der Bauerenzentral,
de Guy Feyder, President vun der Landwirtschaftskammer,
an de Luc Emering vun der Landjugend a Jongbaueren (LLJ).

AUDIO: Background am Gespréich: Thema Landwirtschaft

De President vun der Landwirtschaftskammer, de Guy Feyder, fuerdert en ëffentlechen Debat a Saachen exzessive Landverbrauch. Et kéint een net weider esou récksiichtslos mat eisem Buedem ëmgoen, wéi dat a leschter Zäit géif geschéien.

D'Lëtzebuerger Landwirtschaft an de Buedemverbrauch
Virun allem déi Gréng an der Regierung hätten hien uerg enttäuscht a missten ëmdenken, esou de President vun der Landwirtschaftskammer, de Guy Feyder.

Virun allem déi Gréng an der Regierung hätten hien uerg enttäuscht a missten ëmdenken. D'Landwirtschaftskammer géif dat do op alle Fall weider thematiséieren, bis et zu engem Mentalitéitswiessel géif kommen, esou de Guy Feyder e Samschdeg an eiser Emissioun Background.

Den Asaz vu Glyphosat ass ee wichteg Thema am Akerbau. D'Decisioun fir dëst Mettel ze ersetzen ass geholl ginn, den Delai vun 2020, ass fir de Guy Feyder awer ze vill optimistesch. Et mussen als éischt Alternative fonnt ginn.

De Sujet Google Datacenter zu Biissen gesäit de President Guy Feyder kritesch. Hien beklot eng gewëss Schizophrenie an der Politik an dësem Dossier, wéi och an aneren. Obwuel d'Ëmweltstudien zum Deel negativ sinn, gëtt den Datenzenter net a Fro gestallt. Dëst obwuel déi Gréng an der Regierung sinn.

Duerch de massive Landverbrauch an d'Spekulatioun gëtt et e staarken Drock um Land, wat fir d'Baueren e grousse Problem ass. Si géifen zweemol bestrooft ginn, duerch de Buedemverbauch an duerch d'Kompensatiounsmoossnamen. D'Landwirtschaft brauch Terraine fir schaffen ze kennen an et muss een un déi nächst Generatiounen denken. De Guy Feyder: "Mir hunn net d'Recht all eis Biedem ze bebauen an ze verbrauchen. Mir mussen un déi nächst Generatiounen denken, dozou gehéiert och net all Terrain ze verkafen, wann et eng interessant Offer gëtt. Marc Feyder, President vun der Landwirtschaftskammer."

AUDIO: De Guy Feyder iwwert de Buedemverbrauch

Am Dossier Schwéngspescht begréissen d'Invitéen, dass Mesure geholl si ginn. Déi massiv Iwwerpopulatioun vu Wëllschwäin am Land muss staark reduzéiert ginn.

Déi dräi Invitéë sinn sech eens, dass d'Landwirtschaft staark am Wandel ass an dass d'politesch Gewiicht vum secteur agricole net méi deen ass wéi an de 1960er Joren. Op den Agrozenter zu Miersch hätt missen erhale ginn, doriwwer sinn sech d'Baueren net eens.

Onzefridde sinn déi dräi Vertrieder, dass d'Landwirtschaft vu populistesche Medie virgehäit kritt den Haaptschëllegen ze si fir déi aktuell Ëmweltproblemer. D'Baueren, wéi de Marc Fisch betount, géife vill maachen, mä dat géif oft net an Uecht geholl ginn. "D'Landwirtschaft mécht extrem vill fir den Ëmweltschutz, mee d'Politik géif dat net ëmmer honoréieren. Aner Secteure schéngen och méi en héije Stellewäert ze hunn. De Marc Fisch, President vun der Bauerenzentral."

AUDIO: Kritik un d'Medien an un d'Politik

An der Landwirtschaft ginn et also nach genuch Gespréichsthemen.

"Background am Gespréich" leeft ëmmer samschdes an der Mëttesstonn (vun 12 bis 13 Auer) op RTL Radio Lëtzebuerg an am Livestream um Internet respektiv an der App (Audio a Video). Dono ass d'Emissioun op RTL.LU zu all Ament nach eemol ze lauschteren oder ze kucken - an der Rubrik "Radio" bei Emissiounen "Background" wielen.