Hie wollt sech 6 Méint "Schweigepflicht" ginn, dorausser sinn der 8 ginn - dëse Samschdeg ass de CSV-Spëtzekandidat bei de Walen zejoert eisen Invité.

Den CSV-Deputéierten Claude Wiseler stellt sech hannert säi Parteipresident Frank Engel. An onser Emissioun Background am Gespréich sot de Claude Wiseler, et kéint een net eleng dem Parteipresident d’Schold un der Néierlag bei den Europawale ginn. De Fränk Engel wier och eréischt 4 Méint am Amt. Hie wier legitim gewielte Chef vun der CSV an dat wier och ze respektéieren, wann d’CSV sech nei opstellt.

Déi hätt nämlech strukturell Problemer, sou de Claude Wiseler weider. D’Programmatik vun de Chrëschtlech-Sozialen misst iwwerkuckt ginn a wesentleche Punkten, wou se net present wier. Bei den Theme "Klima a Refugiéen" wier ee bei de leschte Walen net genuch präzis gewiescht. Bei der Debatt ëm de Wuesstem virun de Chamberwale wier een net kohärent gewiescht huet, de Claude Wiseler agesinn.

De "Plang fir Lëtzebuerg" war ze komplex. An et hätt een net genuch ëm all Stëmm gekämpft. Hie selwer war nom Walresultat am Oktober zejoert schwéier enttäuscht, datt et net geklappt huet, fir zréck an d'Regierung ze kommen.

E wier awer elo weider frustréiert, well d’aktuell Blo-Rout-Gréng Regierung a sengen Ae net déi richteg Politik fir d’Zukunft vum Land géing maachen.

Perséinlech wëll hie sech elo op seng Aarbecht als Deputéierte konzentréieren. Hie géif sech elo méi fräi spieren, och fir seng Meenung ze soen. Déi nächste Kéier wéilt hien och nach emol mat an d'Wale goen, wa seng Partei dat wéilt. Awer net méi als Spëtzekandidat.

AUDIO: Background am Gespréich: Claude Wiseler

"Background am Gespréich" leeft ëmmer samschdes an der Mëttesstonn (vun 12 bis 13 Auer) op RTL Radio Lëtzebuerg an am Livestream um Internet respektiv an der App (Audio a Video). Dono ass d'Emissioun op RTL.LU zu all Ament nach eemol ze lauschteren oder ze kucken - an der Rubrik "Radio" bei Emissiounen "Background" wielen.