Déi nei Presidentin vun der Chambre des Salariés an déi wuel zukünfteg Presidentin vum OGBL war dëse Samschdeg eis Invitée am Background.

AUDIO: Background am Gespréich mam Nora Back

D'Gewerkschafte géifen haut méi gebraucht wéi jee. Ouni Gewerkschafte géif déi alldeeglech Aarbecht nämlech u Wäert verléieren. Dat sot déi nei Presidentin vun der Chambre des Salariés an aktuell Generalsekretärin vum OGBL, Nora Back, e Samschdeg de Mëtteg an der Emissioun Background.

D'Bewosstsinn fir d'Aarbecht an d'Leeschtunge vun de Gewerkschafte misst och an de Schoulen erëm gestäerkt ginn, esou d'Nora Back.

AUDIO: D'Generalsekretärin vum OGBL, Nora Back

Den OGBL ass ëmmer bereet fir den Dialog, souwuel mat der Regierung wéi mam Patronat, dat betount déi aktuell Generalsekretärin. Si géingen awer dacks blockéiert ginn, sou wéi zum Beispill am Stolsecteur, wou d'Gewerkschafte eng Tripartite gefuerdert hunn, ma souwuel vum Patronat, wéi och der Regierung blockéiert ginn. Op Krise oder net Krise, et stéingen Honnerten Aarbechtsplazen um Spill, also wär een an enger Situatioun wou misst mat de Gewerkschafte geschwat ginn sou d'Nora Back.

Wat hält den OGBL dann vun ëmstriddenen Regierungsprojeten wei Google zu Biissen oder d'Jughurtsfabréck "Fage"?

AUDIO: Google zu Bissen oder d'Jughurtsfabrik "Fage"

Natierlech wären den OGBL an den LCGB Konkurrenten, ma dat wär bedauerlech. Léisst sech dorun näischt änneren?

AUDIO: OGBL / LCGB

Op Nofro wat den OGBL da géing vun ëmstriddene Projete vun der Regierung halen, souwuel Google zu Biissen, wéi d'Jughurtsfabrik Fage, sot d'Gewerkschaftlerin, dass do wou Investitiounspolitik gemaach gëtt, och soll mam OGBL geschwat ginn. Och dat géing zu enger méi grousser Gerechtegkeet an eiser Gesellschaft féieren. Dat Nämmlecht géing gëllen fir d’Investitiounspolitik an d’Schoulen, d’Spidolswiesen an an ëffentlech Strukturen. Dat géing der Gewerkschaft um Häerz leien, sou d’Nora Back.

Mat der Aarbecht vun der Regierung ass si nëmmen zum Deel zefridden. D'Aarbechtszäitverkierzungen, déi vun der Regierung agefouert goufen, ginn natierlech vun der Gewerkschaft begréisst, ma géifen nach net wäit genuch goen.

Och beim Thema Tripartite am Stolsecteur, gesäit d'Nora Back net an, dass souwuel de Patron wéi d'Regierung refuséiere mat de Gewerkschaften ze schwätzen. Ëmmerhi stéingen hei Honnerten Aarbechtsplazen um Spill.

Fir sech beschtméiglech fir d'Salariéë kënnen anzesetzen, géif et fir d'Nora Back absolut Sënn maachen, eng eenzeg Gewerkschaft fir d'Land ze schafen. Ëmmerhi géif dat d'Positioun vun de Salariéë vis-à-vis vum Patronat wesentlech stäerken.

Zum Thema Presidentschaft vum OGBL, huet d'Nora Back op en Neits betount, dass si den Ament nëmme Kandidatin fir de Posten ass. Et sollt een der Wal am Dezember net virgräifen. Ma sollt si gewielt ginn, géif si fir Kontinuitéit suergen a sécher stellen, dass d'Linn vun der Gewerkschaft och duerchgezu gëtt.

Bei der Chambre des Salariés géif d'Nora Back sech wëllen dofir asetzen, dass d'Schéier tëscht Aarm a Räich erëm méi kleng gëtt. Dofir missten d'Léin an d'Luucht goen. Grad de Mindestloun géif einfach net méi duergoe fir zu Lëtzebuerg anstänneg kënnen ze liewen.

"Background am Gespréich" leeft ëmmer samschdes an der Mëttesstonn (vun 12 bis 13 Auer) op RTL Radio Lëtzebuerg an am Livestream um Internet respektiv an der App (Audio a Video). Dono ass d'Emissioun op RTL.LU zu all Ament nach eemol ze lauschteren oder ze kucken - an der Rubrik "Radio" bei Emissiounen "Background" wielen.