Um Virowend vum Nationalfeierdag stoung d’Emissioun Background dëse Samschdeg ganz am Zeeche vun der nationaler Identitéit.

Mir hu mat 4 Invitéen diskutéiert: dem Soziolog Fernand Fehlen, dem Historiker Michel Pauly, der Lëtzebuergesch-Enseignante Shari Schenten an dem Athanase Popov vun der Asti.

AUDIO: Background Nationalfeierdag / Reportage Danielle Goergen

D'Lëtzebuerger Gesellschaft zeechent sech duerch vill Aspekter aus, sot ënnert anerem de Soziolog Fernand Fehlen, an zwar virun allem duerch déi Leit, déi hei gebuer, awer och immigréiert sinn. Vum richtege Stack-Lëtzebuerger wier schwiereg ze schwätzen, sou de Soziolog. De Fernand Fehlen huet an dem Kontext op d'Vollekszielung aus dem Joer 2011 higewisen, aus där ervirgoung, dass iwwert een Drëttel vun de Leit mat der Lëtzebuerger Nationalitéit entweder agewandert sinn oder een Elterendeel haten, deen agewandert ass. Wann een dat op d'Grousseltere géif opmaachen, wier kloer, dass d'Majoritéit vun de Lëtzebuerger immigréiert sinn, sou de Fernand Fehlen.

Déi eenzel Invitéë ware sech eens, dass et d'Diversitéit ass, déi ee Land ausmécht. Den Historiker Michel Pauly huet sengersäits drop higewisen, dass den Nationalfeierdag haut net méi déi selwecht Bedeitung huet, wéi nach viru 50 Joer. Dat wier normal a positiv. Et misst ee mat der Zäit matgoen. Et wier och wichteg, an d'Zukunft ze kucken. Virun allem déi Nationalistesch Kreesser géife just an d'Vergaangenheet kucken an dat behalen, wat war. Vun där Astellung misst ee lasskommen, sou den Historiker.

Wat dann d'Entwécklung vun der Sprooch betrëfft, war et den Appell vun der Lëtzebuergesch-Enseignante Shari Schenten, dass nach ëmmer net genuch Lëtzebuergesch an de Schoulen enseignéiert gëtt. Besonnesch de Volet vun der Kultur géif benodeelegt ginn, dat selwecht géif fir d'Geschicht gëllen. Lëtzebuergesch misst onbedéngt als Fach agefouert ginn an net nëmmen iwwert de Wee vun Optiounen ugebuede ginn, sou nach d'Shari Schenten. Et misst och vill méi Wäert drop geluecht ginn, Lëtzebuergesch als Integratiounssprooch ze enseignéieren.

Där Meenung war och de véierten Invité an der Emissioun Background, den Athanase Popov vun der Asti, dee virun 9 Joer op Lëtzebuerg koum an zanter leschtem Joer och d'Lëtzebuerger Nationalitéit huet. Senger Meenung no misst Lëtzebuergesch och als offiziell Sprooch an der Europäescher Unioun ugesi ginn. Op där enger Säit d'Lëtzebuergesch fleegen, um kulturellen a literaresche Plang, awer net als eenzeg Nationalsprooch ugesinn, sou nach den Athanase Popov.

AUDIO: Background am Gespréich Spezial Nationalfeierdag

"Background am Gespréich" leeft ëmmer samschdes an der Mëttesstonn (vun 12 bis 13 Auer) op RTL Radio Lëtzebuerg an am Livestream um Internet respektiv an der App (Audio a Video). Dono ass d'Emissioun op RTL.LU zu all Ament nach eemol ze lauschteren oder ze kucken - an der Rubrik "Radio" bei Emissiounen "Background" wielen.