De Staatsminister Xavier Bettel war Invité an eiser Emissioun "Background am Gespréich".

Et ass eng mouvementéiert politesch Rentrée. Et ass déi éischt fir déi nei Legislatur, a se geet mat engem Wiessel am Justizministère un. Dat nom Häerzinfarkt vum Minister a Vize-Premier Felix Braz, hie gëtt vun der Logementsministesch Sam Tanson ersat. De Premier Xavier Bettel war e Samschdeg de Mëtteg Invité am Background. Et wier eng ganz traureg Nouvelle virun der Rentrée gewiescht.

AUDIO: De Premierminister iwwert de Felix Braz

Fir d'Famill, d'Frënn an och fir d'Politik. Ze ersetze wier de Felix Braz net, wann hien net méi erëm kéim. D'Vertrauen un déi aner gréng Ministere wier awer do fir weider gutt, un allen Dossieren zesummenzeschaffen. Et misst een elo op ee méi geneeën Diagnostik vun den Doktere waarden, fir ze kucken, wéi et weider geet.

De Résumé vum Background
De Staatsminister Xavier Bettel war Invité an eiser Emissioun "Background am Gespréich".

Personalverwaltung vum Haff

Een anere Sujete war d'Personalverwaltung vum Haff. De Premier gesäit sech als Monarchist a wëll d'Rumeure mam Jeannot Waringo als Expert opklären.

D'Regierung stellt den Haff net ënner Tutelle, mä mat der Missioun vum Jeannot Waringo soll an Zukunft verhënnert ginn, datt sech falsch Rumeuren iwwert ënnert anerem d'Personalpolitik bei der Cour Grand-Ducale verbreeden, sou de Staatsminister Bettel. Et géing dem Premier no, och ëm Transparenz beim Ëmgang vu Steiergelder.

AUDIO: Lauschtert hei den detailléierte Reportage vum Roy Grotz

De Grand-Duc géif dës Missioun och esou gesinn an dës Demarchen och begréissen.Wéi et heescht géif de fréieren IGF-Direkter e "gudden Accueil" beim Staff vum groussherzoglechen Haff gemaach kréien. Bis Ugangs d'nächst Joer soll de Rapport dann och virleien - a wann d'Demande besteet - och an der Chamber diskutéiert ginn. D'Recommandatioune géife mam Accord vum Grand-Duc ëmgesat ginn.

Wéi de Xavier Bettel sot, sollt op Basis vum Rapport Waringo dann och e modus vivendi fonnt ginn, fir datt den Haff keng Reprochen gemaach ka kréien.

Klima

Fir dës Rentrée bléifen d'Haaptpunkte Mobilitéit a Logement. Och d'Klima géif eng wichteg Roll spillen. Et misst ee sech fir d'Klimapolitik d'Moyene ginn, och wat d'Educatioun ugeet. D'Leit misste sech als een Deel vun der Klimapolitik spieren, fir eppes beweegen ze kënnen.

AUDIO: De Bierger ass Deel vun der Klimapolitik

Policefichieren

A Propos Justiz bleift d'Fro vun de Policefichieren nach ëmmer op. Ee vun deenen Dossiere sinn d'Datebanke bei der Police an der Justiz.

An de leschte Méint ass duerch Temoignagen, Oppositiounsaarbecht an d'Press bekannt ginn, datt bei der Police a bei der Justiz eng ganz Partie Donnéeë gesammelt ginn, sech awer Froe stellen, wéi laang dës gehale ginn a wien ënner wéi enge Konditiounen drop zréckgräife kann.

Et misst een d'Balance tëschent Sécherheet an Dateschutz fannen, sot dozou de Staatsminister.

AUDIO: De Xavier Bettel iwwert d'Policefichieren

D'Leit missten awer och wëssen, wat mat hiren Donnéeë geschitt. Hie géif an den nächste Woche mat Propositioune kommen, fir kenne konstruktiv, och mat der Oppositioun an der Chamber, u Léisungen ze schaffen.

Brexit

Riets goung donieft nach iwwert d'Bankeplaz Lëtzebuerg an de Brexit. Wat de Brexit ugeet, misst hien dem neie britesche Premier Boris Johnson soen, datt et keen Alternativplang an och keen neien Delai géif ginn.

AUDIO: "Et war hire Choix!"

D'Brite kéinten net alles hunn an de Xavier Bettel wéilt léiwer een No-Deal wéi ee schlechten Deal.

AUDIO: Background am Gespréich mam Xavier Bettel