D'CSV-Fraktiounspresidentin war Invitée an eiser Emissioun "Background am Gespréich".

AUDIO: Background am Gespréich: Martine Hansen

D'CSV-Fraktiounspresidentin Martine Hansen war e Samschdeg de Mëtteg eis Invitée am Background am Gespréich a si huet sech iwwer d'Respektlosegkeet vun de Regierungsparteie vis-a-vis vun der Chamber beklot. Déi negativ Naupen, d'Arroganz vun der Muecht, wären am leschte Joer nach méi däitlech ginn. Dat wär net z'acceptéieren.

AUDIO: Martine Hansen iwwert Respektlosegkeet vu Regierungsparteien

Iwwert de sougenannte geheime Casier sot d'Martine Hansen, datt den Asaz vun hirer Partei sech rentéiert hätt. Et wéilt ee weider eng Spezialkommissioun, fir alles opzedecken an d'Situatioun vum Dateschutz ze verbesseren.

AUDIO: Martine Hansen iwwert de geheime Casier

D'Verfassung a Klimaschutz si mat déi wichtegst Sujeten elo fir d'Rentrée. Am Beräich Klimaschutz wéilt een d'Leit sensibiliséieren, mat an d'Klimaboot huelen, a sech net just op Verbueter fixéieren.

Wat eng nei Verfassung ugeet, waart d'CSV elo mol d'Gespréicher of. D'Oppositiounspartei hat jo virum Summer e consultative Referendum zu wichtege Froen an d'Spill bruecht. Ob d'CSV dat nëmme proposéiert oder carrément fuerdert, do wollt d'Martine Hansen sech nach net festleeën.

AUDIO: Martine Hansen iwwert déi nei Verfassung

Mat der Schoulpolitik vum Educatiounsminister Claude Meisch war d'CSV-Fraktiounspresidentin déi lescht Jore wéineg zefridden. Et géif ee sech elo net iwwert de „Bildungsdësch“ zéie loossen. De Claude Meisch hätt méi lass gekappt wéi e schëppe kéint, bei dëser Rentrée glécklecherweis net, mengt d'Martine Hansen. De Minister hätt ze vill Reformen duerchgeboxt an net op d'Leit gelauschtert.

Zur Demissioun vum Déifferdenger Buergermeeschter huet d'CSV-Fraktiounscheffin gemengt, dat wär déi richteg Decisioun gewiescht. Et stéinge grave Reprochen am Raum. Wat d'Mandat vum Roberto Traversini an der Chamber ugeet, misste seng Partei déi Gréng, an hie selwer eng Decisioun huelen.

Iwwer d'Pressekonferenz vum Premier Xavier Bettel, wéi de Boris Johnson ugangs der Woch zu Lëtzebuerg war, sot d'Martine Hansen, datt een iwwer d'Aart a Weis wéi déi Pressekonferenz ofgelaf ass, sécher diskutéiere kéint. Et hätt een se och no banne verleeë kënnen, sot si.

Den CSV-Parteipresident Frank Engel hat den Optrëtt vum Xavier Bettel gelueft, den Ex-Spëtzekandidat Claude Wiseler hat dee staark kritiséiert. D'Martine Hansen fënnt dat net dramatesch. Déi zwee CSV-Promien wären zwee verschidde Charakteren a sech awer iwwert de politesche Fong vun der Saach, de Brexit, Eens.

AUDIO: Martine Hansen iwwert déi nei Verfassung