De François Bausch gëtt neie Vizepremier, hätt awer gär drop verzicht. Ënner anerem doriwwer hu mir an der Emissioun "Background am Gespréich" geschwat.

Déi Gréng proposéieren den Henri Kox als Logementsminister. Dat huet de François Bausch an der Emissioun "Background am Gespréich" confirméiert. De Kongress stëmmt en Donneschdeg den Owend iwwert dës Propos of.

D'Vereedegung vum neien Minister kéint ewell iwwernächst Woch sinn, da wann och d'Rentrée vun der Chamber ass.

D'Chantal Gary géif deen Ament an d'Chamber noréckelen.

Wat de Roberto Traversini betrëfft, sot de François Bausch, datt net just de fréieren Déifferdenger Buergermeeschter selwer, mä och déi Gréng an d'Politik am Allgemengen ënnert där Affär leit.

De Roberto Traversini géif seng Feeler agesinn, mä si hätten awer net dierfe geschéien. Allerdéngs misst een engem Mënsch no engem Feeler och erëm eng Chance ginn. Et soll een hien elo emol roueg loossen, hien wier am Gaange säi Liewen nei z'organiséieren.

De François Bausch ass iwwerzeegt, datt et kee Favoritismus vu Säite vun der Ëmweltministesch Carole Dieschbourg gouf. Si hätt ganz sécher "en âme et conscience" gehandelt. D'Demande vum Roberto Traversini wier am Ministère esou traitéiert ginn, wéi all aner Demande och, esou eisen Invité am Background.

Den designéierten Vize-Premier stellt sech hannert d'Carole Dieschbourg. Dat gëllt och fir eng aner Decisioun: nämlech déi iwwert eng Autorisatioun, déi d'Elteren vun der Ministesch fir d'Konstruktioun vun engem  Stall mat enger Betongs-Dall accordéiert kruten, dat am Kader vun engem Renaturéierungs-Projet no den uergen Iwwerschwemmungen zejoert.

Background am Gespréich: François Bausch

"Background am Gespréich" leeft ëmmer samschdes an der Mëttesstonn (vun 12 bis 13 Auer) op RTL Radio Lëtzebuerg an am Livestream um Internet respektiv an der App (Audio a Video). Dono ass d'Emissioun op RTL.LU zu all Ament nach eemol ze lauschteren oder ze kucken - an der Rubrik "Radio" bei Emissiounen "Background" wielen.