Den Deputéierte vun Déi Lénk war Invité an der Emissioun "Background am Gespréich".

De Roberto Traversini hätt sech selwer beräichert a säin Amt mëssbraucht, dofir war d'Demissioun vum Déifferdenger gréngen Député-Maire fir déi Lénk onëmgänglech. Dat Ganzt géing awer allgemeng Froen opwerfen, wat de Fonctionnement vun de Gemengen ugeet. D'Gemengegesetz misst reforméiert ginn.

De Marc Baum stellt och fest, datt d'CSV elo op eng komesch Manéier géing versichen d’Regierung ze destabiliséieren. Et wier allerdéngs och kee Geheimnis, datt Deeler vun der DP dat Spillche géinge matspillen. Verschidde Membere vun der DP hätte sech jo souwisou eng konservativ-liberal Regierung gewënscht.

Marc Baumm iwwert d'CSV-Propos un d'DP

Hien hätt op alle Fall keen Indice op Favoritismus constatéiert, wéinst deem déi gréng Ëmweltministesch Carole Dieschbourg misst demissionéieren. Et geet jo do ëm eng nodréiglech Autorisatioun, déi de Roberto Traversini vum Ministère kritt hat.  Virleefeg ass et d’Konklusioun vum Deputéierten, datt, wann net méi do wier, et kee Grond vun der CSV géing ginn, de Récktrëtt vun der Ministesch ze froen.

Soziale Fridden a Fro gestallt

Et mécht mech rosen, wann d'Patrone fuebelen a behaapten, et géing hinne schlecht goen an et géif just eppes fir d'Salariat gemaach ginn. Dat seet de Marc Baum, Deputéierte vun Déi Lénk. Hie war dëse Samschdeg Invité am Background. D'Belaaschtung fir d'Betriber wier néierens sou niddereg, wéi zu Lëtzebuerg.

Marc Baum iwwer d'Patronat

Ob d'Tripartite dat bescht Instrument wier, wier schwéier soen, mä se hätt awer bis elo funktionéiert. Wann d'Patronat net méi mam Salariat wéilt schwätzen, wier de soziale Fridden op alle Fall a Fro gestallt.

Politik ass gefrot: Klima, Logement  a Casier Bis

An der Klimapolitik bräichte mer e radikale Changement vum System, virop e Paradigmewiessel. Et soll opgehale ginn, de private Marché ze incitéieren, de Staat misst selwer Responsabilitéit iwwerhuelen, zum Beispill am Beräich erneierbar Energien. Mir bräichten och keng nei Entreprisen à la Google, déi vill Energie verbrauchen, zu Lëtzebuerg. Op alle Fall missten nei Reegele fir de Produzent an net fir de Konsument kommen. Et wier grouss kollektiv Decisiounen, déi zum Klimawandel gefouert hätten.

Marc Baum iwwer de Klimawandel

Eng absolut Prioritéit sëtzen "Déi Lénk" iwwerdeems op de Logement. D'Biller, déi mer virun de Gebailechkeete vun der SNHBM gesinn hätten, géinge genuch soen, sou de Marc Baum. Déi Lénk plädéieren ënner anerem fir eng Präisbrems bei de Loyeren. Dernieft misst et ophéieren, datt d'Locatairen d'Fraise fir d'Agencë misste bezuelen.

Am Dossier Casier Bis bräicht een Opklärung an dofir bräicht et enger Spezialkommissioun. Dono misst eng seriö gesetzlech Basis geschaf ginn.

Lénk analyséiere lescht Walresultater

Wat déi eege Walresultater ugeet, wier ee bei "Déi Lénk" am Gaangen d'Analysen ze maachen, firwat et net sou optimal gelaf ass. Ënner anerem soll an Zukunft souwuel no baussen, ewéi och intern besser kommunizéiert ginn. Déi sozial Theme wieren iwwregens present ewéi ni, obwuel se vläicht an der Ëffentlechkeet den Ament manner diskutéiert ginn.

Wat déi eege politesch Zukunft ugeet, bleift et dobäi, datt de Marc Baum an annerhallwem Joer wäert Plaz maachen an der Chamber an och am Escher Conseil. De Rotatiounsprinzip bei „Déi Lénk“ gesäit dat jo sou vir. Eng Paus tëschenduerch wier ganz gesond, vläicht géif hie bannent där Zäit sech nees méi der Schauspillerei widmen, esou nach de Marc Baum.

Background am Gespréich mam Marc Baum

"Background am Gespréich" leeft ëmmer samschdes an der Mëttesstonn (vun 12 bis 13 Auer) op RTL Radio Lëtzebuerg an am Livestream um Internet respektiv an der App (Audio a Video). Dono ass d'Emissioun op RTL.LU zu all Ament nach eemol ze lauschteren oder ze kucken - an der Rubrik "Radio" bei Emissiounen "Background" wielen.