D'Deputéierte vun der LSAP respektiv der ADR waren eis Invitéen an der Emissioun "Background am Gespréich".

"Ech hu meng Decisioun nach net geholl, ob ech an de Staatsrot wiesselen", sot elo um Samschdeg an der Mëttegstonn den LSAP-Fraktiounschef Alex Bodry an der Emissioun Background.

Hien hätt sech nach net definitiv decidéiert, ob e ganz geschwënn an der Chamber ophält. De Staatsrot géif ëm Spaass maachen, mä en hätt och gesot kritt, e géif der Chamber feelen, wann e geet.

Supposéiert Offer vun CSV "peinlech" an "aarmséileg"
D'Deputéierte vun der LSAP respektiv der ADR waren eis Invitéen an der Emissioun "Background am Gespréich".

De Gast Gibéryen ass och gefrot ginn, wéini hien als Deputéierten ophält. Dat hat hie jo schonn annoncéiert, mä den Datum wëll den ADR-Deputéierten nach net nennen; och wann den Datum schonn a sengem Kapp géif feststoen.

Een, deen och virum Enn vun der Legislaturperiod wëll goen, ass jo de Wirtschaftsminister Etienne Schneider; dee wëll senger Iddi trei bleiwen, fir net méi laang wéi 10 Joer Minister ze sinn.

Op d'Fro, ob den Etienne Schneider net awer elo e „lame duck“ wär, also politesch net méi handlungsfäeg, sot den Alex Bodry, datt hien net géif erkennen, datt den Etienne Schneider net méi a sengen Dossiere wär. D'Regierungsaarbecht géif net ënnert de perséinleche Pläng leiden.

"Soulaang een net demissionéiert hätt, wär ee voll a sengem Amt", sou den Alex Bodry.

Een Thema war och déi méiglech Koalitiounsoffer vun der CSV un d'DP an un d'LSAP.

"Ech weess net wéi seriö déi Saachen ze huele sinn", huet den Alex Bodry gemengt. Hie géif et awer relativ peinlech fannen an et géif weisen, datt d'CSV zerstridden a sech net eens wär.

De Gast Gibéryen huet och gemengt, datt wann et déi Offer gouf, wär dat "aarmséileg". D'CSV géif et net fäerdeg bréngen, aus engem Mond ze schwätzen. Wann een eng nei Koalitioun wéilt, soll ee virun de Wieler goen, fënnt den ADR-Parlamentarier.

D'Suitten vun der Affäre Gaaredenhaischen an der Naturschutzzone Prenzebierg zu Nidderkuer hunn och nach emol e gréisseren Deel vun der Emissioun Background dominéiert, wou d'Invitéen haut den LSAP-Fraktiounspresident Alex Bodry an de Gast Gibéryen vum ADR waren.

Béid Députéiert hunn et gutt notéiert, datt de Staatsminister e Rendez-Vous fir d'Suitte ginn huet, nämlech dann wann d'Riichter iwwert de penalen Volet ëm de Personnage Roberto Traversini tranchéiert hunn, respektiv wann d'Uerdeel vum Verwaltungsgeriicht iwwert d'Ofleef  bei de respektiven Authorisatiounen firläit.

Den Alex Bodry huet no den Erklärungen vun de leschten Deeg eng perséinlech Meenung... Et wier kloer, dass wat den Dossier weider verschafft gëtt, et ëmmer méi Indizien iwwert d'Schold vum Déifferdenger Buergermeeschter gëtt. Deen Dossier géif mat der Zäit net besser ginn, éischter nach méi breet... an dat kann ee nëmmen bedaueren. Dem Alex Bodry seng éierlech Meenung awer wier, dass et nach kee Beweis géif ginn, dass d'Ministesch Carole Dieschbourg perséinlech hei agewierkt hätt a vun hir aus am Dossier Gaardenhaischen Favoritismus bedriwwen hätt.

Alex Bodry iwwert d'Affär Gaardenhaischen

De Gast Gibéryen ass der Meenung, datt d'Ministesch Carole Dieschbourg "ugeschloen" ass a sollt iwwert Konsequenzen nodenken. Alleguerten déi Leit, déi Saachen net vum Ëmweltministère autoriséiert kritt hunn oder an Zukunft wëllen eppes autoriséiert kréien, géifen sech elo mat der Affär Traversini vergläichen. Et wier e ganz schwierege politesche Stand, aus deem Si net méi géif erauskommen. Et leeft ee Gefor, dëse Sujet nach Wochen a Méint am Gespréich ze halen an domadder d'Aarbecht vun der Ministesch ze beaflossen. Et misst ee sech froen, op een hei net misst d'Konsequenzen zéien.

Sollt d'Ministesch hir Konsequenzen zéien? De Gast Gibéryen

Den Alex Bodry sengersäits verweist op néideg Konsequenzen am Ministère vun der Carole Dieschbourg. D'Ministesch misst dofir ganz kloer suergen, dass méi Uerdnung an d'Verwaltungsofleef an hirem Ministère erakënnt. Hei wier och scho vill geschitt. Den Alex Bodry kéint sech erënneren, wéi hien 1989 an den Ëmweltministère gaange wier, hien vu Beamten gezielt kritt hätt, dass en CSV-Staatssekretär dee fir de Naturschutz zoustänneg gewiescht wier an nom Weekend emol mam Béierdeckel komm wier, mat Nimm vu Leit, deenen hir Dossieren sollten an d'Rei bruecht ginn. Hei wieren an der Vergaangenheet nach aner Zoustänn gewiescht. Hei huet mat de Joren missten Struktur an dee Ministère bruecht ginn.

Méi Uerdnung nach an den Ëmweltministère - Alex Bodry

Demarchen vun der CSV-Oppositioun géintiwwer vun Mandatairen vun der DP an der LSAP, fir d'politesch Temperatur en vue vun enger alternativer Koalitioun ze huelen, dat war natierlech och ee vun de Sujeten an der Emissioun Background um Samschdeg.

Et war jo u sech den CSV-Parteipresident Frank Engel selwer, deen bei eis op der Antenne sot, datt hien esou e Kontakt mat der DP-Presidentin Corinne Cahen hat. A senger Aschätzung sot den LSAP-Fraktiounschef Alex Bodry, datt dës Demarche eng "penibel" gewiescht wier vun enger Partei, déi intern zerstridde wier. Et misst ee feststellen, dass CSV keng gëeente Partei ass, et wier eng Partei déi "onschlësseg" a "net méi berechnend" ass a net méi wéisst wéi eng Meenungen se muer an eenzelen Dossieren huet. An der Vergaangenheet wir et sou eppes bei der CSV net ginn, hei géif et drëms goen nees Posten an der Regierung wëllen ze besetzen.

Den Alex Bodry iwwert d'CSV

De Gast Gibéryen sengersäits huet och eng Meenung iwwert d'Demarchen vun der CSV. Hie wier an dëser Fro ganz eens mam Alex Bodry. Wann et sou eng Situatioun géif ginn, da soll ee virun de Wieler goen a net e "fliegender Wechsel" maachen. "Aarmséileg" géif de Gast Gibéryen dës Demarche vun der CSV fannen, sollt dëst wierklech virgefall sinn. Et wier alles méi einfach, wann den Minister Etienne Schneider géif de Numm verroden, vun der Persoun, déi hie kontaktéiert hätt. Den Här Engel huet jo zouginn, dass hie mat der DP geschwat hätt.

De Gast Gibéryen iwwert d'CSV

Net ganz eeneg waren sech d'Deputéiert Bodry a Gibéryen, wann et ëm de Sujet ekonomesche Wuesstem a Steieren dovunner ugeet.

D'Fro vum ekonomesche Wuesstem

Den Alex Bodry gesäit iwwerdeem keng Gefor, datt d'Regierung kéint auserneen briechen - gréisst Erausfuerderung fir déi nächst Méint wier d'Steierreform, wou de finanzielle Spillraum do wier.

Hien denkt iwwerdeem driwwer no, fir an de Staatsrot ze wiesselen, wou jo zwou Plazen elo fräi ginn - dëst wier a sengen Aen en interessanten Posten, deen hien och interesséiere géif. Eng definitif Decisioun wier awer nach net gefall.

Sécher ass iwwerdeem, datt hien de Posten vum Fraktiounschef un de Georges Engel no de Budgetsdebatten ofgëtt - am Fall, wou den Alex Bodry no bal 3 Joerzéngten an der Chamber géif ophalen, géif d'Nächstgewielt Simone Asselborn-Bintz noréckelen.

Background am Gespréich mam Alex Bodry a Gast Gibéryen

"Background am Gespréich" leeft ëmmer samschdes an der Mëttesstonn (vun 12 bis 13 Auer) op RTL Radio Lëtzebuerg an am Livestream um Internet respektiv an der App (Audio a Video). Dono ass d'Emissioun op RTL.LU zu all Ament nach eemol ze lauschteren oder ze kucken - an der Rubrik "Radio" bei Emissiounen "Background" wielen.