De Laurent Paul, Gabriel Boisante, Patrick Goldschmidt a Maurice Bauer waren eis Invitéen an der Emissioun "Background am Gespréich".

Wien huet Loscht op Stad? "Ëmmer manner Leit", soen déi, déi op der Gare wunnen, an déi, déi do an an der Uewerstad hiert Geschäft hunn.

D'Konditioune vum Commerce an der Alstad sinn net gutt, dat sot de Laurent Paul, Member am Comité Downtown e Samschdeg an der Emissioun Background am Gespréich, an där et ëm d'Fro goung wien nach Loscht op d'Stad huet. Bedéngt duerch d'Chantieren an aner Facteuren ass d'Situatioun fir d'Geschäftsleit deelweis alarmant, seet de Laurent Paul, Epicier an Traiteur an der Philippsgaass. Sou hätte verschidde Commerçante ronderëm d'Ënneschtgaass an de leschten zwee Méint bis zu 20 % manner an hirem Chiffre d'affaires. Hien ass och der Meenung, dass d'Union commerciale net genuch géif ënnerhuelen, fir d'Lag ze verbesseren. Duerfir hu sech puer Geschäftsleit aus der Ënneschtgaass, der Louvigny- an der Philippsstrooss zesummegedoen.

Laurent Paul am Background

Dat léisst de Stater Schäffe Patrick Goldschmidt net sou stoen. D'Stad géif an der Louvigny- an an der Philippsstroos vill maachen. Hie behaapt, d'Stad Lëtzebuerg wäert an den nächste Joren nach besser ginn. Hien ënnersträicht, dass de Service de développement économique verstäerkt ginn ass. Dëse Service huet dëst Joer och ee Kadaster commercial ausgeschafft. Dëse Kadaster kéint hëllefen, déi komplementar Quartiere vun der Stad, wéi de Gabriel Boisante se sech wënscht, ze entwéckelen. Dem Patrick Goldschmidt no géif déi al Avenue an den nächste Joren ee Bijou ginn. Leit sollen dann de Parking Neipperg benotzen. D'Stad huet sech do fir 20.000 Gratisstonnen agesat.

Patrick Goldschmidt am Background

De Stater CSV-Schäffe Maurice Bauer dementéiert net, dass et sozial Problemer an der Stad ginn. De Garer Quartier ass gepräägt vun enger grousser Diversitéit. Fir d'Sécherheet an d'Liewensqualitéit op der Stater Gare ze verbesseren, misst d'Police och méi repressiv Moyenne kréien. De Schäffe betount, dass d'Stad Lëtzebuerg probéiert de sozial Schwaachen eng Offer unzebidden, fir hir Situatioun selwer kënnen ze verbesseren. Hien ass awer houfreg doriwwer, wat d'Gemeng alles mat hire Partner um soziale Plang proposéiert. Si géif do eng Virreiderroll spillen.

Maurice Bauer am Background

De LSAP-Politiker a Commerçant Gabriel Boisante fuerdert an der Emissioun Background am Gespréich een neit Denken an der Stad. Et bräicht een eng genau Kartographie vun de Geschäfter an der Stad. Dëst soll erméiglechen, dass d'Quartieren an der Stad Lëtzebuerg komplementar zu ënee ginn. Sou kéinte vill Problemer geléist ginn.
Hien ass och der Meenung, dass haaptsächlech Leit, déi duerch d'Stad fueren, keng Loscht méi op d'Stad hunn. Hie beklot, wéi de Laurent Paul, eng schlecht Koordinatioun vun de Chantieren a wënscht sech méi grouss Distanzen tëscht de Chantieren. Och hei ass de Patrick Goldschmidt net averstanen a seet, dass d'Koordinatioun vun de Chantiere ganz gutt ass. Déi nächst 12 Méint géife schwiereg Méint ginn op der Gare wéinst dem Tram. De Schäffe Goldschmidt huet awer annoncéiert, dass d'Gemengereglementer geännert musse ginn, d'Stad wëll nämlech keng Livraisounen an der Nuecht.

Zum Thema Wunnengen an der Stad beklot de Gabriel Boisante, dass vill Jonker sech d'Stad net méi leeschte kënnen. De Patrick Goldschmidt seet, dass d'Stad extrem vill investéiert hätt, 50 Milliounen Euro dëst Joer an de Maurice Bauer sot dozou nach, dass d'Stad scho 800 Wunnenge geréiert.

Gabriel Boisante am Background

An engem Lieserbréif huet den Daniel Miltgen festgehalen, dass de Kierchbierg ee Retortequartier bleiwe géif an d'Strukturfeeler wären net méi ze änneren. De Patrick Goldschmidt ass averstanen, dass de Kierchbierg schwéier erëm ze verännere wär.

Beim Thema elektresch Trottinetten an der Stad seet de Patrick Goldschmidt, dass déi Firma "Bird" sech net un d'Spillregele gehalen hätt, mä hie seet awer, dass d'E-Scooteren allgemeng aus dem Stadbild net verschwanne wäerten.

De Virschlag vun enger Gondel tëscht der Theaterplaz an dem Kierchbierg ass net vum Dësch.

Background am Gespréich - "Wien huet nach Loscht op d'Stad"

Aus technesche Grënn gouf de Background net als Video opgeholl. Mir entschëllegen eis.

"Background am Gespréich" leeft ëmmer samschdes an der Mëttesstonn (vun 12 bis 13 Auer) op RTL Radio Lëtzebuerg an am Livestream um Internet respektiv an der App (Audio a Video). Dono ass d'Emissioun op RTL.LU zu all Ament nach eemol ze lauschteren oder ze kucken - an der Rubrik "Radio" bei Emissiounen "Background" wielen.