Den LSAP-Aarbechtsminister Dan Kersch war e Samschdeg den Invité an der Emissioun Background am Gespréich.

"Da wësst Dir méi wéi ech" an "haalt op mat de Spekulatiounen". Den LSAP-Aarbechtsminister Dan Kersch wollt e Samschdeg am Background hei op RTL net confirméieren, datt säi Parteikolleg, de Wirtschaftsminister Etienne Schneider am Februar d’Regierung verléisst. Den Dan Kersch huet och all Diskussioune ronderëm d’Besetzung vun de Ministèrë vum Etienne Schneider als Spekulatioune bezeechent.

Op d’Fro, ob hien de Marc Angel als neie Wirtschaftsminister géing ënnerstëtzen, Zeenario, an deem seng Duechter Lisa Kersch géing Europadeputéiert ginn, wollt hien och net agoen. De Bericht am Land no deem de Franz Fayot säi Géigespiller wier, wollt den Dan Kersch net am Raum stoe loossen. "Ah wann et am Land steet, mengt Dir och et misst esou sinn?" huet hie gefrot a bäifüügt "De Franz Fayot ass net mäi Géigespiller". Béid hätten a ganz entscheedende Saachen déi selwecht Positioun.

Den LSAP-Aarbechtsminister huet weider annoncéiert, datt hien den Dossier ëm de Formatiounszenter RTPH un de Parquet weiderleede wäert. Den Dan Kersch sot nämlech, datt déi Responsabel vum RTPH eng nei Konventioun, sou wéi den Aarbechtsministère se proposéiert hat, ofgeännert zeréckgeschéckt hätt. Hei soll iwwerpréift ginn, ob et net eng "Energi" gouf, fir bewosst de Partner ze täuschen.

Wichteg Sujeten waren e Samschden ënnert anerem d’Klimapolitik an déi grouss Steierreform, déi och dozou soll déngen, de Leit dat ze kompenséieren, wat eng Klimapolitik hinnen och kascht. Eng seriö Klimapolitik géing et net zum Nulltarif ginn, mee setzt eng Ëmverdeelung viraus, sou den Dan Kersch.

Wat d’Aarbechtsrecht ugeet, huet den Aarbechtsminister notamment annoncéiert, wëllen eppes dogéint ze maachen, datt abusiv Leit als „Kadren“ agestallt ginn, fir laanscht d’Aarbechtsrecht ze kommen. Déi zwee Paragraphen iwwert d‘“Kadren“ am Code du Travail änneren, dat géing bis 2039 daueren, dowéinst war et d’Propos, d’Zuel u „Kadren“ pro Betrib op 15% vum gesamte Personal ze limitéieren.

Background am Gespréich: Dan Kersch

"Background am Gespréich" leeft ëmmer samschdes an der Mëttesstonn (vun 12 bis 13 Auer) op RTL Radio Lëtzebuerg an am Livestream um Internet respektiv an der App (Audio a Video). Dono ass d'Emissioun op RTL.LU zu all Ament nach eemol ze lauschteren oder ze kucken - an der Rubrik "Radio" bei Emissiounen "Background" wielen.