D'Kommunikatiouns-Moyenen tëscht de Mënschen hu geännert a wäerte weider evoluéieren.

D'Post wier allgemeng gutt opgestallt, vill Ziler wieren ëmgesat. Déi gréisst Erausfuerderung fir d'Zukunft wier d'Digitaliséierung. Dat seet de Generaldirekter vun der Post, Claude Strasser.

Beim Courrier ginn d'Zuele weider staark erof, dëst Joer war et deels e Minus vu bis zu 10% par Rapport zum Joer virdrun. Op där aner Säit gëtt et staark Hausse bei de Päck.

De klassesche Postbüro wier net méi zäitgeméiss, eleng wéinst den Ouvertureszäiten. Viru puer Joren hätt hien d'Kritiken un de Fermeturë besser kënne novollzéien, ma entretemps hätt ee wierklech vill Alternative geschafen, seet de Generaldirekter a verweist op Points postes oder Espaces postes, wou d'Qualitéit vum Zerwiss och héich wier.
D'Leit vu Bouneweg a Bartreng – do, wou jo rezent Postbüroen zougemaach hunn – hätte vill Offeren am noen Ëmkrees

Den Ament gëtt et nach 59 Postbüroen am Land, et wäerte weiderer zoumaachen. Wéi eng, dat wier nach net gewosst. Op där aner Säit funktionéieren eng 50 Points postes. Dës wäerte weider ausgebaut ginn.

Bei den Tariffer gëtt d'Iwwerleeung gemaach, ob et net besser wier, dës méi regelméisseg unzepassen, amplaz just all 5 Joer méi eng déck Hausse beieneen ze applizéieren.

D'Bréifdréier bekloe sech wéinst nidderege Léin. De Claude Strasser gëtt ze bedenken, datt d'Post besser Konditioune géing bidden ewéi d'Konkurrenz. Ma et wier ee sech dem Problem bewosst an et kéinten och eventuell bei den Ufanksgehälter Ouverturë ginn, sou de Claude Strasser. Hie verweist awer drop, datt d'Kollektivvertrags-verhandlungen nach lafen.

Bei der Telekommunikatioun läit d'Post am fixe Beräich a bei der Internet-Konnektivitéit bei bal 70% Part de marché, am mobile Beräich bei knapp 50% a bei der Télé bei ronn 30%, sou de Claude Strasser.

D'Gewunnechte géingen änneren. Bal jiddereen hätt e Smartphone. D'SMS géif zum Beispill ëmmer méi verschwannen a Plaz maache fir Online-Messagerien.

Et wier aus haiteger Siicht schwéier ze soen, ob den Investissement an JOIN e Feeler war oder net. Natierlech hätt sech awer séier erausgestallt, datt den urspréngleche Geschäftsmodell seng Limitten hat, well d'Ewechfale vun de Roaming-Tariffer sech konkretiséiert huet.

Zënter knapp 2 Joer gehéiert JOIN elo zu 100% dem Postgrupp a vu villen Investissementer, déi virdru gemaach goufen, hätt een als Post kënne profitéieren, zum Beispill a Punkto Informatik

Haut wier d'Part de marché zwar net grouss, ma den Telekommunikatiouns-Operateur Join géing awer funktionéieren.
Et kéint ee méi eng gënschteg Offer ubidden, wéi d'Post selwer, mat natierlech net dem selwechte Service hannendrun.

Laangfristeg misst ee kucken, ob et Sënn mécht, fir zwéin Operateure parallel lafen ze loossen.
Wat en eventuellt juristesch Nospill fir eventuell Aktivitéite vu fréieren JOIN-Manager ugeet, misst een ofwaarden, wat d'Instruktioun ergëtt.  Hie wier op alle Fäll deen éischten, deen un enger Opdeckung vun eventuellen Onregelméissegkeeten interesséiert wier, sou de Generaldirekter.

D'Kooperatioun tëscht dem Post-chèque a Raiffeisen géing ganz gutt lafen. De CCP hätt wéinst der Zënslag eleng net kënne weider funktionéieren. De Post-chèque géing erhale bleiwen, e misst awer weider reorientéiert an der Digitaliséierung ugepasst ginn.

Bei der Glasfaser-Couverture leie mer bei 2/3 vum Land. Vu datt ee sech un de Chantieren orientéiere misst, géif et vun Uertschaft zu Uertschaft Ënnerscheeder ginn. Vill Uschlëss géien awer nach net genotzt ginn.

D'Post wier prett fir de 5G-Reseau. Elo géing een op d'Versteeë vun de Frequenze waarden, sou de Claude Strasser, fir deen de Modell vun enger Stee iwwregens net dee glécklechsten ass.

D'Post kritt jo dann och en neie Siège vis-à-vis vun der Gare, deen nieft dem Standuert Cloche d'Or als Zentral wäert fungéieren.

Am Hotel des Postes um Hamilius soll en neie Projet entstoen. Eng Iddi, déi gepréift géing ginn, ass déi vun engem Hotel. Bis ewell wier dat awer just eng Pist, sou nach de Claude Strasser.

Background am Gespréich mam Claude Strasser

"Background am Gespréich" leeft ëmmer samschdes an der Mëttesstonn (vun 12 bis 13 Auer) op RTL Radio Lëtzebuerg an am Livestream um Internet respektiv an der App (Audio a Video). Dono ass d'Emissioun op RTL.LU zu all Ament nach eemol ze lauschteren oder ze kucken - an der Rubrik "Radio" bei Emissiounen "Background" wielen.