De Sven Clement vun de Piraten war eisen Invité an der Emissioun Background am Gespréich.

Vun null op honnert an e puer Sekonnen, esou hunn d'Piraten de Start an d'parlamentarescht Liewen erlieft.
Et hätt ee ganz vir missen ufänken an zum Beispill emol léiere missten, ewéi een iwwerhaapt eng parlamentaresch Fro stellt.  Dat sot den Deputéierte Sven Clement e Samschdeg de Mëtteg am Background.

Background am Gespréich mam Sven Clement

Wat eventuell parteiintern Ongereimtheeten ugeet, verweist de Sven Clement drop, datt en Ex-Parteimaarbechter mat Saachen un d'Press gaange wier, déi zum Deel net fundéiert wieren, ënner anerem Mobbing-Reprochë weist den Ex-Parteichef Clement wäit vu sech.

Dee Mataarbechter hätt hie wëllen erpressen an hätt verlaangt, datt de Marc Goergen an den Daniel Frères sollen aus der Partei gehäit ginn.

De Sven Clement stellt sech awer virun déi zwéi genannte Personnagen. Leit, déi konstruktiv an der Partei matschaffen, solle belount ginn. Datt et an der Partei Membere géif ginn, déi et skeptesch gesinn, datt d'Pirate sech thememéisseg erweidert hunn, dat géif hien awer verstoen.

Walcampagne, vun där kee wousst?

Datt de Parteimember Daniel Frères deels op eege Fauscht Campagne gemaach hätt, dovunner hätt hien zum Deel gewosst, esou de Sven Clement. Dëst wier duerch Done finanzéiert ginn. Ma et wieren awer och Annoncë ginn, déi net vun de Piraten ofgeseent waren.

Dann hätt een och elo raus fonnt, datt et souguer eng Campagne gouf fir déi weder den Daniel Frères nach d'Piratepartei responsabel waren an zwar am Déiere-Magazin „Wow“. Et géing een elo mat der Cour des Comptes kucken, wat dat fir Konsequenzen hätt.

Gëtt de Groupe technique mat der ADR weidergefouert?

De Groupe technique mat der ADR hat jo fir vill Opreegung gesuergt. Et hätt een d'Duerstellung no bausse falsch ageschat an et hätt een d'Saache besser missten erklären, seet de Sven Clement.

Ob ee weiderhi géing zesumme schaffe misst ee gesinn, déi zwou Parteie géingen elo no engem Joer mat hire Memberen d'Evaluatioun maachen.

Et géingen Argumenter dofir an dogéint ginn, fir weider ze fueren, esou de Sven Clement.

Regierung kënnt net an d'Gäng an ass net transparent

Fir wat stinn d'Piraten eigentlech? Mir si sozial-liberal, äntwert de Sven Clement. Fir d'Ausriichtung elo a "lénks" oder "riets" ze definéiere wier schwiereg.

Bei de Sujeten hätt een elo ganz kloer Schwéierpunkten, wéi de Casier judiciaire bis, de Logement, d'Steierreform oder och nach de Klimaschutz, do bräichte mer notamment eng Co2-Steier.

Dossieren, déi d'Regierung elo och onbedéngt misst upaken, ma déi kéim awer net an d'Gäng. Déi 3 Koalitiounspartner hätte wuel an der aktueller Period méi Schwieregkeete fir beieneen ze fannen ewéi an där leschter. Se géife sech och net traue fir de Bierger d'Wourecht ze soen.

D'Piraten envisagéieren iwwerdeems fir eng Plainte géint de Staat ze maachen. Dat well de Konzessiouns-Vertrag mat RTL fir d'Deputéiert net accessibel ass. D'Regierung wier net transparent, esou den allgemenge Reproche.

D'Vertrauen an d'Politiker hätt mat de rezenten Affären iwwregens Schued gelidden. D'Leit géife virun allem och gesinn, datt hei mat zweeërlee Mooss geschafft gëtt.
De Roberto Traversini an d'Carole Dieschbourg vun de Gréngen hätte vum Premier Xavier Bettel quasi keng Ënnerstëtzung kritt. Ma de Staatsminister hätt awer an der Saach mat der Mail direkt senger Parteikolleegin Corinne Cahen de Réck gestäipt, amplaz d'Ethik-Kommissioun anzeschalten.

A punkto Filmfong verlaangt de Sven Clement iwwerdeems een zweeten Audit. De Filmfong u sech wier net schlecht, ma seng Gouvernance misst ënnert d'Lupp geholl ginn an dono missten eventuell Konsequenze gezu ginn.

"Background am Gespréich" leeft ëmmer samschdes an der Mëttesstonn (vun 12 bis 13 Auer) op RTL Radio Lëtzebuerg an am Livestream um Internet respektiv an der App (Audio a Video). Dono ass d'Emissioun op RTL.LU zu all Ament nach eemol ze lauschteren oder ze kucken - an der Rubrik "Radio" bei Emissiounen "Background" wielen.