De Lex Delles, Guill Kaempff a Bob Wetzel waren dëse Samschdeg d'Invitéeën an der Emissioun Background am Gespréich.

Fir den Handel z'ënnerstëtzen, brauche mir e spezialiséierte Kadaster. An deem steet, wou, wéi eng Zort Geschäfter, Butteker a "Grandes surfaces" sinn. Sou de Mëttelstandsminister, dee sech am RTL-Background optimistesch gewisen huet, datt déi kleng Geschäfter an de Stied um Enn complementaire zu der grénger Wiss kéinte funktionéieren.

Déi aner Invitéeën, de President vum Stater Geschäftsverband an en Expert a Saache City Management, waren net ëmmer där selwechter Meenung. Sie deelen awer och net de Pessimismus vun sou munche Geschäftsleit.

Background am Gespréich iwwert den Handel zu Lëtzebuerg
Den Handel zu Lëtzebuerg: Keng Zäit fir Pessimismus.

D'Emissioun Background stoung ganz am Zeeche vum Commerce

Background: Guill Kaempff, Lex Delles a Bob Wetzel
Eng Stonn, fir hannert d'Kulissen ze kucken.

An der Ronn souzen de Mëttelstandsminister Lex Delles, de President vum Stater Geschäftsverband Guill Kaempff an de City Management-Beroder Bob Wetzel.

De Commerce wier am Wandel, 2/3 vun de Leit kafen zum Beispill entretemps online, do misst no Léisunge fir d'Geschäftsleit gesicht ginn, esou de Minister, deen an deem Kontext op d'Plattform Letzshop verweist.

D'Bewosstsi bei de Gemenge kéim ëmmer méi, fir sech fir de Commerce ze engagéieren, begréisst de Minister, e gutt Beispill wier Diddeleng.

Dobäi ass de Lex Delles ënnert anerem op de sougenannte Cadastre de commerce agaangen, deen néideg wär, fir eng Bestandsopnam vun den Handelssurfacen ze kréien a Konklusiounen doraus ze zéien:

Cadastre de commerce - Lex Delles

De Stater Geschäftsverband duerchlieft eng aussergewéinlech schwéier Zäit, dat wéinst de ville Chantieren, seet de Guill Kaempff. An der Stad wieren och d'Loyeren e Problem. Mir wieren op engem Héichpunkt ukomm wou d'Proprietären sech missten a Fro stellen.

Un de Guill Kaempff war et och d'Fro, ob d’Séil vun der Stad net verluer geet, wann, wéi rezent geschitt, en al agesiessene Buttek aus der Groussgaass decidéiert, seng Dieren do zouzemaachen:

D'Séil vun der Stad - Guill Kaempff

Et gëtt geografesch Ënnerscheeder. Daagsiwwer wieren zum Beispill am Norden oder am Osten net sou vill Leit, sou de Bob Wetzel. Wichteg wier, fir all Geschäftsstad eng detailléiert Bestandsopnam.

Den Impakt op d'Gemengen - Bob Wetzel

D'Ouverture vun neie Geschäfter an der Stad wier e positiivt Zeechen. Den neien Akafszenter Hamilius sollt zum Beispill als Chance ugesi ginn, an net als Konkurrenz fir bestoend Geschäfter. Commercë géife sech géigesäiteg unzéien, sou den allgemengen Echo.

Wat d'Email vun der Familljeministesch ugeet, géing ee bedaueren, datt d'Corinne Cahen no der Saach net méi d'Gespréich mam Geschäftsverband gesicht huet, esou nach de Guill Kaempff.

Background am Gespréich: Guill Kaempff, Lex Delles a Bob Wetzel

"Background am Gespréich" leeft ëmmer samschdes an der Mëttesstonn (vun 12 bis 13 Auer) op RTL Radio Lëtzebuerg an am Livestream um Internet respektiv an der App (Audio a Video). Dono ass d'Emissioun op RTL.LU zu all Ament nach eemol ze lauschteren oder ze kucken - an der Rubrik "Radio" bei Emissiounen "Background" wielen.