E Samschdeg war de Finanzminister Pierre Gramegna eisen Invité an der Emissioun Background am Gespréich.

D'nächst Joer wäerte Bensin an Diesel nees méi deier ginn: d'RTL-Informatioun, datt dës Hausse tëscht 2 a 6 Cent um Liter ass, huet de Finanzminister Pierre Gramegna an an der Emissioun "Background am Gespréich" confirméiert.

Wéini datt de Sprit am Laf vun de nächsten 12 Méint méi deier gëtt, gouf net preziséiert. Detailer kéinten et e Méindeg vun de Ministere Gramegna, Kersch an Turmes ginn, dat op Basis vum Bilan vun de Ventë vum Sprit vun dësem Joer.

Op den 1. Januar soll d'Hausse nach net spillen.

Wéi de Finanzminister sot, géif den Diesel méi klamme wéi den Bensin, dës Mesure géif Sënn maachen, well zum Beispill no der Hausse vum Diesel den 1. Mee dëst Joer d'Vente heivunner op den Tankstatiounen ëm 2,5% erofgaange wier.

De Pierre Gramegna iwwer de Bensin

D'Präis-Augmentatioun vum Sprit kënnt bei d'C02-Steier dobäi, déi jo vun 2021 u spillt a wäert e Plus vu 5 Cent op Sprit, Gas a Brennes ausmaachen. Duerch dës nei Steier solle bis zu 150 Milliounen u Recetten an d'Staatskeesen erakommen.

De Pierre Gramegna iwwer d'CO2-Steier

Bis Enn d'nächst Joer wëll de Finanzminister och d'grouss-ugeluechte Steierreform als Gesetzprojet finaliséiert hunn - nieft enger globaler Revisioun an Adaptatioun vun alle Mesuren, déi am Beräich vum Logement spillen, gëtt och d'Grondsteier an d'Autossteier op de Leescht geholl an no uewen ugepasst. Déi lescht Reform vun der Autossteier geet op 2008 zeréck, dës Reform ass och am nationale Klima- an Energieplang dran.

D'Spritpräisser klammen d'nächst Joer ëm 2 bis 6 Cent
E Samschdeg war de Finanzminister Pierre Gramegna eisen Invité an der Emissioun Background am Gespréich.

D'grondleeënd Steierreform soll mat sech bréngen, datt et nëmmen nach een (1) Barème gëtt, datt de System vereinfacht an digitaliséiert gëtt. Virun den nächste Wale soll d'Reform dann ëmgesat ginn - dësen ambitiéisen Timing huet de Finanzminister Gramegna bei eis op der Antenn confirméiert.

De Pierre Gramegna iwwer d'Steierreform

Datt de Finanzsecteur via Steiere vill Recetten an d'Staatskeesen spullt, weist dem liberale Minister no d'Attraktivitéit vun deem Domaine hei am Land, deen 53.000 Leit beschäftegt - duerch de Brexit wieren iwwerdeem bis ewell 60 Firmen op Lëtzebuerg komm.

D'niddreg Zënspolitik vun der EZB hätt iwwerdeem der EU gehollef, aus der Kris erauszekommen, progressiv misst dem Pierre Gramegna no awer lo aus deem Negativ-Zëns-Zeenario erausgeklomme ginn.

De Pierre Gramegna iwwer d'Negativzënsen

D'Rulinge lafen iwwerdeem aus, un deem Timing hält de Finanzminister fest, och d'Stock-Options sollen iwwert d'Steierreform gesetzlech gereegelt ginn.

Eng europawäit Finanztransaktiounssteier wier NET am Interessi vum Land, sot de Finanzminister, deen iwwerdeem och offréiert huet, de Barreau z'empfänken, wat d'Ëmsetze vun enger duerch Affekote kontestéierter EU-Direktiv ugeet.

De Pierre Gramegna steet dem Projet "Google" positiv géigeniwwer.

De Pierre Gramegna iwwer Google
Background am Gespréich mam Pierre Gramegna

"Background am Gespréich" leeft ëmmer samschdes an der Mëttesstonn (vun 12 bis 13 Auer) op RTL Radio Lëtzebuerg an am Livestream um Internet respektiv an der App (Audio a Video). Dono ass d'Emissioun op RTL.LU zu all Ament nach eemol ze lauschteren oder ze kucken - an der Rubrik "Radio" bei Emissiounen "Background" wielen.