E Samschdeg war de President vun der Chambre de Commerce eisen Invité an der Emissioun "Background am Gespréich".

AUDIO: Background am Gespréich mat Luc Frieden

"Ech wier gär de Successeur vum Jean-Claude Juncker ginn, mee dëst huet sech net erginn" - dat gëllt och fir de Poste vum EU-Kommissär, wou de Luc Frieden dës Opportunitéit net krut.

„Ech ginn 2023 net mat an d'Walen." Dat sot e Samschdeg de Mëtteg den CSV-Politiker Luc Frieden an eiser Emissioun Background am Gespréich. Hie wär 5 Mol mat an d'Wale gaangen a 5 Mol gutt gewielt ginn, mä déi Phas wär elo eriwwer. Lëtzebuerg géing awer weiderhi wichteg bleiwe fir seng Zukunft, a wann hie géing gefrot ginn, eppes ze maachen, da géing hien och net „Nee" soen. Am Liewe kéint een eben net all Etapp virausgesinn.

2013 war et zu Neiwale komm. Dëst no Conclusiounen, déi eng Enquête-Kommissioun iwwert d'SREL-Affär gezunn hat. Am RTL-Interview gouf den deemolege Justizminister Luc Frieden och gefrot, wéi hien den Ëmgang mat der Bommeleeër-Affär zanter dëse Jore gesäit an aschätzt.

AUDIO: Luc Frieden iwwert d'Bommeleeër-Affär

2013 wär hien dunn an d'Privatwirtschaft gewiesselt mam Saz, dass d'Oppositioun him net géing leien, an dat wär ee ganz ongléckleche Saz gewiescht, duerch deen hie ganz arrogant bei verschiddene Leit eriwwer komm wär, sou de Luc Frieden. Ma hien hätt no senger Regierungszäit ganz vill interessant Offere kritt an et hätt hie gereizt, fir nei Saachen ze léieren an eng nei Erfarung ze maachen, déi him och elo notamment géing hëllefen a senger Funktioun als President vun der Chambre de Commerce.

De Luc Frieden iwwer säi Wiessel an d'Privatwirtschaft

Politik: Méi iwwer konkret Themen diskutéieren amplaz Ideologien

Déi éischt 3er-Koalitioun 2013 wär eng Koalitioun géint d'CSV gewiescht, dat gëtt de Luc Frieden zou, ma et wär eng demokratesch gewielte gewiescht, dat misst een acceptéieren.

Aktuell géingen all d'Parteien eng gutt Aarbecht leeschten, ma de President vun der Chambre de Commerce géing sech awer wënschen, dass méi iwwer eenzel Projeten an Iddie vun de Parteie géing geschwat ginn. Dat géing feelen.

D'Gesellschaft hätt sech iwwert déi lescht 20 Joer fundamental geännert, genee wéi d'Parteien. D'Ënnerscheeder géingen net méi iwwer ideologesch Barrièrë lafen, ma iwwer eenzel Themen, wéi de Klimawandel, zu deenen een sech da misst positionéieren.

„Mir brauche Wuesstem"

Als President vun der Chambre de Commerce hofft de Luc Frieden, dass den neie Wirtschaftsminister elo positiv géing iwwerraschen. De Franz Fayot wär an der Vergaangenheet nämlech net opgefall als een, dee sech positiv zur Wirtschaft äussert, mä et wär awer seng Aufgab, sech virun d'Betriber hei am Land ze stellen an dës virunzebréngen.

De Luc Frieden iwwer de Franz Fayot

„Mir brauche Wuesstem. Deen ass noutwenneg, dass d'Entreprisë kënnen iwwerliewen an dass eise Wuelstand kann erhale ginn." Dat seet de Mann, dee 15 Joer laang a villen Domainer geschafft huet. De Wuesstem géing ëmmer negativ gesi ginn, well een och net genuch iwwert de Géigendeel géing schwätzen, nämlech manner Paie, manner Pensioun a manner Investissementer an eis Infrastrukturen etc. Wann een also net géing dofir suergen, dass d'Entreprisë kéinte wuessen, da misst een och mat manner Wuelstand kënnen eens ginn.

Steierlech misst Lëtzebuerg nees attraktiv fir Betriber ginn, urgent misst dat geschéien, sou de fréieren CSV-Minister, deen elo parteipolitesch neutral, benevole, d'Chambre de Commerce féiert.

AUDIO: Luc Frieden iwwert Steieren

86% vun eisem PIB kënnt aus dem Déngschtleeschtungssecteur an dee brauch manner Ressourcen. Mä mir brauchen och deen anere Secteur an do muss ee kucken, wéi ee mat der Digitaliséierung méi modern ka ginn, manner CO2 kann ausstoussen etc.

D'Regierung dierft net ënnerschätzen, datt technologesch Ëmstellunge vu klima-intensive Betriber extrem deier wieren, duerfir misste se am Kader vun enger ekologescher Steierreform ënnert d'Äerm gegraff kréien.

A Punkto Finanzwiese géif et de Banken am Land "nach" gutt goen, den Drock vun de Negativ-Zënse wier awer grouss an d'Reglementatiounen a Saache "compliance" géifen et absënns fir kleng Banke schwiereg maachen, fir sech z'entwéckelen.

Op eng eventuell Fusioun tëscht Chambre de Commerce an der Chambre des Métiers ugeschwat, sollt et dem Luc Frieden no mëttelfristeg zu enger eenzeger Beruffschamber kommen. Traditioune missten awer respektéiert an näischt forcéiert ginn, mä eng eenzeg Chamber "géif Sënn maachen".

Rapport Waringo iwwer den Groussherzoglechen Haff

Bei den Diskussiounen iwwert de Rapport Waringo misst een zwou Saachen auserneen halen. De Rapport, deen de Xavier Bettel RTL-Informatiounen no e Freideg kritt hätt, géing ëm d'Astellungspolitik vum Haff goen an net ëm d'Monarchie en tant que tel. De Grand-Duc an den Ierfgroussherzog wären nämlech besonnesch wichteg, fir d'Betriber besonnesch am Ausland ze presentéieren. Et wär net d'Aufgab vum Rapport, fir Stellung ze huelen zur Positioun vun der Monarchie an eiser Gesellschaft.

AUDIO: Luc Frieden iwwert Waringo-Rapport

"Background am Gespréich" leeft ëmmer samschdes an der Mëttesstonn (vun 12 bis 13 Auer) op RTL Radio Lëtzebuerg an am Livestream um Internet respektiv an der App (Audio a Video). Dono ass d'Emissioun op RTL.LU zu all Ament nach eemol ze lauschteren oder ze kucken - an der Rubrik "Radio" bei Emissiounen "Background" wielen.