E Samschdeg war de Staatsminister eisen Invité an der Emissioun "Background am Gespréich".

D'Monarchie ass net an der Kris, d'Situatioun um Haff wär och net ausser Kontroll geroden, mä hie wéilt d'Monarchie stäerken, dat sot de Premier Xavier Bettel; hie war den Invité am Background.

Et wär och näischt Illegales geschitt. Mä verschidde Saachen hätten net fonctionéiert, wéi se hätte missen. Dat misst een änneren.

De Xavier Bettel huet och zouginn, datt d'Demande fir datt eppes geschitt aus dem Palais selwer komm ass, vum Hofmarschall a vum Chef de cabinet, déi soten: „Et geet net méi. Dir musst eis hëllefen“.

De Premier wär responsabel derfir, datt d'Institutioune funktionéieren. Datt d'Verfassung respektéiert gëtt. Dofir wär et seng Flicht, eppes z'ënnerhuelen, sou de Xavier Bettel.

Hie wëll kee Referendum iwwer d'Monarchie. Hien zweiwelt och net un der Zouso vum Grand-Duc, fir bei de Reforme matzeschaffen. Wär dat nämlech net de Fall, misst ee sech Suerge maachen iwwer d'Zukunft vun der Monarchie.

D'Relatioun mam Grand-Duc wär op alle Fall ganz gutt. Et géif ee sech reegelméisseg uruffen, SMSen a whatsappen. Och seng Relatioun mat der Grande-Duchesse wär gutt. Et soll keng Hexejuegd sinn. Mä et solle Reegele kommen, datt alles besser funktionéiert. D'Verfassung géif och just ee Chef d'Etat virgesinn, keng Koppel.

De Xavier Bettel sot och, datt den Hofmarschall all Dag am Palais misst sinn, 5 Deeg an der Woch. Aktuell ass dat mam Lucien Weiler anescht. Do ass also och e Wiessel geplangt.

Drop ugeschwat, ob en Trounwiessel net villäicht an noer Zukunft an d'Haus steet, huet de Premier gemengt, dat géif net op der Dagesuerdnung stoen. Et wär zwar eleng d'Decisioun vum Grand-Duc. Dee wéilt den Ament konstruktiv bei de Reforme matschaffen a wär nach voll motivéiert.

Op d'Fro hin, ob de Xavier Bettel gefrot ginn ass, fir EU-Rotspresident ze ginn, huet de Premier mat "jo" geäntwert. En huet sech mat sengem Partner Gauthier Destenay beroden, deen him un d'Häerz geluecht huet, d'Leit zu Lëtzebuerg net ze enttäuschen. Si hätten him d'Vertrauen ausgeschwat, an hie sollt weiderhi Premier zu Lëtzebuerg bleiwen.

De Xavier Bettel huet och präziséiert, datt d'Regierung keng Plaz hätt am Verwaltungsrot vun Arcelor Mittal. Den Här Mittal géif decidéieren, wien do dra kënnt. Net d'Regierung géif eppes proposéieren, kéint awer ëm hir Meenung gefrot ginn. De Premier gesäit den Etienne Schneider als ganz kompetente Kandidat, mä et wär wéi gesot d'Decisioun vum Här Mittal.

Den Ethikrot sollt deen Ament och fir en Avis gefrot ginn, hat de fréiere LSAP-Wirtschaftsminister vu sech aus proposéiert.

Background am Gespréich: Xavier Bettel

"Background am Gespréich" leeft ëmmer samschdes an der Mëttesstonn (vun 12 bis 13 Auer) op RTL Radio Lëtzebuerg an am Livestream um Internet respektiv an der App (Audio a Video). Dono ass d'Emissioun op RTL.LU zu all Ament nach eemol ze lauschteren oder ze kucken - an der Rubrik "Radio" bei Emissiounen "Background" wielen.