Den Direkter vun der Prisongsverwaltung war Invité dëse Samschdeg an der Emissioun "Background am Gespréich".

An den nächste Jore wäert sech vill am Prisongswiesen hei am Land veränneren: 2023 soll den Untersuchungsprisong um Uerschterhaff opgoen, duerno soll dann de Prisong zu Schraasseg entweder renovéiert oder komplett ofgerappt an nei opgebaut ginn an d'Prisongsreform ass derbäi, no an no komplett ëmgesat ze ginn. Dat sot den Direkter vun der Prisongsverwaltung Serge Legil. Hie war de Samschdeg de Mëtteg Invité vun eiser Emissioun "Background am Gespréich".

Alldag am Prisong

Ënnert anerem goung et ëm den Alldag vun de Prisonéier, dee gréisstendeels monoton wier. Schaffen, iessen, schlofen, vläicht nach e bësse Sport oder bis an den Haff, soss géif an engem Prisong par Definitioun net vill lafen, esou de Serge Legil. Et wier eng Plaz, wou vill Leit op enkem Raum ënner strenge Sécherheetsmesure géife Liewen.

Prisongsreform

Zanter bal 2 Joer ass d'Prisongsreform a Kraaft. Zentrale Pilier ass de „plan volontaire d‘insertion“, bei deem et absënns ëm d‘Resozialiséierung vu Prisonéier geet. Zentral wär do d'Evaluatioun vun de Leit, fir genee ze wëssen, mat wiem een et ze dinn huet. Do géif ee gutt virukommen, esou den Direkter vun der Prisongsverwaltung.

Aarbecht a Formatioun am Prisong

Laut Gesetz misst all Prisonéier schaffen, dat wier awer den Ament net de Fall, an de meeschte Fäll aus Gesondheetsgrënn. Aarbechtsplaze bräicht een der eigentlech méi, den Haaptsecteur ass hei d‘Buanderie, also Spidolswäscherei, wou all Dag 7 bis 9 Tonne Wäsch gemaach ginn. Donieft hätt een eng Schräinerei, Schlässerei, Usträicher a Gäertner. Fir déi Aarbecht kréien d‘Prisonéier och e puer Suen.

Bei der Weiderbildung hätt een d‘Schwieregkeet, datt een et mat enger ganz ënnerschiddlecher Populatioun ze dinn hätt. Zil wier, ëmmer verschidden handwierklech Fäegkeeten ze vermëttelen a Sproochen z'enseignéieren, déi hei am Land gebraucht gi wéi zum Beispill Franséisch.

Gewalt an Drogen

An engem Rapport vum Justizministère vun 2018 geet rieds vun 9 Streiken, 157 Akte vu Gewalt tëscht Prisonéier a 14 Aggressioune géint Giischtercher. Zejoert war keng Rebellioun, dat géing dorunner leien, dass een elo méi haart duerchgräift, esou de Serge Legil.

Droge bleiwen iwwerdeems ëmmer nach e groussen Problem am Prisong. All Woch géif een Transporter vun Droge feststellen, och a grousse Quantitéiten, meeschtens wier dat Cannabis, nëmme seele Kokain oder Heroin.  All Wochendag ginn et 1.300 Entréeën a Sortien zu Schraasseg an dat géing et schwiereg maachen, alles ze kontrolléieren. Ronn 200 vun de 500 Prisonéier hätten en Drogeproblem. Et wier ganz schwéier déi Gréisstenuerdnung vu Quantitéiten ze fannen, déi fir déi Leit géingen duergoen, virun allem, wann een net wéilt d'Mënscherechter aschränken. Et géif ee sech awer engersäits technesch Moyenen ukucken: do kéint deemnächst en Dispositif kommen, fir Cannabidoien z'entdecken, do géif ee mat engem däitsche Prisong vu Wittlech zesummeschaffen. Esouwuel hien als Direkter vun der Prisongsverwaltung wéi d'Justizministesch Sam Tanson wieren och dofir, datt Muppen an den Asaz kommen, esou de Serge Legil. Zesumme mat der Police an der Douane wéilt een am Laf vun 2021 sech zwee Hënn uschafen, déi dann 2023, wann den Uerschterhaff opgeet, och kéinten an den Asaz kommen.

Fraen am Prisong

Aktuell si 26 Fraen am Prisong. Et gëtt zu Schraasseg awer nëmmen ee Block, wou et schwiereg ass, verurteelt Frae mat laange Prisongsstrofen ze trennen, esou de Serge Legil. Dobäi kënnt, datt d‘Fraen, och wat d‘Aarbecht ugeet, am Prisong quasi guer kee Choix hunn. Si dierfen nëmmen an de Bitzatelier, botzen oder strecken. Sécherheetstechnesch kéint ee Fraen a Männer nämlech net beienee schaffen loossen, hei misst d‘Trennung bestoe bleiwen. Dat soll sech och besseren, soubal den Uerschterhaff opgeet, sou de Serge Legil.

Mannerjäreger am Prisong

Den Ament ass ee Mineur am Prisong zu Schraasseg. Zu Lëtzebuerg wéilt keen, dass Mannerjäreger an de Prisong mussen, sou den Direkter vun der Prisongsverwaltung. Och do géingen déi concernéiert Ministèren un enger Léisung schaffen.

Droge sinn am Prisong nach ëmmer e grousse Problem
Den Direkter vun der Prisongsverwaltung war Invité dëse Samschdeg an der Emissioun "Background am Gespréich".

Eckdate Prisongswiesen

De „Centre penitentiaire de Luxembourg“ um Kuelebierg zu Schraasseg gëtt et zanter 1984. Bis dohinner goufe Prisonéier nach am Prisong am Gronn an der Stad, also do wou haut d'Abtei Neimënster ass, ënnerbruecht. Ugangs war Plaz fir 160 Prisonéier, ma de CPL ass ëmmer nees un seng Grenze gestouss a gouf ausgebaut. Haut ginn et 597 Better zu Schraasseg. Nieft separate Bléck fir Fraen a Männer, ginn et am CPL och Zelle fir Mannerjäreger.

Aktuell si 499 Leit zu Schraasseg ënnerbruecht, dovunner 473 Männer an 26 Fraen.

Ronn d'Hallschent vun den Detenuen zu Schraasseg sinn iwwerdeems Untersuchungshäftlingen. Soubal den Uerschterhaff opgeet, gëtt de CPL also staark entlaascht. Den Uerschterhaff wäert Plaz fir maximal 400 Leit bidden.

Vun de 499 Prisonéier, sinn 257 Residenten zu Lëtzebuerg, 242 Non-Residenten. De Gros vun den Häftlinge sëtzt  wéinst Delikter ronderëm Drogen, Vollen a Coups et Blessures. Just 42 Leit sinn am Prisong wéinst Homicide an 22 Sexualstroftäter. Den Altersduerchschnëtt zu Schraasseg läit bei ronn 37 Joer.

Background am Gespréich mam Serge Legil

"Background am Gespréich" leeft ëmmer samschdes an der Mëttesstonn (vun 12 bis 13 Auer) op RTL Radio Lëtzebuerg an am Livestream um Internet respektiv an der App (Audio a Video). Dono ass d'Emissioun op RTL.LU zu all Ament nach eemol ze lauschteren oder ze kucken - an der Rubrik "Radio" bei Emissiounen "Background" wielen.