D'Buergermeeschtere vun de Gemengen Déifferdeng, Schieren a Veianen waren eis Invitéen dëse Samschdeg an der Emissioun "Background am Gespréich".

Mam Christiane Brassel-Rausch (Déifferdeng), mam Eric Thill (Schieren) a mam Claude Tonino (Veianen) hu mir op hir nei Funktioun, awer och op Erausfuerderunge a Problemer vun hire Gemenge gekuckt.

Background am Gespréich - Christiane Brassel-Rausch, Eric Thill a Claude Tonino

Ech sinn esou gestreckt, dass wann ech A soen, da soen ech och B. Dofir wier et fir d'Christiane Brassel-Rausch selbstverständlech gewiescht, de Buergermeeschter-Posten unzehuelen – dat nodeems eng Rei besser gewielte Leit refuséiert haten. An Tëschenzäit hätt si sech och gutt ageschafft, hätt vill geléiert.

Och fir den Eric Thill war et de Sprong an d'kaalt Waasser fir de Posten als Schierener Buergermeeschter unzegoen. Uganks wier et wuel keng einfach Situatioun gewiescht, ma hie wier houfreg, als éischt Gewielten elo och d'Verantwortung als Buergermeeschter z'iwwerhuelen. Mat 26 Joer ass hien dee jéngste Gemengepapp am Land. E gewëssenen Drock géif dës Charge sécherlech matbréngen, ma déi wier bei him elo net méi grouss, wéi bei aneren, méi ale Buergermeeschter.

De Claude Tonino vu Veianen hätt déi grouss Chance gehat, dass de Betrib, an deem hie schafft, hien ënnerstëtzt huet an dee Moment, wou de Buergermeeschterposten am Raum stoung, an him och erlaabt hätt, dës Charge z'iwwerhuelen.

Eng vun de groussen Erausfuerderunge fir eng Gemeng ass et, Betriber ze halen, respektiv unzezéien. De Schierener Buergermeeschter ass houfreg, dass seng Gemeng net nëmmen eng Schlof-Gemeng wier. Et hätt ee lokal Commercen an och eng Rei Betriber, déi gutt lafen. An et kéimen der nach derbäi, ma et géif een domat awer och schonn un d'Limitte kommen, wat d'Plaz ugeet, esou den Eric Thill weider.

Et misst een aus dem Zentralismus-Gedanken erauskommen, ouni op der anerer Säit d'Land ze zersidelen. Op alle Fall géif et och zu Déifferdeng vill interesséiert Betriber, fir sech hei néierzeloossen. An deem Beräich wier een aktuell och gutt opgestallt, esou d'Buergermeeschtesch.

Zu Veianen hätt een déi grouss Chance, dass ee scho laang attraktiv wier fir den Tourismus. Ma den Atout vun der Natur ronderëm wier a puncto Industrie éischter en Hindernis. An dobäi géif et eng Rei Entreprisen, déi sech hei wéilten néierloossen, ma de Plazmanktem wier nawell e Problem fir déi Gemengeresponsabel.

"Background am Gespréich" leeft ëmmer samschdes an der Mëttesstonn (vun 12 bis 13 Auer) op RTL Radio Lëtzebuerg an am Livestream um Internet respektiv an der App (Audio a Video). Dono ass d'Emissioun op RTL.LU zu all Ament nach eemol ze lauschteren oder ze kucken - an der Rubrik "Radio" bei Emissiounen "Background" wielen.