D'Gesondheetsministesch, den Direkter vun der Santé an den Educatiounsminister waren d'Invitéeën dëse Samschdeg an der Emissioun "Background am Gespréich".

Background am Gespréich: Spezial Coronavirus

Et gëtt zu Lëtzebuerg zanter dem spéide Samschdeg Moien nieft dem éischten Doudesfall antëscht 51 Corona-Infektiounen. Dat huet d'Gesondheetsministesch Paulette Lenert an der Emissioun Background annoncéiert.

Nieft hir waren den Direkter vun der Santé Jean-Claude Schmit an den Educatiounsminister Claude Meisch d'Invitéen, fir iwwert déi aktuell Situatioun vun der Longekrankheet zu Lëtzebuerg ze schwätzen.

A China ginn d'Infektiounen zréck, bei eis wier et grad am gaange richteg unzezéien, sou d'Santésministesch, mat alle Repercussiounen wat dat bedeit. Dowéinst wiere mer all gefuerdert, fir als Gesellschaft zesummenzestoen.

Héchsten Zil ass a bleift déi schwaach, eeler a krank Matbierger, déi Komplikatioune riskéieren, besonnesch ze schützen an derfir ze suergen, datt de Gesondheetssystem allen Ufuerderungen gerecht ka ginn.

Persounen, déi keng schlëmm Symptomer hunn, solle sech an Zukunft an Auto-Quarantän setzen. Eng 100 Leit sinn den Ament isoléiert, mä d'Chifferen ännere permanent, well lafend nei Tester gemaach ginn. Getest gi prioritär Risikopatienten.

Déi nei Approche ass déi vun der Auto-Surveillance. D'Leit sollen sech op der Hotline mellen a sech wann néideg selwer a Quarantän setzen, besonnesch wa se mat vulnerabele Persounen a Kontakt sinn. Just Leit mat Komplikatioune kommen nach an d'Spidol, an där wäerten et der vill ginn.

Vun elo u sollen da just nach Persounen op de Coronavirus getest ginn, déi Komplikatioune riskéieren oder schwéier Symptomer hunn. Leit déi am Gesondheetssecteur schaffen géife weider méi getest, sou den Direkter vun der Santé.

Bei den Tester géingen et keng Kapazitéitsproblemer ginn. Eleng an der Nuecht op e Samschdeg wieren honnerten Tester gemaach ginn.

Extrait Jean-Claude Schmit (1)

Corona-Patiente ginn den Ament haaptsächlech am Centre hospitalier traitéiert, well do déi beschte Prise en charge méiglech ass. Infizéiert Persounen, deenen et gutt geet, an dat sinn der eng Häert, sinn doheem.

Vun e Mëttwoch u ginn d'Maisons médicales wärend dem Dag vu Moies 8 bis mëttes um 16 Auer an Zenteren ëmfunktionéiert, fir Leit en Charge ze huelen, déi Grippe- respektiv Coronasymptomer hunn. Dës Mesure war u sech fir e Méindeg geplangt, gouf awer ëm zwee Deeg verréckelt fir wierklech prett ze sinn.

Extrait Paulette Lenert (1)

Fir d'Personal aus dem Gesondheets- a Fleegesecteur gi speziell Verhalensmesuren ausgeschafft. Et goufen 120.000 Masken un d'Doktere verdeelt. Bei de Fleege-Reseauen ass et d'Responsabilitéit vum Patron, fir fir déi néideg Precautiounen ze huelen, huet et an der Emissioun geheescht. Et géing och eng Lëscht mat Reserve-Leit ginn, déi wann néideg kéinte mobiliséiert ginn, fir am Gesondheetsberäich ze hëllefen, wann et néideg ass.

Mat Bléck op d'Nopeschlänner ass net auszeschléissen, datt weider Mesurë wäerte geholl ginn, sollten d'Zuele weider massiv an d'Luuchtt goen. Fir eng Gesellschaft wier et awer och net gutt, fir alles ze verbidden.

Beim Congé pour raisons familiales, deen déi 2 kommend Woche ka geholl ginn, soll och eng gewëss Vernonft spillen, sou den Appell vun den Invitéeën e Samschdeg de Mëtteg. Jidderee soll kucken, wat et fir aner Léisunge kéint ginn.

Et misst ee bedenken, datt och d'Ekonomie misst weider funktionéieren, an datt besonnesch op kritesche Poste Leit géinge gebraucht ginn.

D'Regierung mécht den Appell, keng Abusen ze bedreiwen an ënnerteneen ze kucken, wéi ee sech géigesäiteg an dëser aussergewéinlecher Situatioun hëllefe kann.

D'Organisatioun fir déi nächst zwou Wochen, wa keng Schoul ass, hätt gutt geklappt, sou den Educatiounsminister.

Extrait Claude Meisch (1)

"Background am Gespréich" leeft ëmmer samschdes an der Mëttesstonn (vun 12 bis 13 Auer) op RTL Radio Lëtzebuerg an am Livestream um Internet respektiv an der App (Audio a Video). Dono ass d'Emissioun op RTL.LU zu all Ament nach eemol ze lauschteren oder ze kucken - an der Rubrik "Radio" bei Emissiounen "Background" wielen.