D'Familljeministesch, den Arméisminister an de Vizepremier an Aarbechtsminister waren e Samschdeg an der Emissioun "Background am Gespréich" eis Invitéen.

Mir hunn Interêt fir Reserve-Capacitéiten ze hunn a mir hunn dofir all Kontakter spille gelooss. Dat sot den Arméisminister François Bausch e Samschdeg de Mëtteg an der Emissioun Background, déi am Zeeche vun der Corona-Pandemie an de Repercussiounen op d'Gesellschaft stoung.

Background am Gespréich vum 21. Mäerz
D'Familljeministesch, den Arméisminister an de Vizepremier an Aarbechtsminister waren e Samschdeg an der Emissioun "Background am Gespréich" eis Invitéen.

Bannent 24 Stonne hätt een alles mobiliséiert kritt, esou de Minister, d'Provënz Henan géif eis hëllefen. An Zesummenaarbecht mat der NSPA kritt een eng qualitativ héichwäerteg Struktur.

An der Emissioun Background waren och d'Familljeministesch Corinne Cahen an den Aarbechtsminister Dan Kersch Invitéen am Studio.

"Iwwer d'Käschte schwätze mer dono", sou den Dan Kersch. Eis éischt Suerg ass déi, datt all d'Leit um Enn vum Mount eng Pai kréien. Dofir goufen d'Prozedure fir d'Kuerzaarbecht vereinfacht. 500 Millioune wieren neierdéngs fir de Fonds pour l'emploi mobiliséiert ginn, sou nach den Dan Kersch.

Op d'Grenzmesuren ugeschwat, riicht den Dan Kersch nawell däitlech Wierder u Richtung Däitschland. Et wier een zwar séier gewiescht, fir d'Grenzen zouzemaachen, ma bei de sanitäre Moossname géing ee sech bei eisen Noperen nawell schwéier doen.

"Mir wëlle sou mann wéi méiglech Trafic an den Altersheemer", seet d'Familljeministesch Corinne Cahen. D'Soine ginn assuréiert. Et gëtt vill iwwer Telefonen oder aner Kanäl gereegelt. Et goufe och Masken am Secteur ausgedeelt.

Wa fir d'Leit doheem manner dacks akaaft gëtt oder wa manner dacks do gebotzt gëtt, géing dat dru leien, datt dat Personal anerwäerts gebraucht gëtt. Allgemeng ass et de Rappell, datt Elteren hire Kanner missten de Message ginn, datt hei d'Santé publique um Spill steet, sou d'Corinne Cahen.

Kee Versteesdemech huet de François Bausch, datt d'Police an de leschten Deeg Bistroen huet missten zoumaachen an datt et, wéi et schéngt, nach ëmmer Corona-Partye gëtt. Dat wier irresponsabel, sou de Minister, deen all deene Leit Merci seet, déi sech un d'Reegelen halen.

D'Gestion de Crise wier net einfach, well et andauernd nei Situatioune gëtt. De Santésministère géing d'Koordinatioun maachen. D'Regierung wier permanent am enke Kontakt mat allen Acteuren, fir d'Situatioun sou gutt et geet ze meeschteren.

De Staat géif op alle Fall funktionéieren, sou d'Ausso vum Dan Kersch.

Background am Gespréich vum 21. Mäerz: Spezial Coronavirus

De Background héiert Dir wéi gewinnt e Samschdeg an der Mëttesstonn vun 12 bis 13 Auer live um Radio, op RTL.lu oder op der App.