E Samschdeg war de Wirtschaftsminister eisen Invité an der Emissioun Background am Gespréich.

D'Gesondheet géing vir, dat wier de Prinzip, esou de Wirtschaftsminister Franz Fayot de Mëtteg an der Emissioun Background.

Hie wéisst awer, datt et besonnesch bei kleng Commercen – zum Beispill am Horesca-Beräich – ëm d'Existenz géing goe grad. Ënner anerem dofir kéime lo weider direkt Hëllefen derbäi, déi net misste rembourséiert ginn. Fir Entreprisë sinn et Aidë vu 5.000, respektiv 12.500€, wa gewëss Konditiounen erfëllt sinn.

Et kommen zousätzlech also Hëllefe fir d'Commerçanten, dat sot de Wirtschaftsminister Franz Fayot an eiser Emissioun Background am Gespréich.

De Chiffre d'affaire muss dofir ëm 50% agebrach sinn. Dës nei Hëllefe kënnen awer mat den Aiden, déi scho virgestallt goufen, cumuléiert ginn.

Fir d'Independante sollen d'Indemnitéiten ugepasst ginn. Dat géing och mam Aarbechtsminister Dan Kersch diskutéiert ginn. Et stéing awer nach näischt fest.

Eng 10.000 Demandë gi sech vun den Independanten erwaart, fir d'Hëllef vun 2.500€ ze kréien. De Wirtschaftsminister mécht op dëser Plaz den Opruff, sech fir déi Aiden ze mellen, fir déi een och eligibel ass.

Fir d'Hëllef fir d'Entreprisë vu 5000€ hätten sech nämlech och vill Independante gemellt, déi elo awer fir d'éischt eng negativ Äntwert kréien, ier déi aner Aide, fir déi si eligibel sinn, kann accordéiert ginn.

D'Avance fir Betriber, déi jo bis 500.000€ ka goen, muss fréistens no engem Joer ugefaange ginn, zeréck bezuelt ze ginn. Et wier och d'Iddi, dass et deene Betriber duerno besser geet an dass si dann dës Scholden och kënne packen. Eng 400 Demandë koume scho fir esou eng Avance eran.

Am Bausecteur géif et eng gewëss Koherenz ginn, dofir géif et sech ubidde fir hei als éischt rëm unzefänken, ënnert strikte Sécherheetsmesuren natierlech. Dono misst ee kucken, wéi d'Infektiounen evoluéieren.

Fir all Betriber gëtt et déi kloer Recommandatioun, datt d'Mataarbechter e Mondschutz sollen hunn, respektiv datt d'Distanze respektéiert ginn.

Datt de congé collectif am Summer kéint ewech falen, doriwwer kéint een diskutéieren, sou de Minister, dee vun enger Rezessioun vu ronn 5% ausgeet a vun enger Hausse vum Chômage vu ronn engem hallwe Prozentpunkt.

De Minister huet am Background nach d'Problematik mat de Stéit ugeschwat, déi eng Botzpersoun bei sech doheem engagéiert hunn.

Hei wäert et e Changement beim steierlechen Abattement ginn an zwar geet deen ëm 25% erop.

D'Emissioun Background am Gespréich mam Franz Fayot héiert der wéi gewinnt dëse Samschdeg tëscht 12 an 13 Auer op RTL Radio Lëtzebuerg, op rtl.lu an op der App.

"Background am Gespréich" leeft ëmmer samschdes an der Mëttesstonn (vun 12 bis 13 Auer) op RTL Radio Lëtzebuerg an am Livestream um Internet respektiv an der App (Audio a Video). Dono ass d'Emissioun op RTL.LU zu all Ament nach eemol ze lauschteren oder ze kucken - an der Rubrik "Radio" bei Emissiounen "Background" wielen.