E Samschdeg waren d'Santésministesch Paulette Lenert an d'CSV-Oppositiounsleaderin Martine Hansen eis Invitéen an der Emissioun Background am Gespréich.

Et hätt ee sech gewënscht, méi consultéiert ze ginn. Dat sot d'CSV-Oppositiounsleaderin Martine Hansen an der Emissioun Background am Gespréich. Et wier ee beméit, ob all d'Froen anzegoen, huet d'Gesondheetsministesch geäntwert. Ma fir alles schrëftlech ze diskutéieren, wier an dëser Pandemie awer keng Zäit. D'Transparenz soll awer garantéiert ginn, notamment och mat de Grafiken, déi an Zesummenaarbecht mat der Uni.lu ausgeschafft ginn. De detailléierte Monitoring wier awer am Ufank net méiglech gewiescht, well d'Statistiken nach hu missen analyséiert ginn.

Resumé/Reportage Claudia Kollwelter

Et misst een dann d'Zuelen och a Relatioun setzen, präziséiert d'Gesondheetsministesch weider. Esou zum Beispill d'Zuel vun den Infizéierten a Verbindung mat der Zuel vun den Tester, déi gemaach ginn. Et bréicht een awer och ëmmer nach Gedold, well sech d'Auswierkunge vum Deconfinement eréischt no enger gewësser Zäit weisen.

De Confinement huet d'Zuelen erofgedréckt, ma och elo misst ee mat der néideger Virsiicht weidermaachen, fir kënnen ze annoncéieren, wéi d'Reegele vum Confinement weiderhi kënnen entspaant ginn.

D'Gesondheet, eis Fräiheet an d'Wirtschaft misst ënnert een Hutt bruecht ginn, sot d'CSV-Oppositiounsleaderin Martine Hansen. Et bréicht een eng méi kloer Perspektiv, wéi zum Beispill wéi vill Infektiounen oder wéi vill hospitaliséiert Covid-19-Patienten een kéint "erdroen".

Déi zwou Politikerinne sinn sech eens, dass mir musse léieren, mam Virus ze liewen. Et géingen awer Mesuren ginn, déi d'Leit net méi verstinn, sot d'Martine Hansen. D'Regierung wier sech och bewosst, dass de strenge Lockdown esou lues misst méi labber ginn, ma hei misst een déi schwéier Balance anhalen tëscht der Zuel vun den Infizéierten an de perséinleche Fräiheeten.

Bis ronn 100 Leit op den Intensivstatiounen kéint ee geréieren, seet d'Gesondheetsministesch virsiichteg. Obwuel mir eng 300 Better op den Intensivstatiounen hunn, wier dat eng ganz schwéier Situatioun, déi een net wéilt riskéieren.

Emissioun "Background am Gespréich"
E Samschdeg mat der Gesondheetsministesch Paulette Lenert an der Martine Hansen vun der CSV.

Et gouf och deelweis plädéiert, fir de strengen "Bleift doheem" bis an de Mee nach bäizebehalen, mä et géing eben dorëms goen en richtegen Equiliber ze fannen. Déi streng Mesurë wieren, wann een zeréck kuckt, net iwwerdriwwe gewiescht. Well d'Situatioun virun allem no der Fuesvakanz bei eis am Land eng relativ schlëmm gewiescht wier, esou d'Gesondheetsministesch.

Wat d'Kommunikatioun vun der Regierung ugeet, huet d'Martine Hansen ervirgehuewen, dass et bei den Tester Onkloerheete gouf. Am Ufank wier gesot ginn, dass d'Tester nëmmen eppes bréngen, wann och Symptomer do sinn, elo gëtt awer op flächendeckend Tester gesat.

D'Gesondheetsministesch erkläert, dass sech d'Lage verännert hätt. De Virus ass nei, et géingen dofir ëmmer nei Informatiounen an Erkenntnisser kommen. Bei den flächendeckend Tester ginn Contagante gebilt. Et ginn also verschidde Beräicher geholl, déi an Echantillonen getest ginn. Bei den Ofschlossklassen wier et méiglech, fir jiddereen kënnen ze testen, well dës Grupp net esou grouss wier.

Am Bausecteur wier och e Cluster getest ginn. Well d'Resultat berouegend gewiescht wier, muss hei net flächendeckend getest ginn. Mä dëse Secteur kéint zum Beispill an e puer Wochen nees getest ginn, fir hei den Suivi ze maachen. Bei den Alters- a Fleegeheemer géing jiddereen getest ginn, well dëse Beräich besonnesch misst am Ae gehale ginn.

Et misst ëmmer gekuckt ginn, wéi d'Kapazitéite sinn a wou een teste kann.

"De Sënn vun dësen Tester ass, eis an den Entscheedungen ze begleeden", betount d'Paulette Lenert. Et soll elo net esou ausgesinn, wéi wann mir de Virus lass wier. Eng zweet Well wier nämlech ëmmer nach méiglech. Dofir misst den Deconfinement eben mat Tester an Etüden iwwerwaacht ginn.

Wat den Tracage ugeet, wier et den Ament méiglech manuell ze schaffen an d'Kontakter vun de positiv-geteste Leit an engem opwännegen Telefonsgespréich ze suivéieren. D'Martine Hansen schwätzt sech virsiichteg fir eng méiglech Tracing-App aus, wann dat méi Fräiheete géing erméiglechen. Et dierft een den digitalen Tracing net vum Dësch weisen an de manuellen Tracing wier eben net esou genau an och méi lues, wéi déi digital Alternativen.

Well eist Land awer esou kleng ass, géing den Tracage nëmme Sënn maachen, wann d'Fäll vun den Infizéierten op engem raisonnabelen Niveau bleiwen, huet d'Gesondheetsministesch betount. Wann d'Fäll nees sollten klammen, da klammen och d'Kontaktpersounen, déi a Quarantän misste gesat ginn, exponentiell. Da wier e groussen Deel vun eiser Bevëlkerung ënner Quarantän, sot d'Ministesch. Dat misst een an der Diskussioun vun enger App och bedenken.

Et ass aktuell net geplangt, dass d'Leit nieft de 5 Masken, déi se scho kruten, nach méi Masken ausgedeelt kréien. Elo wou een d'Masken och an den Apdikten oder Supermarchéë kritt, sinn d'Leit opgeruff, sech selwer nach mat Masken anzedecken, fir den eegene Gebrauch. Hei ass et och den Appell un d'Betriber, hiren Employéen Masken ze organiséieren, wann déi nees ufänke mat schaffen.

Background am Gespréich: Paulette Lenert a Martine Hansen

"Background am Gespréich" leeft ëmmer samschdes an der Mëttesstonn (vun 12 bis 13 Auer) op RTL Radio Lëtzebuerg an am Livestream um Internet respektiv an der App (Audio a Video). Dono ass d'Emissioun op RTL.LU zu all Ament nach eemol ze lauschteren oder ze kucken - an der Rubrik "Radio" bei Emissiounen "Background" wielen.