E Samschdeg war de fréiere Staatsminister an Ex-EU-Kommissiounspresident Jean-Claude Juncker eisen Invité an der Emissioun Background am Gespréich.

Background mam Jean-Claude Juncker / Resumé Pierre Jans

Dem fréien EU-Kommissiounspresident Jean-Claude Juncker no meeschtert déi blo-rout-gréng Regierung dës Corona-Kris gutt. Besonnesch d'Gesondheetsministesch Paulette Lenert géif e gudden Job maachen, mä och de Premierminister Xavier Bettel krut Luef vum Jean-Claude Juncker.

D'Kommunikatioun vun der Regierung hätt e repetitive Charakter, se wär ënnert dem Stréch awer gutt.

Och d'CSV, d'Partei vum Jean-Claude Juncker hätt sech responsabel verhalen an net mat enger Bazooka op all Klengegkeet geschoss. Dat begréisst den Invité am Background. Dem Jean-Claude Juncker no feelen am Grupp vun de Leit, déi an dëser Kris d'Entscheedungen treffen, awer d'Gewerkschaften.

Et muss een der Wirtschaft hëllefen ze redemarréieren, zu Lëtzebuerg an och an Europa. Dem Jean-Claude Juncker no ginn d'Hëllefe vu 540 Milliarden Euro vun de Staaten an der Kommissioun an déi 750 Milliarden Euro iwwer d'Europäesch Zentralbank tendenziell an déi richteg Richtung. Den nächsten europäesche Budget misst awer däitlech gehéicht ginn, fir der Kris bäizekommen, seet de fréien EU-Kommissiounspresident.

Déi Wirtschaftskris, déi elo op eis duerkënnt, vergläicht de Jean-Claude Juncker nëmme ganz virsiichteg mat der Euro-Kris. Et wär schwéier, Parallellen ze zéien. Dës Kéier trëfft d'Kris brutal d'Ekonomie op der ganzer Welt. D'Volummen, déi de Lëtzebuerger Staat elo opbrénge misst, wäre vergläichbar mat 2008/2009. Do hätt een de Leit awer zousätzlech nach missen erklären, firwat een dem Bankesecteur ënnert d'Äerm gräift. Vill Leit hätten deemools net verstanen, dass een d'Banke brauch, fir d'Wirtschaft nees op d'Been ze kréien. Politesch wär déi aktuell Kris méi einfach ze bewältegen, mengt de Jean-Claude Juncker.

Grenzkontrollen: e Virus kritt een net mat zouene Grenze gestoppt

"Et ass absolutt lächerlech!" Esou kommentéiert de Jean-Claude Juncker d'Grenzkontrollen op der däitscher Grenz. Et wär e Skandal, dass déi däitsch Autoritéite, deemno virop den Inneminister Horst Seehofer, d'Kontrollen decidéiert hätten, ouni Ofsprooch mat den Noperen. Dat si Provokatiounen, seet den Jean-Claude Juncker, e Virus hält een net op, wann ee Grenzen zoumécht. Dem fréiere Lëtzebuerger Staatsminister no missten déi Politiker erklären, firwat d'Hollänner manner geféierlech si fir d'Verbreedung vum Virus, ewéi zum Beispill d'Lëtzebuerger.

Resumé vum Background am Jean-Claude Juncker
E Samschdeg war de fréiere Premier an Ex-EU-Kommissiounspresident eisen Invité an der Emissioun Background am Gespréich.

Lëtzebuerg: Wunnengsmaart bleift gréisste Problem

De Wunnengsmaart wär fir de Grand-Duché nach ëmmer dee gréisste Problem, huet de Jean-Claude Juncker betount. Et bréicht schonn en nationale Ruck, fir dee Problem an de Grëff kréien. De fréiere Premier huet gesot, dass et net kéint sinn, dass e puer Leit deier Terraine verkafen an aner Leit keng Wunneng fannen. Déi Ongläichheet géif op Dauer schif goen. E bësse Steiere méi géifen deene mat vill Suen näischt ausmaachen. Anerer kéinte méi héich Steieren awer kaum bezuelen, gëtt den Jean-Claude Juncker ze bedenken.

Politesch Karriär: "Ech hu meng Mëllech ginn"

De fréiere Staatsminister huet gesot, dass hie léiwer Premier war, ewéi Kommissiounspresident. Béides hätt him awer Spaass gemaach. De Jean-Claude Juncker kritiséiert déi aktuell Kommissioun vu senger Nofollgerin Ursula von der Leyen. Si hätt uganks net hefteg a kloer genuch reagéiert. Eréischt no an no hätt d'Kommissioun nees Uerdnung an d'Saach bruecht. De Facto hätten d'Memberstaate versot, an net d'EU.

De Kompetenzberäich vum Kommissiounspresident wär dacks ze enk gefaasst, huet de Jean-Claude Juncker erkläert. An esou Fäll – ob dat d'Griicheland-Kris oder déi vun de Flüchtlinge war - hätt een d'Kompetenzen da selwer u sech gezunn. Hien huet vun ''Telefonsdiplomatie'' geschwat.

De fréiere Staatsminister huet gesot, dass hie ganz sécher net méi mat senger Partei der CSV an d'Wale géif goen. Säin Alter vu 65 Joer wär awer net Grond. Mä hien hätt seng Mëllech ginn, esou huet den Jean-Claude Juncker et formuléiert. Hie géif trotzdeem net drun denken aus der Partei auszetrieden.

De Jean-Claude Juncker gëtt méi sec, wann hien op de Regierungswiessel vun 2013 ugeschwat gëtt. Hien huet erkläert, dass hien net beleidegt war, dass wéi et schéngt, kee méi mat him zesumme regéiere wollt. Par konter wär hie rosen, dass sech net un d'Walresultater gehale gi wär.

D'Regierung vum Premier Xavier Bettel huet d'Trennung vu Kierch a Staat radikal duerchgezunn. Sou munch Ännerungen – zum Beispill d'Ofschafung vum Reliounsunterrecht am Secondaire - wären awer och komm, wann d'CSV nach um Rudder wär, huet den Jean-Claude Juncker betount. Seng Partei wär eng Vollekspartei a misst dat och bleiwen. Et misst eng Partei sinn, déi net dat seet, wat ukënnt, mä déi dat seet, op dat et ukënnt, esou de fréiere Staatsminister.

De Jean-Claude Juncker fëmmt iwwregens net méi. Hie wär elo manner nervös ewéi an där Zäit, wou hie vill gefëmmt huet. Eng generell Recommandatioun fir mam Dämpen opzehalen, wollt den Ex-EU-Kommissiounspresident awer net maachen.

Memoiren

De Jean-Claude Juncker wäert seng Memoirë verëffentlechen. D'Fro ass just wéini. Aktuell géifen eng Hellewull un Interviewe vill vu senger Zäit an Usproch huelen. Allerdéngs hätt hien de schwéiersten Deel vum Schreiwe schonn hannert sech: de Plang vum Buch. An engem éischte Band wäert hie sech virop op seng Zäit zu Bréissel fokusséieren. Den Deel iwwer Lëtzebuerg kéim méi spéit, huet den Jean-Claude Juncker verroden.

Background mam Jean-Claude Juncker

"Background am Gespréich" leeft ëmmer samschdes an der Mëttesstonn (vun 12 bis 13 Auer) op RTL Radio Lëtzebuerg an am Livestream um Internet respektiv an der App (Audio a Video). Dono ass d'Emissioun op RTL.LU zu all Ament nach eemol ze lauschteren oder ze kucken - an der Rubrik "Radio" bei Emissiounen "Background" wielen.