De Vizepremier an Aarbechtsminister Dan Kersch war e Samschdeg eisen Invité am Background am Gespréich.

Den Etat de crise ass keen Idealzoustand, mä en absolutten Ausnamezoustand, deen net glécklech ass, sot den Dan Kersch e Samschdeg an der Mëttesstonn an eiser Emissioun Background am Gespréich. Et wier u sech eng gutt Saach, datt déi politesch Zivilgesellschaft dat hannerfreet.

Praktesch allkéiers géif sech am Regierungsrot Gedanke gemaach ginn iwwert dat, wat als nächst kéint opgoen, sou den LSAP-Minister.

Hei géifen ëmmer déi sanitär Consideratiounen an d'Kollateralschied op d'Wo geluecht ginn.

Eis Zuele sinn awer exzellent a si wieren net sou, wa mer net gehandelt hätten, och wann d'Regierung elo virgeworf kritt, si wier ze virsiichteg gewiescht.

Zu Lëtzebuerg wier effektiv ee virsiichtege Wee gewielt ginn, deen awer erfollegräich war, sou den LSAP-Vizepremier.

Wann alles gutt geet, géif e Méindeg eng weider Phas vun Ouverturen decidéiert ginn.

Et wier een hei am Land awer och an enger anerer Situatioun wéi am Ausland mat limitéierte Kapazitéiten an de Spideeler an enger grousser Beweegung vun de Bierger och mat de Frontalieren.

No der Kris wäert d'Aarbechtswelt anescht ausgesi wéi virun der Kris, sot den Aarbechtsminister. Iwwerall géif haut schonn anescht geschafft. D'Leit hätten hiert Verhalen der Gefor ugepasst. Beim Teletravail, op dee jo ganz vill Leit elo zeréckgräifen, géifen nach eng Rei Punkten ze kläre bleiwen, sot den LSAP-Vizepremier. An dat mat de Sozialpartner zesummen. Et kéint een net Home Office lassgeléist diskutéiere mat der Fro vum Recht fir ofzeschalten. Op der anerer Säit misst de Patron och Kontroll behalen.

Wann et awer ee Gewënner bei dëser Kris gëtt, da wier et d'Digitaliséierung, déi elo an Zäit vun e puer Méint e Schub gemaach huet, sou den Dan Kersch, deen donieft och hofft, datt dës Kris déi verschidde Säiten, och d'Sozialpartner nees méi no beienee féiert. No beienee wier een och nach ëmmer an der Dräierkoalitioun, et wier wuel diskutéiert ginn, mä um Enn wier e Mesurëpak elo rauskomm, deen d'Strooss hält.

De Staat huet bis elo 741 Milliounen u Kuerzaarbecht ausbezuelt. 330.000 Paie goufen iwwert dëse Wee u méi wéi 14.000 Betriber ausginn. Ouni Kuerzaarbecht wieren d'Chômagezuelen explodéiert, dovunner ass den Dan Kersch iwwerzeegt. Alles dat kascht Geld, och de Chômage pour raisons familiales oder d'Krankeschäiner. Och Independante wieren adequat ënnerstëtzt ginn.

Duerfir misst um Enn vun der Kris och e Kassensturz gemaach ginn.

Entloossunge si bis de 24. Juni verbueden, ma nom Etat de crise missten d'Betriber awer och d'Méiglechkeet kréien, fir sech ze restrukturéieren, och wann dat eng grouss Erausfuerderung géif. Besonnesch wichteg wier, datt dës Persounen, déi hir Aarbecht verléieren, weider respektiv ëmforméiert ginn. Hei misst e richtege Formatiounspak opgestallt ginn.

Ugeschwat op de Schoulsport, huet den Dan Kersch nach emol op d'Argumentatioun verwisen, datt d'Kanner am Sport net vunenee getrennt kéinte ginn, datt d'Sécherheetsmesuren net kéinten agehale ginn.

Dës Mesure géif elo annerhallwe Mount gëllen.

Wann een eppes Positives a Punkto Sport kann ervirhiewen, dann datt vill Leit de Wee zeréck bei déi eege sportlech Aktivitéit fonnt hunn.

Dan Kersch iwwer Sport/Reportage Jeff Kettenmeyer

Op d'Fro, wisou de Sport an dëse Wochen nach net Deel vun der Schoul ass, sot den Dan Kersch, datt déi Schoul, déi den Ament gemaach gëtt, eng aner ass, wéi soss an do géif et elo ëm Prioritéite goen.

Et wier ageschat ginn, datt et den Ament nach net méiglech ass, fir zesummen an der Schoul Sport ze maachen, well d'Gefor vun Infektiounen ze grouss ass. Dëst wier awer just eng Iwwergangsphas.

Wat d'Schwämmen ugeet, wier et d'selwecht wéi bei de Sportshalen.

Aktuell wier et schwiereg, ee Pronostic ze maachen, mä et géif een alles dru setzen, fir sou séier wei méiglech nees opzemaachen.

Den Dan Kersch sot och datt et e Méindeg nei Detailer wäerte ginn an do wier net ausgeschloss, datt och Annoncen a Punkto Sport dobäi wieren.

Et géif elo sou gemaach ginn, wéi wann een elo absolut keen Interessi um Sport hätt, dat wier net sou.

Background am Gespréich mam Dan Kersch

"Background am Gespréich" leeft ëmmer samschdes an der Mëttesstonn (vun 12 bis 13 Auer) op RTL Radio Lëtzebuerg an am Livestream um Internet respektiv an der App (Audio a Video). Dono ass d'Emissioun op RTL.LU zu all Ament nach eemol ze lauschteren oder ze kucken - an der Rubrik "Radio" bei Emissiounen "Background" wielen.