Mam Minister Claude Meisch, dem Féduse-President an dem Kannerdokter hu mir dëse Samschdeg iwwert e mouvementéiert Schouljoer geschwat.

Wann ee gesinn hätt, dass sech d'Schüler an d'Léierpersonal an der Schoul géingen ustiechen, hätt een d'Klassen net zesummegeluecht, dat sot den Educatiounsminister Claude Meisch an eiser Emissioun Background am Gespréich.

Resumé Background
Background am Gespréich vum 4. Juli mam Claude Meisch, Raoul Scholtes a Fernand Pauly.

Mat engem hallwer Effektiv hätz een awer besser kënnen d'Lacunne vun de Kanner opschaffen, esou de Féduse-President Raoul Scholtes.

De Risiko wier do, de Virus géing net einfach esou verschwannen, och net fir d'Rentrée am September, betount den Dr. Fernand Pauly. Dowéinst wier et elo och un der Zäit fir ze kucken, wéi ee mam Virus Schoul hale kann, sot och den Educatiounsminister.

Am Klassesall keng Mask unzehunn an och d'Distanz net anzehalen, well d'Klassen ze grouss sinn, géing de Risiko awer däitlech erhéijen, huet de Féduse-President Raoul Scholtes ugemierkt. Eng Partie Gebaier hu jo dowéinst och d'Maskeflicht an der Klass agefouert. Eng allgemeng Obligatioun an der Klass soll et awer net ginn, et wier weiderhi fakultativ, wann ee sech domadder méi sécher fillt, esou den Educatiounsminister Claude Meisch.

D'Schoulpersonal huet e Risiko, mä dee gréisste Risiko wier nach ëmmer um Wee fir op d'Aarbecht an dass sech d'Léierpersonal géigesäiteg ustécht, betount den Dr. Fernand Pauly. Dass d'Kanner oder d'Jugendlecher d'Schoulpersonal ustiechen wier domadder op drëtter Plaz.

Den Usproch un der Bildung iwwerweit, et kann een net eng verlueren Generatioun schafen, esou den Claude Meisch. Et kéint een d'Schüler a Schülerinnen dowéinst net iwwert eng zevill laang Zäit nëmmen all zweet Woch an d'Schoul schécken. Et wier net eleng un de Schoulen, Restriktiounen op sech ze huelen, fir d'Verbreedung vum Virus erofzedrécken, mä och u villen anere Beräicher, wou sech de Virus och noweislech méi séier verbreet, esou de Claude Meisch.

Fir net erëm zeréck an e Confinement mussen ze goen, wier et wichteg, dass de Large Scale Testing méi Uklang an der Gesellschaft fënnt. D'Verantwortung wier net nëmme bei de Kanner, mä och bei den Erwuessener, déi bei de Fräizäitaktivitéiten och zum Deel immens vill Leit géingen treffen, ouni de Mask unzehunn oder d'Distanz anzehalen, esou den Dr. Pauly.

Et wier och nogewisen, dass sech sech d'Schüler a Schülerinnen net direkt an der Schoul ustiechen, verséchert den Educatiounsminister. Dat wier um Beispill vun enger Schoul zu Wolz ze gesinn, wou eng Partie Kanner de Coronavirus kruten. Dës Kanner wieren awer Famill mateneen.

Nodeems déi ganz Schoul getest gouf, wier erausfonnt ginn, dass keng weider Kanner an och keen vum Schoulpersonal an der Schoul selwer ugestach gouf, sot de Minister Meisch.

D'Muster wier éischter, dass d'Elteren positiv getest ginn an doropshin gëtt dann och d'Ëmfeld, also d'Kanner getest. Dat wier och en Indice, dass d'Kanner éischter vun den Erwuessener ugestach ginn, wéi ëmgekéiert.

Eng 20 Schoulklassen wieren am Fondamental an am Secondaire a Quarantän. Dës Persoune mussen doheem bleiwen a sech dann teste loossen. Virun der Summervakanz wéilt ee mat der Santé e Bilan zéien, fir ze kucken wéi vill vun dësen Tester positiv ausgefall sinn, esou den Educatiounsminister Claude Meisch.

Background am Gespréich: E mouvementéiert Schouljoer

"Background am Gespréich" leeft ëmmer samschdes an der Mëttesstonn (vun 12 bis 13 Auer) op RTL Radio Lëtzebuerg an am Livestream um Internet respektiv an der App (Audio a Video). Dono ass d'Emissioun op RTL.LU zu all Ament nach eemol ze lauschteren oder ze kucken - an der Rubrik "Radio" bei Emissiounen "Background" wielen.