Den Direkter vum Statec ass Invité um Samschdeg vun der Emissioun Background am Gespréich.

Am Abrëll gouf et eng Surmortalitéit zu Lëtzebuerg, et sinn also méi Leit dee Mount gestuerwe wéi an der Moyenne déi lescht Joren.

Déi Méint elo dono konnte mer awer net méi Doudesfäll feststellen, sot um Samschdeg de Mëtteg de Serge Allegrezza. Den Direkter vum Statec war eisen Invité am Background am Gespréich.

Background am Gespréich mam Serge Allegrezza

Dat wär anescht wéi am Ausland, et wären net iwwerduerchschnëttlech méi Leit gestuerwe wéi déi Jore virdrun. Kollateral gesondheetlech Schied wéinst dem Coronavirus hätt een also bis ewell net kënne feststellen.

Zuel vun Neiinfektiounen am beschten net all Dag kucken

Et wier besser d’Zuel vun Neiinfektiounen op eng Woch ze kucke fir en Trend ze gesinn. Aner gutt Indicateure wieren d’Zuel vun Doudege wéinst dem Covid a vu Leit déi op der Intensivstatioun sinn, sou den Direkter vum Statec, de Serge Allegrezza an onser Emissioun Background am Gespréich.

Hien huet ons Analys confirméiert, datt d’Zuel déi all Dag gemellt gëtt net der reeller Zuel vun neien Infektiounen op een Dag gekuckt entsprécht, wat awer „normal“ wier an der Statistik. De System vun der Santé géing nämlech Donnéeë mat engem Retard produzéieren. De Statec wier awer am Gaang mat der Santé de System och ze „glätten“.

Wat d’Surmortalitéit ugeet, déi am Abrëll festgestallt gouf, déi huet sech nom leschten Doud wéinst dem Covid19 de 24. Mee net méi gewisen. Dat wär anescht wéi am Ausland, et wären net iwwerduerchschnëttlech méi Leit gestuerwe wéi déi Jore virdrun. Kollateral gesondheetlech Schied wéinst dem Coronavirus hätt een also bis ewell net kënne feststellen.

E kollateral Schued vun der Pandemie kéint eng Hausse vun den Inegalitéite sinn. De Serge Allegrezza huet do eng Rei Etüden annoncéiert, déi am Oktober kéinte publizéiert ginn. Déi klassesch Ëmfroen, fir d’Inegalitéiten ze moossen, hätte wéinst dem Lockdown awer net kënne gemaach ginn.

Klima

Wat de Klima ugeet huet de Statec notéiert, datt de Lockdown dem Land a Punkto C02-Ausstouss „Loft“ ginn huet, mee just fir kuerz dauer. Ganz Europa huet jo awer de Wëllen de „Green New Deal“  ëmzesetzen an d’Regierung hätt och ee Plang fir d’Energietransitioun, sou de Serge Allegrezza. Allerdéngs géing déi Transitioun elo „vill méi Zäit huelen“. An et misst een oppassen, datt déi Transitioun an d’Reprise „net a Kontradiktioun stinn“. Et wier och wichteg, datt d’Transitioun gerecht ass: “D’Leit wëlle vill Ännerungen, wann et awer méi konkret gëtt (…) da sinn d’Leit scho vill méi gedeelt“, sou den Direkter vum Statec.

Ekonomie

Um ekonomesche Plang sot de Serge Allregrezza, datt de Statec nach ëmmer mat 6% Rezessioun dëst Joer a 7% Reprise d’nächst Joer rechent. Dat obwuel d’EU Kommissioun elo Minus 6,2% dëst Joer a just 5,4% Reprise d’nächst Joer virgesäit. A Punkto Faillitte géing een elo nach näischt gesinn, sou den Direkter vum Statec. Faillitten dat wier awer eppes wat net direkt geschitt, dowéinst géing sech senger Meenung no „méi spéit am Joer oder souguer d’nächst Joer“ eppes weisen. Trotzdeem geet de Statec dovunner aus, datt de Chômage vun aktuelle 7% op 6,7% wäert sech apendelen, well am zweete Semester normalerweis d’Reprise do wäert sinn. Géing d’Pandemie sech allerdéngs verschlëmmeren da géing ee riskéieren op 10% Chômage ze klammen. Dat wier de Fall wann een eng zweet Well géing ginn déi een zweete Lockdown géing inevitabel maachen. De Serge Allegrezza mengt dowéinst wier en zweete Lockdown net probabel, iwwerdeems een eng zweet Well awer net kéint ausschléissen.

Et géingen och méi Risiken op eis „laueren“. Engersäits géing de Risiko bestoen, datt de Virus mutéiert oder sozial Opstänn géint d’Restriktiounen entstinn. Virun allem awer och wier de Brexit net vergiess oder den Handelskrich tëscht den USA a China.

Lëtzebuerg hätt dat awer net eleng an der Hand, och d'Entwécklung am Ausland wär fir de Grand-Duché ganz wichteg.

D'Zuele vun Nei-Infektioune soll een och net onbedéngt all Dag kucken, mä éischter iwwert eng Woch, dat géif méi aussoen.

Bei de Faillitë gesäit een de Moment nach weider keng Hausse. Dat wäert méi spéit kommen.

Beim Chômage rechent de Statec elo mat enger liichter Reprise vun Aarbechtsplazen, déi opginn, a geet vun engem Chômage vu knapp ënner 7% aus.

Kéim awer en zweete Lockdown, misst een eng Aarbechtslosegkeet vun 9, 10% fäerten.

De Statec kuckt den „R“-Wäert ganz genee, de Reproduktiounstaux.

Dee muss ënner 1 sinn, fir datt d'Infektiounen erofginn. Aktuell läit e bei 1,09.

Vill teste wär wichteg. Dat kéint een och systematesch an de Betriber maachen, och beim Staat, fënnt den Direkter vum Statec.

Op eng Tracing-App ugeschwat, mengt eisen Invité, datt een d'Technologie soll notzen. Dat alles fir en zweete Lockdown ze verhënneren, e Lockdown, deen ee sech weder wirtschaftlech nach sozial kéint leeschten, sou de Serge Allegrezza.

"Background am Gespréich" leeft ëmmer samschdes an der Mëttesstonn (vun 12 bis 13 Auer) op RTL Radio Lëtzebuerg an am Livestream um Internet respektiv an der App (Audio a Video). Dono ass d'Emissioun op RTL.LU zu all Ament nach eemol ze lauschteren oder ze kucken - an der Rubrik "Radio" bei Emissiounen "Background" wielen.