D'Gesondheetsministesch war eis Invitée e Samschdeg an der Emissioun Background am Gespréich.

"Mir haten net mat dësem Ausmooss vun Opflame vun der Pandemie gerechent. All Schrëtt war e Risiko an elo si mir am Gaang ze verstoen, wéi sech de Virus weider verbreet, et ass awer net ubruecht, a Panik ze verfalen", dat sot d'Gesondheetsministesch Paulette Lenert de Samschdeg de Mëtteg am Background hei op RTL.

Berouegend fënnt et d'Ministesch, datt vill Neiinfektiounen aus dem Retracage vun de Kontakter erauskommen, esou wiere 40% vun de positiv Getesten ewell a Quarantän.

Ob elo e Sonndeg op engem Regierungsrot nei Mesuren decidéiert ginn?

D'Ministesch sot, et misst een nach Gedold hunn. Am beschte wier et och, d'Evolutioun iwwert d'nächst Woch nach ofzewaarden.

Et wier "net einfach, fir séier Decisiounen ze huelen", esou d'Paulette Lenert, well et misst een nach ofwaarden, wat déi nächst Stonnen an Deeg geschitt.

Kommen also keng Restriktiounen? Net sécher, esou de fin mot. Allemol wier den Ament vum Deconfinement dee richtege gewiescht, esou d'LSAP-Ministesch.

D'Gesondheetsministesch sot, engersäits géing een eréischt an puer Woche gesinn, wéi dat neit Gesetz mat verschäerfte Kontrollméiglechkeeten a méi kloren Distanzreegele bei Rassemblementer vu Leit wierkt.

Nei Mesurë wieren inevitabel, wann d'sanitär Situatioun net méi anzedämmen ass a wann d'Infektiounschainen net kënne retracéiert ginn.

Paulette Lenert iwwer e méiglechen zweete Lockdown

Wichteg Léiere gezunn an eng "gëlle Reegel"

Anerersäits wier eng Léier aus der Kris, datt et wichteg wier, de Message eriwwerzebréngen, datt och wann d'Covid-Zuelen erëm niddreg wieren, d'Land awer nach matten an enger Pandemie ass.

Et ass vläicht falsch verstane ginn oder plazeweis net integréiert ginn, mee et ass net fir nozeloossen, esou d'Paulette Lenert. Wichteg wier ze wëssen, wéi de Virus sech iwwerdréit.

D'Paulette Lenert iwwer e Message, dee falsch verstane gouf

Wann et eng "gëlle Reegel" géing ginn, esou d'Gesondheetsministesch, dann ass et, souvill ewéi méiglech den Ofstand vun 2 Meter anzehalen, well de Virus sech iwwert den Otem iwwerdréit. Duerfir misst d'Verhale vun de Leit och ugepasst a geännert ginn.

Paulette Lenert: Et muss een alertéiert bleiwen

Lutte géint Pandemie ass e Marathon

D'Lutte géint d'Pandemie wier e Marathon, wou mer méiglecherweis eréischt an der Hallschent wieren, esou d'Paulette Lenert.

Jee no der Evaluatioun vun den Effekter, déi d'Schoul-Opmaachen hat, misst och d'Rentrée am Hierscht ugepasst ginn.

Datt lo organiséiert Vakanzenaktivitéite wéi Kolonien an Campen dierfen organiséiert ginn, fënnt d'Ministesch richteg - op dëse Plaze kéint een de Jonken zum Beispill d'Gestes barrières gutt bäibréngen. Och de Kontaktsport nees ze erlaben, wier korrekt.

Datt de Virus och nees an Altersheemer present ass, huet d'Ministesch confirméiert. Un den Direktioune vun dësen Haiser ass et, individuell Decisioune vun zum Beispill Visitten-Limitatiounen ze huelen. Besonnesch an dëse Strukturen awer missten d'Distanzreegele strikt agehale ginn.

Reesen an op wat een am Ausland oppasse muss

Enttäuscht ass d'Ministesch, datt eng Partie Länner eng restriktiv Vue op d'Corona-Situatioun zu Lëtzebuerg hunn a Rees-Restriktiounen ausschwätzen - et sollt zum Beispill op den Taux de Positivité gekuckt ginn, deen hei am Land konstant wier.

Onbedéngt sollt ee sech awer un d'Reegele vum "social distancing" halen, och am Ausland an och wann et keng Maskeflicht gëtt.

Suerg ëm sozial Mëssstänn

Besuergt huet sech d'Paulette Lenert iwwert d'sozial Mëssstänn gewisen, déi d'Pandemie opgedeckt hätt, notamment Infektiounen a Co-Locatiounen. Plazen also, wou Leit, déi keng Sécurité Sociale hunn a schwaarz schaffen, sech ustiechen an och keng Méiglechkeet hunn, eng Quarantän anzehalen.

Och aner Sujete goufen diskutéiert

D'Gesondheetsberuffer missten iwwerdeem komplett iwwerduecht a revaloriséiert ginn, un dësen Texter gëtt an der Villa Louvigny geschafft. Och den Aarbechtsgrupp iwwert de legale Cannabis-Verkaf géif weiderschaffen, eng Grondsazdiskussioun iwwert de juristesche Kader an der Regierung stéing awer nach aus.

Datt d'Paulette Lenert fir d'LSAP als Spëtzekandidatin an d'Walen 2023 geet, gouf net vun der Polit-Newcomerin niéiert oder ausgeschloss. D'Ministesch gesäit sech aktuell als Krise-Managerin, woubäi d'Politik u sech géif ze kuerz kommen, wat schued wier.

Background am Gespréich mat der Paulette Lenert

Eng kleng Prezisioun krute mer nach no der Emissioun. An de Caféen däerf een op Hockere setzen an och un der Bar mat der eenzeger Konditioun, datt 2 Meter Distanz tëscht de Plaze sinn. Verbueden ass just: stoen.

Resumé vun der Emissioun Background
D'Gesondheetsministesch war eis Invitée e Samschdeg an der Emissioun Background am Gespréich.

"Background am Gespréich" leeft ëmmer samschdes an der Mëttesstonn (vun 12 bis 13 Auer) op RTL Radio Lëtzebuerg an am Livestream um Internet respektiv an der App (Audio a Video). Dono ass d'Emissioun op RTL.LU zu all Ament nach eemol ze lauschteren oder ze kucken - an der Rubrik "Radio" bei Emissiounen "Background" wielen.