Mir hunn iwwert déi jéngst Entwécklungen an der Corona-Kris geschwat.

Déi zweet Corona-Well ass do. Am CHL sinn 18 vun 20 Better voll. Zwee Patiente sinn op der Intensivstatioun, 4 Plaze sinn hei virgesinn. Dat sot den Dr. Vic Arendt, Dokter aus dem CHL, an der Emissioun Background. Hie war ee vu 4 Invitéen.

10 bis 15 % vun de Patiente mussen duerch d'Reha, d'Hallschent elo huet manner wéi 50 Joer, mat kritesche Verleef. Net just eeler Leit kënne schlëmm krank ginn, ënnersträicht den Dr. Arendt.

An der 1. Well hate sech 60 Leit Personal am CHL ugestach. Elo wären et der bis ewell 10.

Den Dokter aus dem CHL proposéiert och, datt méi geziilt jonk Leit getest ginn, déi vill ënnerwee sinn an a Caféen a Bistroe ginn. Et gouf diskutéiert, ob méi Verbueter néideg wieren, ob d'Leit misste gezwonge ginn, sech ze testen, wa se méi ënnerwee sinn.

D'Fuerscher mengen, et misst een éischter opklären, un d'Eegeresponsabilitéit appelléieren. Den Dokter aus dem CHL ass do méi skeptesch. Et kéint een net ëmmer op de gesonde Mënscheverstand hoffen. An der Belsch gëtt zum Beispill recommandéiert an der Woch just mat 15 Leit Kontakt ze hunn.

Den Dr. Ulf Nehrbass, de Generaldirekter vum Luxembourg Institute of Health, seet tëscht 30 a 40% vun de positive Fäll géifen indirekt am Large Scale Testing erausfonnt ginn, well jo dann déi positiv Fäll, déi 15% ausmaachen, noverfollegt ginn.

Geschwënn soll méi geziilt getest ginn. All Stot an den 9 Gemengen, déi am meeschte betraff sinn, gëtt ugeschriwwen, fir getest ze ginn. Dat wieren 42.000 Stéit.

D'Fuerscher vu der Covid-19 -Task-Force hunn och e Freideg nei Projektioune publizéiert, déi gesinn eng manner staark Entwécklung vun der zweeter Well viraus, wéi nach virun Deeg gefaart. Trotzdeem géif et nach Deeg ginn, wou iwwer 100 nei Fäll entdeckt ginn. Wann d'Infektiounszuelen net zréckginn, kéinten Enn August oder Ugangs September Intensivbetter feelen.

De Background am Gespréich vum 25. Juli 2020

Aktuell stieche sech jo méi jonk Leit un am Verglach mat der éischter Well. Den Dr. Vic Arendt hofft, datt dowéinst och just 10% missten an de Spideeler behandelt ginn, net wéi bei der 1. Well 20%.

De Professer Paul Wilmes huet eng Tracing App eng zousätzlech Mesure genannt, déi ee kéint benotzen, fir nach besser d'Infektiounen nozeverfollgen. Dat géif de manuellen Tracing awer net ersetzen.

De Large Scale Testing dréit Friichten, soen d'Fuerscher. Klammen d'Zuelen, maachen och méi Leit mat. Mä mir hunn am Ufank e Feeler gemaach, well mer dat net gutt genuch erkläert hunn, huet den Dr. Nehrbass zouginn.

Misst en Test um Fluchhafen net obligatoresch ginn?, war och eng Fro, déi opgeworf gouf. Dat wär eng politesch Fro, mä sënnvoll wieren déi Tester, well do awer vill Fäll entdeckt ginn. De Virus wier jo och am Februar/Mäerz an d'Land eragedroe ginn.

U sech haten d'Fuerscher déi zweet Well eréischt nom Summer erwaart, sot den Alexander Skupin. Et wier ee vun aneren Zuelen ausgaangen. Gutt wär awer elo, datt déi zweet Well sech méi lues entwéckelt wéi viraus gesot.

Resumé vum "Background am Gespréich" vum 25. Juli 2020
Mir hu mam Vic Arendt, Ulf Nehrbass, Alexander Skupin a Paul Wilmes iwwert déi rezent Entwécklunge geschwat.

"Background am Gespréich" leeft ëmmer samschdes an der Mëttesstonn (vun 12 bis 13 Auer) op RTL Radio Lëtzebuerg an am Livestream um Internet respektiv an der App (Audio a Video). Dono ass d'Emissioun op RTL.LU zu all Ament nach eemol ze lauschteren oder ze kucken - an der Rubrik "Radio" bei Emissiounen "Background" wielen.