E Samschdeg war de Lëtzebuerger Ausseminister Jean Asselborn eisen Invité vun der Emissioun "Background am Gespréich".

D'Walen 2023 dierfte sech dem LSAP-Politiker no ëm d'Thema vun der Steiergerechtegkeet dréinen, ee Sujet, wou d'Parteie sech lo hir Iddie maachen, déi dann an der Chamber wäerten debattéiert ginn.

De Jean Asselborn iwwer Steieren

D'Regierung misst lo alles maachen, fir d'Effekter vun der Corona-Kris op d'Ekonomie ofzefiederen. Trotz dem annoncéierten Ofbau vu 560 Plaze bei ArcelorMittal misst dem Jean Asselborn no un dëser Zort vu Schwéierindustrie festgehale ginn.

De Jean Asselborn iwwer ArcelorMittal

Eng mënschlech, Lëtzebuerger Linn bei Flüchtlingspolitik

"Soulaang ech Politik maachen, kapituléieren ech kee Milimeter op där Linn, déi mer hunn: enger mënschlecher, Lëtzebuerger Linn bei der Flüchtlingspolitik.", dat sot de Jean Asselborn de Samschdeg de Mëtteg an der Emissioun Background. De Lëtzebuerger Ausseminister war eisen Invité.

Hie géif op der Säit vun der Mënschlechkeet stoen, op der Säit vun deenen, déi keng kal Schëller weisen. Et misst een eng europäesch an humanitär Léisung fir d'Flüchtlinge fannen.

Lëtzebuerg huet iwwerdeems zanter 2015 eng 11.600 Asyl-Demanden traitéiert, 4.500 Leit kruten eng international Protektioun accordéiert, wat 0,7% vun der Lëtzebuerger Populatioun ausmécht.

Kritik oder souguer d'Demissioun, déi d'ADR gefrot huet, géifen hien eigentlech net treffen. Hie weess och net, ob et eng Onéier ass, wann den ADR d'Demissioun freet, sou de Jean Asselborn.

Den Diplomatievertrieder huet weider erkläert, datt Lëtzebuerg am Ganze 15 Mënschen aus dem Camp Moria vu Lesbos wéilt ophuelen. Dat géif ee gutt packen.

Allgemeng sot de Lëtzebuerger Ausseminister – u seng Kritiker adresséiert - datt ee just déi Migrante géif ophuelen, déi ee misst ophuelen. Et wären der manner, wann all europäescht Land géif dat maachen, wat et soll, sou den Här Asselborn, dee géint eng europäesch "flexibel Solidaritéit" ass, wou all Land, dat géing maachen, wat et wéilt.

D'nächst Woch stellt d'EU-Kommissioun Von der Leyen jo en neie Migratiouns-Plang vir, wouvunner de Jean Asselborn hofft, datt en net "lettre morte" bleift.

Corona-Infektiounen a Grenzen

Däitschland kéint seng Arees-Konditioune fir Risikogebidder verschäerfen. De Jean Asselborn sot an der Emissioun Background, datt et Iwwerleeunge géif ginn, datt keen negativen Test méi géif duergoen, mä datt een d'office misst 5 Deeg a Quarantän, wann een déi däitsch Grenz passéiert.

Effektiv huet déi däitsch Regierung an d'Bundeslänner schonn de 27. August decidéiert, datt vum 1. Oktober un – wann een aus engem Risikogebitt kënnt - d'Quarantän fréistens no 5 Deeg mat engem Negativtest opgehuewe gëtt.

Lëtzebuerg riskéiert jo, mat senger héijer Zuel vun Neiinfektiounen an Däitschland nees als Risikogebitt aklasséiert ze ginn.

Nächst Walen - Alter ass kee Critère

2023 seet sech den LSAP-Politiker mat 16 Déngschtjoren op de Schëlleren iwwerdeem weider motivéiert, fir mat an d'Walen ze goen - den Alter wier kee Critère, fir Politik ze maachen.

De Jean Asselborn iwwer seng Zukunft
De Jean Asselborn iwwer Alteren an der Politik an d'CSV

Weider Themen

Den America-First-Prinzip vum US-President Trump huet de Jean Asselborn als ganz schwéiere Schlag géint internationaalt Recht a Politik bezeechent.

D'Solidargemeinschaft wier iwwerdeem den Einmal-Eins vun der EU, duerfir misst onbedéngt un dësem Prinzip festgehale ginn.

Background am Gespréich mam Jean Asselborn

"Background am Gespréich" leeft ëmmer samschdes an der Mëttesstonn (vun 12 bis 13 Auer) op RTL Radio Lëtzebuerg an am Livestream um Internet respektiv an der App (Audio a Video). Dono ass d'Emissioun op RTL.LU zu all Ament nach eemol ze lauschteren oder ze kucken - an der Rubrik "Radio" bei Emissiounen "Background" wielen.