E Samschdeg waren d'Paulette Lenert, den Alain Schmit an de Paul Junck eis Invitéë vun der Emissioun "Background am Gespréich".

Background am Gespréich / Resumé Claude Zeimetz

Et wär schonn an de leschten Méint 2 Mol sou gewiescht, dass ee gemengt hätt, déi 2. Well wär virun der Dier, dunn hätte sech d'Neiinfektiounen nees agependelt. Sou dass een natierlech elo trotz de Pronosticken net konnt wëssen, dass de Virus sech effektiv sou séier géing verbreeden, dat sot d'Gesondheetsministesch Paulette Lenert de Samschdeg de Mëtteg bei eis an der Emissioun Background.

Den aktuelle Klima, dass et vill reent, keng Sonn méi do ass, jee dass ee Richtung Wanter geet, wär och eng Erklärung fir dës rasant Hausse elo. Am Mäerz wären d'Konditioune ganz Anerer gewiescht, sou den Dr. Alain Schmit.

De Virus ass nees méi present an de Käpp vun de Leit

Solidaritéit vun der Populatioun mam Personal an de Spideeler, dat fuerdert iwwerdeems den Direkter vun der Spidolsfederatioun, de Paul Junck. D'Leit solle sech onbedéngt un d'Mesuren halen. Wa sech 85 Prozent gutt drun halen a 15 Prozent net drun halen, da kéint d'Situatioun entgleisen. Genee déi Léit misst ee mat enger verstäerkter Sensibilisatioun erreechen, dat hätt een och gemaach, sou d'Paulette Lenert. Laang Woche wär de Coronavirus e bëssen aus dem Augen, aus dem Sinn“ gewiescht, mëttlerweil géing awer all Mënsch nees eng Persoun a sengem Ëmfeld kennen, déi concernéiert wär, sou dass d'prise de conscience elo nees do wier, sou d'Ministesch.

Firwat elo eréischt méi streng Mesuren?

Firwat een net schonn e Samschdeg méi verschäerft Mesurë geholl hätt, erkläert d'Paulette Lenert mat Fakten. Et hätt een nach e Samschdeg an e Mëttwoch aner Tendenzen a Fakte viru sech gehat a well de Virus immens séier agéiert, misst een ëmmer Schratt fir Schratt evoluéieren.

Ginn et Enkpäss beim Spidolspersonal?

Et hätt een den Ament eng Personaldecken, déi duerch Isolementer a Quarantäne reduzéiert wär a wat d'Zuel vun den Dokteren ugeet, do wësse mer, dès le départ, dass mer der net souvill hunn an dofir gutt op dës mussen oppassen, sou de President vun der Dokteschassociatioun AMMD, den Dokter Alain Schmit. D'Ampleur vun dëser Well kéint sech zu enger anerer Hürd entwéckele wéi déi éischt.

Am Moment hätt een d'Situatioun an de Spideeler nach am Grëff, sou de Paul Junck.

Dat 1. Zil wär gewiescht, keng Vollbremsung an de Spideeler méi ze maache wéi an der 1. Well wéinst de Kollateralschied, déi entstane sinn, ebe well vill Leit net méi konnte behandelt ginn. An et wéilt een onbedéngt weiderhin dofir suergen, dass d'Offer héich wäert bleiwen.

Et gëtt keen zentraalt Covid-Spidol geschaaft

Eng Re-Organisatioun vun de Spideeler, wou d'Belaaschtung elo an an den nächste Wochen nach ganz héich wär, wär zu dësem Ablack net de richtege Wee, dat sot de President vun der Spidolsfederatioun zu der Iddi vun der AMMD, fir eng zentraliséiert Covid-Struktur, quasi ee Covid-Spidol opzebauen.

Éischt Opfankstrukture wéi d'CSAen, déi mer an der 1.Well haten, géingen eréischt zeréckkommen, wann den Terrain dat géing fuerderen. Stand haut wär dat awer nach net néideg. Et wier kee groussen Afflux vu Covid-Patitenten an de Cabineten. D'Iddi ass déi Kéier, fir d'Leit am normale Reseau weider ze betreien, sou d'Gesondheetsministesch.

Visitten a Spideeler an Altersheemer solle reduzéiert ginn

Am Prinzip ass d'Spidol e ganz sécheren Uert, mee natierlech keng Insel, sou de Paul Junck. D'Recommandatioune vun de Visitte missten dofir och elo nees adaptéiert gi mat der rezenter Hausse.

Och d'Ministesch huet een Appell gemaach, dass een d'Visitten an den Altersheemer a Spideeler soll reduzéieren. Mee och do missten d'Haiser kënne flexibel bleiwen, jee nodeems, wéi vill Case si hunn oder net. Et sinn 3 Haiser, déi méi akut betraff sinn den Ament, wou een am zweestellege Beräich vun Neiinfektioune wär.

Rekrutement vu Personal bleift e Knackpunkt

D'Personal ass natierlech och e Knackpunkt. D'Spideeler kéinten net einfach rekrutéieren, si hätten eng Enveloppe vun der CNS, un déi si sech missten halen. Do géing et eng Methodologie ginn, sou de Paul Junck an e Samschdeg wär eng entspriechend Reunioun, fir ze klären, wéi een de Problem kéint ugoen.

Et hätt een natierlech och elo eng Diskussioun vum Zonk gebrach an den Nopeschlänner, well een no der 1. Well massiv rekrutéiert hätt bei den Noperen. Och do misst ee sensibel sinn, sou d'Ministesch. Et ass de falsche Wee, nach zousätzlech Personal aus dem Ausland ze rekrutéieren, dat sot de President vun der AMMD Alain Schmit. Alternativ misst ee kucken, fir d'Personal intern ze re-organiséieren. Do wär e grousst Potential.

"Background am Gespréich" am Replay

"Background am Gespréich" leeft ëmmer samschdes an der Mëttesstonn (vun 12 bis 13 Auer) op RTL Radio Lëtzebuerg an am Livestream um Internet respektiv an der App (Audio a Video). Dono ass d'Emissioun op RTL.LU zu all Ament nach eemol ze lauschteren oder ze kucken - an der Rubrik "Radio" bei Emissiounen "Background" wielen.