E Samschdeg de Mëtteg war de Luxair-Generaldirekter eisen Invité an der Emissioun "Background am Gespréich".

An turbulenten Zäiten iwwerhëlt de Gilles Feith de Steierknëppel beim Grupp Luxair.

100 Millioune Verloscht, méi wéi 250.000 Annulatiounen. D'Joer 2020 ass fir d'Luxair staark vun der Pandemie markéiert.

An den Tripartite-Verhandlungen hätt een awer en Accord ficeléiert kritt, mat deem déi Duuschtstreck ze packe wier. Dat sot den neie Luxair-Generaldirekter Gilles Feith e Samschdeg an der Emissioun Background.

D'Klima an där Tripartite wier konstruktiv, awer natierlech ugespaant gewiescht.

Eng Firma misst awer a sou enger Situatioun och kucken, wat se bei sech selwer ka maachen, iert se bei de Steierzueler leeft.

Och ouni Corona hätt d'Luxair Problemer. Et misst investéiert ginn, d'Informatik am Cargo Center soll moderniséiert-, den Hangar soll nei gemaach ginn. Da muss och esou lues d'Flott erneiert ginn an do kéint d'Lëtzebuerger Airline no ville Joerzéngte Boeing de Réck dréien. Den Airbus A220 oder den Embraer 190/195 kéimen a Fro.

D'Luxair sicht no Nischen, fir Lëtzebuerg eng gutt Connectivitéit ze bréngen.

Larochelle, Toulon, Usedom a Bukarest sollen zum Beispill als Destinatiounen dobäi kommen.

Wann d'Luxair méi kleng gëtt, wäert et der Luxair méi schlecht goen, sou de Gilles Feith.

Datt no senger Arrivée Leit fort gaange sinn, dat wier net anormal, eng gewëss Mobilitéit sollt et och ginn.

Hie géing gäre mat de Leit schaffen, wier allerdéngs bëssen ongedëlleg a kéim gäre weider, ma an dësen Zäite wier dat och néideg.

Hie wéilt d'Luxair sozial a responsabel maachen, dat wier eent vu sengen Ziler, sou nach de Gillles Feith.

Background am Gespréich mam Gilles Feith

"Background am Gespréich" leeft ëmmer samschdes an der Mëttesstonn (vun 12 bis 13 Auer) op RTL Radio Lëtzebuerg an am Livestream um Internet respektiv an der App (Audio a Video). Dono ass d'Emissioun op RTL.LU zu all Ament nach eemol ze lauschteren oder ze kucken - an der Rubrik "Radio" bei Emissiounen "Background" wielen.