D'Gesondheetsministesch war eis Invitée e Samschdeg an der Emissioun Background am Gespréich.

D'Ziffere sinn net schéinzerieden, dat sot d'Gesondheetsministesch Paulette Lenert e Samschdeg de Mëtteg an eiser Emissioun Background am Gespréich. An de leschte 5 Deeg wieren d'Neiinfektiounen héich a volatil bliwwen. Dat, wat mer brauchen, wier awer eng kloer Tendenz no ënnen. Eng Tendenz mat enger richteger Perspektiv fir d'Spideeler wier elo awer net ze gesinn. Mëttelfristeg wier den aktuellen héije Stand vun den Infektiounszuelen net ze vertrieden. Mat sou engem héijen Positivitéitstaux wéi den Ament, kéint d'Situatioun séier ausuferen. Deprogrammatiounen an de Klinicken iwwert eng länger Zäit wieren net ze vertrieden. D'Spideeler sinn den Ament schonn an der Phas 4.

D'Paulette Lenert iwwert d'Tendenz

D'Situatioun hätt sech der LSAP-Politikerin no awer och kënnen anescht entwéckelen. Dowéinst hätt een ofgewaart. Nei Restriktioune wieren nämlech keng flott Situatioun fir eist Land. Dat dierft een och net à la légère huelen, sou d'Paulette Lenert. Déi lescht dräi Woche wier nach mat de Mesuren, déi geholl goufen, op eng Besserung gehofft ginn.

D'Paulette Lenert iwwer Pandemie-Middegkeet

Beschtefalls op Besuch verzichten

Wat den Detail vum partielle Lockdown ugeet, ass vun der Regierung net virgesinn, fir nach Ofstrécher un de proposéierte Mesuren ze maachen. Firwat muss d'Horesca zoumaachen, firwat ginn d'Kontakter Doheem nees reduzéiert?  De Virus wier sou diffus present an der Gesellschaft, datt d'Hallschent vun den Infektiounen net méi kënnen attribuéiert ginn, huet d'Paulette Lenert geäntwert.

D'Paulette Lenert iwwert d'Chrëschtdeeg

Iwwerall do, wou Interaktioune sinn, hätt een de Risiko sech unzestiechen. Besonnesch do, wou een ouni Mask zesummesëtzt. Et wier elo de Moment, fir Besuch sinn ze loossen; alles, wat een un Echangen evitéiere kann.
Och fir Chrëschtdag misst ee sech drop preparéieren, fir zu manner zesummenzekommen. Wéi eng Restriktiounen deen Ament genee en place sinn, konnt d'Paulette Lenert net soen.

E Reproche aus dem Ausland, datt een net scho méi streng Mesuren agefouert hätt, hätt een net kritt.

Efforten am ëffentlechen Transport a beim Contact Tracing

Vill Kritik gëtt et un der Situatioun an de Busser an Zich, déi nach ëmmer relativ voll wieren. Am ëffentlechen Transport wieren Efforte gemaach ginn, sou d'Ministesch. Den Ament géif och nach gekuckt ginn, fir zousätzlech Chaufferen ze fannen. Zousätzlecht Personal gouf och fir den Tracing gesicht. D'Iwwerlaaschtung wier 1-2 Wochen do gewiescht. Den Ament wier een awer nees bei engem Delai vun 1-3 Deeg, wou ee sech vun der Contact-Tracing-Ekipp bei engem no sengem positive Corona-Test mellt. Eng Corona-App ass fir d'Gesondheetsministesch nach ëmmer keng Léisung. D'Informatioun wier ze onkomplett. D'Zil wier, datt d'Leit d'Gestes barrières anhalen.

Éischt Liwwerung mat 45.000 Vaccinen an e puer Wochen

Eng éischt Liwwerung vu 45.000 Vaccine gëtt fir Mëtt Dezember erwaart. Dëst ass een Deel vun der europäescher Commande. D'EU-Kommissioun huet bis ewell 3 Accorde mat Pharmakonzerner ofgeschloss. Anerer kéinten nokommen. Lëtzebuerg huet keng eege Commandë gemaach. Der Gesondheetsministesch ass dovunner auszegoen, datt d'Vaccine virun Enn des Joers vun der europäescher Medikamentenagence fir den europäeschen Marché zougelooss ginn. D'Impfstrategie, wien als éischt geimpft soll ginn, géif dovunner ofhänken, wéi een Impfstoff finalement geliwwert gëtt. An den nächste Woche géif een hei an déi lescht Ligne droite goen.

D'Paulette Lenert iwwert déi verschidde Vaccinen

3.000 Leit kruten iwwerdeems dëser Deeg eng Invitatioun fir de serologeschen Antikierper-Test, wou ee sech kann a 6 Zentere Blutt huele loossen. 400 Rendez-vousen goufe bis ewell scho geholl.

Background am Gespréich mam Paulette Lenert
Mir wëllen eng kloer Tendenz no ënne gesinn
D'Gesondheetsministesch Paulette Lenert war e Samschdeg Invitée an der Emissioun Background am Gespréich.

"Background am Gespréich" leeft ëmmer samschdes an der Mëttesstonn (vun 12 bis 13 Auer) op RTL Radio Lëtzebuerg an am Livestream um Internet respektiv an der App (Audio a Video). Dono ass d'Emissioun op RTL.LU zu all Ament nach eemol ze lauschteren oder ze kucken - an der Rubrik "Radio" bei Emissiounen "Background" wielen.