De Logementsminister war e Samschdeg eisen Invité an der Emissioun Background am Gespréich.

Coronavirus: Henri Kox dréit Mesurë mat

De grénge Minister Henri Kox dréit d'Decisioun mat fir verschidde Covid-Mesurë méi labber ze maachen, an anerer ze verschäerfen. D'Restriktiounen am neie Covid-Gesetz, dat e Freideg an der Chamber gestëmmt gouf, bleiwe streng, sot den Henri Kox an der Emissioun Background am Gespréich. Net nëmme vun der nationaler Oppositioun war den neie Mesure-Pak kritiséiert ginn, mä et koum och Kritik aus dem Ausland, aus Däitschland, zum Beispill. Zu Lëtzebuerg wär een net méi virsiichteg genuch.

Logement: Baulücke solle bebaut ginn

De Logementsminister wëll virop cibléiert, do ëffentlech an abordabel Wunnenge bauen, wou nach Plaz ass, op de sougenannte Baulücken. 2.900 Hektar Bauland stéinge fräi, nëmme besëtzt de Staat dovun knapp11 Prozent. Mam neie Spezialfong wëll de Staat offensiv Land kafen, esou den Henri Kox. Dräi grouss Projeten huet den Henri Kox an deem Kader genannt: Elmen, Wolz an Diddeleng. Do hätt een 3.000 Wunnenge geschaaft.

Jiddereen ee Véierel: dat ass d'Formel mat där de Logementsminister Henri Kox d'Wunnengsnout an de Grëff kréie wëll. De Staat, d'Gemengenm d'Associatiounen an d'Fondatioune sollen hei zesummeschaffen, d'SNHBM an de Fonds du Logement virop. Op hire Waardelëschte stéingen 3.000 bis 4.000 Leit. Bei der Locatioun gëtt et déi gréissten Necessitéit fir opzehuelen, esou den Henri Kox.

Fir méi Bauland ze mobiliséieren an Wunnengen ze schafen, kéint een d'Baulücken besteieren. Den Taux wollt den Minister net chiffréieren. Ma fir der Spekulatioun um Marché bäizekommen, géif eng Tax eleng net duergoen.

Police: Zanter Ufank vu Pandemie gouf et 5.000 Protokoller

Den Henri Kox ass och Policeminister. Zanter dem Ufank vun der Pandemie huet d'Police 17.000 Kontrolle gemaach a bal 5.000 Protokoller geschriwwen. Am meeschte géif aktuell gepréift ginn, ob d'Leit sech un de Couvre-Feu halen.

Background am Gespréich mam Henri Kox

"Background am Gespréich" leeft ëmmer samschdes an der Mëttesstonn (vun 12 bis 13 Auer) op RTL Radio Lëtzebuerg an am Livestream um Internet respektiv an der App (Audio a Video). Dono ass d'Emissioun op RTL.LU zu all Ament nach eemol ze lauschteren oder ze kucken - an der Rubrik "Radio" bei Emissiounen "Background" wielen.