De President vun der "LaLux" war e Samschdeg den Invité vun der Emissioun "Background am Gespréich".

De President vun der Assurancëgesellschaft LaLux (fréier La Luxembourgeoise), de Pit Hentgen, sot e Samschdeg de Mëtteg am Background hei op RTL, datt a Frankräich d'Couverture fir "fermeture administrative" ugebuede gëtt. Zu Lëtzebuerg awer net. Hei am Land wier just d'"perte d'exploitation" virgesinn, déi awer just am Zesummenhang mat Bränn oder Stierm Garantië ginn. Et goufe keng Primme bezuelt, keng Réckversécherunge gemaach an et gouf keng Mutalisatioun geschaaft, wou nom Zoufallsprinzip betraffe Betriber Hëllef kréien. An der aktueller Kris wier „jiddereen" betraff, also kéinten dem Pit Hentgen no d'Assurancen net fir déi Verloschter duerch d'Pandemie opkommen. Souwisou wier déi Garantie vu Säite vu Caféen a Restauranten och quasi ni gefrot ginn.

De President vu LaLux sot awer, den Assurancësecteur wier „zanter enger Zäitchen" amgaangen, zesumme mat der Regierung ze „iwwerleeën", wat een an Zukunft kéint maachen a wou d'Regierung den Assureuren och géing de Réck stäipen. Hei kéinte weider Garantië virgesi ginn, déi géinge "souscribéiert" ginn. Dat wier am Zesummenhang bei den Iwwerschwemmunge geschitt.

Trotzdeem wier elo scho probéiert ginn, de Betriber aus dem Horeca-Secteur, déi wéinst der aktueller Situatioun a Schwieregkeete gerode sinn, ze hëllefen, sou de Pit Hentgen weider. Ënnert anerem mat Delaie bei de Payementer oder mat Upassunge vun de Kontrakter. Hien huet och drop higewisen, datt d'Assurancen ee groussen Deel vum Staatsemprunt finanzéiert: 500 Milliounen Euro mat negativem Zënssaz.

D'Kris wäert nach daueren

D'Gestioun vun der sanitärer Kris wier dem President vun der LaLux no fir den Assurancësecteur bis ewell gutt verlaf. Ausser den Home office wier een net wierklech vun de Restriktioune getraff. Wat ee bemierkt hätt, wier, datt et manner Autosaccidenter goufen, doduercher, datt et manner Deplacementer gouf. Mee als Krise-Gewënner kéint een dem Pit Hentgen no d'Assurancen awer net gesinn, well de Secteur wier immens volatil.

Fir aus der Kris erauszekommen, gesäit de President vu LaLux de Vaccin als den Haaptwee. „Mee awer wäert eis d'Kris nach eng Zäit begleeden", esou de Pit Hensgen. Et wier ee grad am Ralenti, well déi aktuell Situatioun keng Innovatioune fuerdere géing. Hien huet zum Beispill op d'Problematik vum autonome Fueren higewisen. D'Fro, wie fir eventuell Accidenter opkënnt, géing den Ament net méi diskutéiert ginn. Nei Risike goufen deemno vun der Pandemie e wéineg un de Rand gedréckt.

E weidere Sujet am Background: D'Liewensversécherung, mat där och auslännesch Residentë kéinte versichen, Steieren ze spueren. Bei der LaLux wier dat net de Fall, well d'Clienten all misste Resident zu Lëtzebuerg sinn. Zanter ronn 5 Joer géing et och den Austausch vun den Informatioune ginn, sou de Pit Hentgen. Et wier awer richteg, datt eng ganz Rei spezialiséiert Acteuren zu Lëtzebuerg enger internationaler Clientèle mat Liewensversécherungen "e bëssen hëllefen, d'Successioun besser z'organiséieren".

Background am Gespréich mam Pit Hentgen

"Background am Gespréich" leeft ëmmer samschdes an der Mëttesstonn (vun 12 bis 13 Auer) op RTL Radio Lëtzebuerg an am Livestream um Internet respektiv an der App (Audio a Video). Dono ass d'Emissioun op RTL.LU an am RTL Play zu all Ament nach eemol ze lauschteren oder ze kucken - an der Rubrik "Radio" bei Emissiounen "Background" wielen.