D’CSV-Fraktiounscheffin an den LSAP-Vizepremier waren d'Invitéë vun der Emissioun "Background am Gespréich".

Resumé Background am Gespréich / Reportage Max Schmitz

Zu Lëtzebuerg géif de Leit keng Illusioune gemaach ginn, dat sot den LSAP-Vizepremier Dan Kersch e Samschdeg de Mëtteg hei op der Antenn. Hie war Invité am Background, am Face-à-Face mat der CSV-Fraktiounscheffin Martine Hansen. Rieds goung iwwert e Stufeplang oder eng Laangzäitstrategie an der Lutte géint d'Covid-19-Pandemie. An Irland wier et e Stufeplang ginn, ma dee wier komplett zesummegefall, sou den Dan Kersch. Et géifen ze vill Imprevue ginn, zum Beispill wéinst Mutatioune vum Virus, sou den LSAP-Minister. D'Oppositiounspolitikerin Martine Hansen hat méi Previsibilitéit gefuerdert, och wat d'Hëllefe fir d'Betriber ugeet.

"Deen eenzegen, dee bis elo eng Iddi bruecht huet, war ech selwer", sot iwwerdeems den Dan Kersch, am Zesummenhang mat der Hëllef fir Independanten an der rezenter Kritik vum Jonken Handwierk. Déi Iddi wier déi vun enger Mutualitéit, iwwert déi d'Betriber sech nom Solidaritéitsprinzip géigesäiteg kënnen hëllefen a wou de Staat och kéint hëllefen. Seng Diere géifen opstoen, fir doriwwer ze schwätzen. Et misst awer vu Fall zu Fall differenzéiert ginn.

Vill Restauranten a Caféë wiere gutt organiséiert a géifen och vun der Horesca ënnerstëtzt ginn, fir Hëllefen unzefroen, ma eenzeler géifen do net sou gutt eens ginn an do misst d'Regierung nach Efforte maachen, sou den Dan Kersch. Wann ee keng Demande géif maachen, kéint een natierlech keng Hëllef kréien. Déi gréissten Hëllef wier natierlech, wann dës Betriber nees kéinten opmaachen, ma do kéint een näischt verspriechen. D'Martine Hansen war der Meenung, datt een dëse Betriber awer misst Perspektive ginn, och wann een näischt kéint verspriechen.

Hien hätt vu ganz wéinege Fäll héiere vu Persounen, déi en Teletravail refuséiert kruten, ma vill méi vu Leit, déi net méi wollte vun Doheem schaffen. Och wann an de Covid-Gesetzer näischt iwwer Teleaarbecht géif stoen, géif et eng Obligatioun gi fir de Patron, alles ze maachen, fir säi Salarié ze schützen an dozou géing gehéieren, Teletravail ze maachen, wann et méiglech ass, en Zwang géif et awer net ginn.
Wat d'Impfcampagne ugeet begréisst d'CSV, datt déi 2. Dosis gehale gëtt. Allerdéngs wier et wichteg fir de Leit e bëssen Hoffnung ze ginn andeems een e graffen Zäitplang an eng Reiefolge géif ginn, wéini wie geimpft gëtt, sot d'Martine Hansen. Dat wier net méiglech, huet den Dan Kersch reagéiert, well een net wéisst wéini een d'Impfdose géif kréien.

An de Chamberkommissioune géif ëmmer konstruktiv zesumme geschafft ginn an Iddie vun der Oppositioun géifen och an Texter mat afléissen, ma dann an der Plenière wier dann op ee mol grouss Oppositioun gemaach ginn, sou den Dan Kersch. Hie géif déi Strategie vun der CSV net verstoen. D'Martine Hansen huet drop higewisen, datt Motiounen an der Chamber-Plenière awer vun der Majoritéit gréisstendeels géife verworf ginn.

Backgound am Gespréich: Martine Hansen an Dan Kersch

"Background am Gespréich" leeft ëmmer samschdes an der Mëttesstonn (vun 12 bis 13 Auer) op RTL Radio Lëtzebuerg an am Livestream um Internet respektiv an der App (Audio a Video). Dono ass d'Emissioun op RTL.LU an am RTL Play zu all Ament nach eemol ze lauschteren oder ze kucken - an der Rubrik "Radio" bei Emissiounen "Background" wielen.