Den Educatiounsminister war e Samschdeg den Invité an der Emission "Background am Gespréich".

"De Virus ass méi schnell ginn, dofir musse mir och méi schnell ginn, fir en ze detektéieren an en aus de Schoulen erauszekréien." Dat sot den Educatiounsminister Claude Meisch e Samschdeg de Mëtteg an der Emissioun Background am Gespréich. Nach ass net ofschléissend gekläert, wéi vill déi brittesch Virus-Mutatioun an den 379 Covid-Infektiounen d'lescht Woch ausmécht. De Staatslabo wier nach amgaangen, seng Analysen ze maachen. D'Tendenz vun der leschter Woch géif awer kloer weisen, datt d'Evolutioun kloer no uewe geet. Et hätt een alt 5,6 oder 7 Fäll a kuerzer Zäit an enger Klass gehat. Dës Kéier wieren et déi Jonk, déi sech virun den Erwuessenen ustiechen, an dat géif riskéieren, zum Ufank vun enger drëtter Well ze féieren. Dat wier eng aner Situatioun wéi am Hierscht. Duerfir misst een elo reagéieren.

Dozou gehéiert nieft enger méi strikter Maskeflicht, datt méi getest gëtt. Déi ganz Schoulcommunautéit gëtt nach emol an de Large Scale Testing geruff an déi mobil Ekippe solle verstäerkt do op den Terrain, wou vill Infektioune waren.

Schnelltester fir all Klass

Aktuell géif och zesumme mat der Santé e Konzept vu Schnelltester ausgeschafft ginn, fir e permanente Bléck op de Virus an all de Klassen ze hunn. An deenen ieweschte Klasse vun der Grondschoul an och an de Lycéeë sollen d'Schüler sech op dee Wee selwer kënnen testen. Verschidden Typpe vu Schnelltester kéimen do a Fro, et géif awer warscheinlech a Richtung vu Spaut-Tester goen, fir déi kee medezinescht Personal néideg ass, huet de Minister e Samschdeg präziséiert. Den Test géif an der Schoul gemaach ginn, mam Accord vun den Eltere fir mannerjäreg Schüler, an dat a ganz reegelméissegen Ofstänn. Déi Tester missten an all Schoul an an all Klass an den Asaz kommen, huet de Claude Meisch betount. D'Detailer sinn amgaange gekläert ze ginn.

Kee Laxismus méi bei der Quarantän

Donieft hätt ee gemierkt, datt duerch déi mobil Ekippen d'Participatioun vun de Leit, déi sech testen loossen, geklomme wier. E Problem war, datt 30 bis 40% vun de Schüler oder Enseignantë sech no enger Quarantän net teste gelooss hunn. Do géif ee sech elo déi gesetzlech Basis ginn, fir en negativ Testresultat kënnen ze verlaangen. Hei hätt sech e gewëssene Laxismus breetgemaach, mee dee kéint een net toleréieren.

Kandgerecht Schoulhalen

D'Zil ass a bleift, sou de Minister, fir kandgerecht Schoul ze halen. Ënnert anerem och a puncto Masken. No der Fuesent gëtt jo eng allgemeng Maskeflicht an der Grondschoul, mat Ausnam vum Cycle 1 agefouert.

Claude Meisch op der Pressekonferenz e Freideg: "“Mir wäerten iwwerall eng Maskeflicht mussen aféieren, dat an de Schoulen, am Lycée hate mer se quasi, och am Cours. Mä och an der Grondschoul, wärend dem Cours hält ee seng Mask an Zukunft un. Och an der Maison Relais, hält ee seng Mask an Zukunft un. Dat ausser fir Kanner aus dem Cycle 1, oder
och emol fir Kanner aus de Kompetenzzenteren”.

Déi lescht Woche ware jo verstäerkt Covid-Fäll an de Grondschoulen opgedaucht. D'Schoule sollen och e Stock u chirurgesche Maske kréie fir déi Schüler, deenen hir Mask manifestement ze al ass oder schlecht sëtzt. D'Kanner sollen awer weiderhin och selwer gebitzte Maske kënnen undoen. Et sollt een do och net iwwerdreiwen. De klenge Kanner géif ee mat der neier Mesure scho vill zoumudden. Duerfir wier et ëmsou méi wichteg, datt ee sech Zäit hëlt, fir nozefroen, wéi et hinne geet.

Den Educatiounsminister hält et zu dësem Zäitpunkt fir falsch an och net kandgerecht, fir generell d'Kantinnen am ganze Land zouzemaachen, de Bustransport komplett ze stoppen an d'Schoulen a Maison-relaisen iwwerall zouzemaachen. Duerfir sinn am neie Stufemodell regional Mesurë pro Schoul, Gemeng oder Kanton virgesinn. Wéini de comité de pilotage decidéiert, datt e Gebai komplett a Quarantän gesat gëtt oder an nomëttes muss an den Homeschooling wiesselen, géif vun enger ganzer Rei Facteuren ofhänken. Strikt Indicateure wiere schwéier ze nennen. D'Situatioune wiere sou ënnerschiddlech, datt d'Fachleit dat vu Fall zu Fall misste kucken.

Fir d'Enseignanten ass eng weider Commande fir 30.000 FFP2-Masken eraus. Jiddereen, deen gär mat sou enger Mask enseignéiert, soll eng kréien. D'CO2-Miessapparater, déi am Dezember annoncéiert goufen, sollen elo no der Vakanz an de Grondschoulen installéiert ginn. Am initiale Planning sollten d'Gebaier all bis d'Fuesent ekipéiert sinn.
Anescht wéi beim Ofschlossexame sinn den Ament keng Adaptatioune bei den Epreuves communes am Cycle 4.2. fir an de Secondaire virgesinn, sou de Minister e Samschdeg am Background. Wann de Virus et zouléisst, wier et falsch, dës Epreuven net z'organiséieren. Se géifen nämlech wichteg zousätzlech Informatioune liwweren. Et misst een hei och den Drock raushuelen aus der Diskussioun, fënnt de Claude Meisch.

Background am Gespréich mam Claude Meisch

Psychologe ginn um Terrain gebraucht

Den Educatiounsministère wëll am zweete Semester verstäerkt d'Wuelbefanne vun de Kanner an de Mëttelpunkt stellen. Ville Jonke géif et no engem Joer Pandemie net gutt goen. Duerfir war et den Appell un d'Enseignanten, verstäerkt d'Gespréich mat hinnen ze sichen. Wann et méiglech ass, sollen och d'Psychologen, déi notamment Enn dës Joer mam Tracing chargéiert goufen, nees méi an hirem eigentlechen Aarbechtsëmfeld schaffen. Et ass do, wou se gebraucht géife ginn.

Resumé vum "Background am Gespréich" mam Claude Meisch
D'Zil ass a bleift, fir kandgerecht Schoul ze halen, sot den Educatiounsminister e Samschdeg am Interview.

"Background am Gespréich" leeft ëmmer samschdes an der Mëttesstonn (vun 12 bis 13 Auer) op RTL Radio Lëtzebuerg an am Livestream um Internet respektiv an der App (Audio a Video). Dono ass d'Emissioun op RTL.LU an am RTL Play zu all Ament nach eemol ze lauschteren oder ze kucken - an der Rubrik "Radio" bei Emissiounen "Background" wielen.