Den Energie- a Landesplanungsminister war e Samschdeg Invité am Background.

E Méindeg hu mir endlech kloer Pläng, wou gebaut soll ginn, fir ze wunnen, fir Aktivitéit ze maachen, fir d'Mobilitéit a gläichzäiteg ass da kloer, wou mir d'Natur an d'Landschaft protegéieren. Dat sot den Invité am Background, de Minister fir d'Landesplanung Claude Turmes. Den 1. Mäerz trieden nämlech déi 4 Plans-sectoriellen a Kraaft. Virun 18 Joer war d'Iddi ënnert dem deemolege CSV-Minister Michel Wolter entstanen.

De Prinzip ass, dass net am Gréngs soll gebaut ginn. Et sollen nei Wunnengen an Industriezonen op scho genotzten Terrainen entstoen. Op Industriefrichen zum Beispill. Déi misst een dann och seriö sanéieren. Evident ass dat net, ma d'Ëmweltverwaltung wär professionell opgestallt, esou de Claude Turmes.

D'Gemengen hu bei der Landesplanung eng eminent wichteg Roll. Si sollen hëllefen, fir méi abordabele Wunnraum ze schafen. De Staat hëlleft awer net ouni Konditiounen. Wann de Staat Subside gëtt fir Wunnengen, da mussen déi concernéiert Wunnengen och fir ëmmer à coût modéré bleiwen, huet de Claude Turmes erkläert, deen ze bedenke ginn huet, dass hei am Land bis haut just 3 Prozent vum Wunnraum ëffentlech sinn. An Holland wären et 30 Prozent, zu Wien an Éisträich sinn et 50 Prozent. Hei misst Lëtzebuerg Efforte maachen. Déi héich Präisser um privaten Wunnengsmaart wären e Problem bis wäit an d'Mëtt vun der Gesellschaft.

Et wär Gëft fir de sozialen Zesummenhalt, wa verschidde méi räich Gemenge sech eventuell géife do virdrun drécken, och soziale Wunnraum ze schafen, sot de Minister op Nofro hin. De Gemengesyndikat Syvicol wär e wichtege Partner vun der Regierung.

Déi Gréng si bekannt dofir, fir kloer Iddien ze vertrieden, wat d'Ëmwelt an den Naturschutz ugeet. Et wéilt een awer kengem virschreiwen, wéi e soll wunnen, ob an engem Haus um Land oder am urbane Raum an engem Appartement. Allerdéngs misste mir all zesumme kucken, dass eis Quartieren intelligent opgebaut sinn. De Claude Turmes hätt gär Quartieren, an deene vill Gréngs ass, an an deenen den Auto definitiv keng Prioritéit méi huet.

De Claude Turmes huet d'CO2-Steier verdeedegt.

Fir déi Leit, déi dës Steier am mannste verkraaften, géif ëmmerhin eng sozial Ëmverdeelung gemaach ginn. Mam Rescht vun de Sue géife Verbesserungen am Sënn vun der Nohaltegkeet subventionéiert ginn. Eng Fassade ouni Styropor. Eng nohalteg Heizung respektiv en Elektroauto.

D'EU misst mat den USA a mat Groussbritannien zesummeschaffen, wann et ëm d'Zouloosse vun Covid-Impfstoffer geet. Där Meenung ass de grénge Minister a fréieren EU-Deputéierte Claude Turmes. Hien hätt och der aktueller grénger Deputéierter Tilly Metz un d'Häerz geluecht, an deem Sënn Drock op d'Kommissioun ze maachen. Aktuell géing zum Beispill den Impfstoff vun Johnson&Johnson an den USA geneemegt an da géif et nach 3-4 Wochen daueren, bis en och hei zougelooss géif ginn, dat wier net gutt. D'Impf-Strategie vun der EU géif leider net sou gutt lafen, wéi se kéint.

Background am Gespréich: Claude Turmes

"Background am Gespréich" leeft ëmmer samschdes an der Mëttesstonn (vun 12 bis 13 Auer) op RTL Radio Lëtzebuerg an am Livestream um Internet respektiv an der App (Audio a Video). Dono ass d'Emissioun op RTL.LU an am RTL Play zu all Ament nach eemol ze lauschteren oder ze kucken - an der Rubrik "Radio" bei Emissiounen "Background" wielen.