De President vun der Chambre de Commerce war eisen Invité an der Emissioun "Background am Gespréich".

Dem fréieren CSV-Minister no misst d'Impfcampagne elo endlech méi séier virugoen. De Bléck op aner Länner géing weisen, datt et méiglech ass, sou de Luc Frieden haut am Background hei op RTL. Hien huet betount et wier richteg gewiescht, datt d'EU d'Bestellungen zesumme gemaach huet. Et kéint ee sech awer d'Fro stellen, ob déi d'Länner net och hätte sollen eenzel kënne bestellen. An datt d’EU ewéi aner Staate keng Vaccinen exportéiere soll, wier dem Luc Frieden no och ganz an der Rei.  D’fréizäiteg Impfunge bei den Hôpitaux Robert Schumann huet de Luc Frieden esou kommentéiert: "Wa Reegelen do sinn, muss een sech dorun halen". De fréieren CSV-Minister, Affekot an aktuell President vun der Chambre de Commerce a vun der BIL sot d'Impfstrategie an d'Prioriséierung wier sënnvoll an et wier och net esou, datt Leit op wichtege Positiounen allgemeng géinge mengen, si kéinte sech virdrécken.

Zur Rechtfäerdegung vum Jean-Louis Schiltz wollt sech den Luc Frieden net äusseren. Datt d’Hopitaux Robert Schumann en plus dacks Opträg un d‘Etude vum Jean-Louis Schiltz géinge ginn wier per se keen Interessikonflikt, sou de Luc Frieden.

"Mir mussen ëmmer kucken, dass mer ënnert deene Beschte sinn", esou den Luc Frieden weider. Dat wier och an der Ekonomie esou gewiescht. De Schlëssel fir datt Ekonomie erëm richteg dréint, wier eng séier Impfcampagne an datt d'Entreprisen erëm normal kënne funktionéieren. An duerno misst een och dee richtege Kader offréieren, ënnert anerem steierlech.

E weidere Sujet am Background dëse Samschdeg war d’Zuknft vun der CSV. Hie géing net um CSV Kongress deelhuelen wou de 24. Abrëll iwwert de Parteipresident ofgestëmmt gëtt, sou de Luc Frieden. Hie wéilt sech als President vun der Chambre de Commerce gär eraushalen. Allerdéngs sot en et wier a kenger Partei „eng anormal Situatioun“, wann méi ewéi ee Kandidat sech presentéieren.

Hie selwer, de Luc Frieden, huet op jidder Fall net Wëlles e Comeback an d’Politik ze maachen. Un e Comeback vum Jean-Claude Juncker gleeft hien och net.

Background am Gespréich: Luc Frieden

"Background am Gespréich" leeft ëmmer samschdes an der Mëttesstonn (vun 12 bis 13 Auer) op RTL Radio Lëtzebuerg an am Livestream um Internet respektiv an der App (Audio a Video). Dono ass d'Emissioun op RTL.LU an am RTL Play zu all Ament nach eemol ze lauschteren oder ze kucken - an der Rubrik "Radio" bei Emissiounen "Background" wielen.