D'Presidentin vum Mouveco an de grénge Vizepremier waren e Samschdeg eis Invitéen an der Emissioun "Background am Gespréich".

De komplette Background am Audio

''Mir si vun der gesamter Regierung enttäuscht, och vun de Gréngen, wat den Engagement fir d'Ecologie ugeet'', dat sot d'Presidentin vum Mouvement Ecologique Blanche Weber e Samschdeg de Mëtteg an eiser Emissioun Background am Gespréich.

''Mir, déi Gréng, stinn net nëmme fir de Klimaschutz, mä fir e ganze Programm, dee Klimaschutz, Wirtschaft a Gesellschaft connectéiert'', huet den zweeten Invité den Transport- an Infrastrukturminister François Bausch gekontert.

D'Changementer, déi et brauch, fir déi noutwenneg Klimaziler z'areechen, wären allerdéngs eng Herkules-Aufgab, gëtt de Minister zou. Dofir misst een d'Leit positiv motivéieren an hinnen Ausweeër weisen. Hie selwer seet vu sech, hie géif zum Beispill keng Politik géint den Auto maachen, mä fir eng aner Mobilitéit. D'Blanche Weber war d'Accord a sot et misst een de Leit weisen, dass se och Liewensqualitéit gewannen, wann d'Natur protegéiert gëtt.

Hir feelt awer den Discours, jo och de politesche Sträit, bannent der Regierung, fir zesumme fir Léisungen ze sichen. Kompromësser agoen, ass gutt a wichteg, äntwert de François Bausch.

An där 3er-Koalitioun hätt déi gréng Partei hir Prinzippien awer aus den Aen verluer, esou de Reproche vun der Presidentin vum Mouveco. Am Dossier Google zum Beispill, géifen déi Gréng an der Regierung sech net genuch fir de méigleche Waasserverbrauch vum US-amerikanesche Konzern interesséieren.

D’Primme fir en Elektro- oder Hybridauto gi verlängert

Déi aktuell lafe jo Enn des Mounts aus. Et kommen awer Ännerungen, sot de François Bausch. Et kënnt eng sozial Staffelung, kombinéiert mam Verbrauch. Nächste Mëttwoch soll déi nei Propos am Regierungsrot ugeholl ginn.

Déi 8.000 Euro Maximum bleiwen, mä déi gëtt et net méi fir jiddereen. Si gi gestaffelt.

De Plug-In Hybrid gëtt och nach subventionéiert, mä et kënnt eng Transitiounsphas. An Zukunft soll just nach 100% Elektromobilitéit gefërdert ginn.

D’Primm vun 8.000 Euro soll een och net méi onbedéngt musse virstrecken. Och do géif eng sozial Léisung kommen, sou de grénge Vizepremier.

Bei de Primme fir de Vëlo soll sech kaum eppes änneren.

"Background am Gespréich" leeft ëmmer samschdes an der Mëttesstonn (vun 12 bis 13 Auer) op RTL Radio Lëtzebuerg an am Livestream um Internet respektiv an der App (Audio a Video). Dono ass d'Emissioun op RTL.LU an am RTL Play zu all Ament nach eemol ze lauschteren oder ze kucken - an der Rubrik "Radio" bei Emissiounen "Background" wielen.