D'Buergermeeschtere vu Bettenduerf, Dikrech an Ettelbréck waren e Samschdeg eis Invitéen an der Emissioun "Background am Gespréich".

Déi geplangte Fusioun vun de 5 Nordstadgemenge war Thema am Background am Gespréich. Invitéë waren  d'Buergermeeschtere vu Bettenduerf, Dikrech an Ettelbréck.

De Background am Resumé (Nordstad)
D'Buergermeeschtere vu Bettenduerf, Dikrech an Ettelbréck waren e Samschdeg eis Invitéen an der Emissioun "Background am Gespréich".

An enger nächster Etapp soll de Projet de loi fir d'Gemengefusioun ausgeschafft ginn. Nach wier et ze fréi, fir elo soen ze kënnen, wou wéi eng Infrastrukturen, Bauprojeten no der Fusioun implantéiert ginn. Wat realiséiert kéint ginn, géif och vun de Suen ofhänken, déi ee fir d'Fusioun kréie géif

D'Nordstadgemengen hätte gär 5.000 Euro pro Awunner vum Inneministère, amplaz den 2.500, déi de Ministère u sech derfir virgesäit. Déi Fuerderung wier absolut gerechtfäerdegt, sou d’Bettenduerfer Buergermeeschter Pascale Hansen. Do géif een och ferm bleiwen. Déi 3 Politiker hunn an der Emissioun bedauert, datt d'Biertrenger Schlass net an ëffentlecher Hand bleift. Et hätt ee sécher sënnvoll gefëllt an de Patrimoine wier fir jiddereen zougänglech bliwwen. De Syndikat vun den Nordstadgemenge gouf vun engem Privatmann iwwerbueden.

Dikrech soll "Autofräi"-Stad ginn

Den 19. Mee gëtt eng Mobilitéitsetüd iwwert d'Nordstad presentéiert, déi duerno mat de Bierger a Biergerinne soll diskutéiert ginn. Dikrech plangt e Konzept, fir eng autofräi Stad ze ginn, huet de Claude Haagen annoncéiert. Et géif een zwar net vun haut op muer den Hiewel ëmleeën, mä lues a lues op de Wee goen mat Opfangparkingen, fir d'Autoen aus der Uertschaft erauszeloossen.

Ee konkrete Projet, de regionale CGDIS ass um Fridhaff geplangt. Do ass och Plaz fir Co-Working-Plazen a Start-uppen, huet de Buergermeeschter vun Dikrech Claude Haagen erkläert.

Keng Zentraliséierung, ausser beim Haaptsiège vu Gemeng

Um Niveau vun de Schoule si sech keng gréisser Changementer z'erwaarden. D'Bettenduerfer Buergermeeschtesch huet ënnerstrach, et wéilt een och an Zukunft no bei de Bierger a Biergerinnen bleiwen, mat Quartiersschoulen. Et géif kee Mënsch drun denken, all d'Kanner op eng Plaz ze bréngen, huet de Jan-Paul Schaaf vun Ettelbréck betount. Och d'Gemengeverwaltunge géife weider bestoe bleiwen, sou de Claude Haagen, och wann d'Fusiounsgemeng duerno wuel ee Siège misst kréien. Dee kéint nëmmen zentral sinn um Territoire zu Ierpeldeng, sou den LSAP-Poltiker.

Ausbau vun der Gare zu Ettelbréck bréngt Regioun virun

De gréisste Chantier zu Ettelbréck ass den Ëmbau vun der Gare, deen dem Jean-Paul Schaaf no d'Mobilitéit an der Regioun e gutt Stéck wäert virubréngen. Mat der Fusioun ginn déi Gemengeresponsabel och vun engem Populatiounswuesstem aus. An deem Kontext kéinte sech an  Zukunft och Veräinsinfrastruktur dezentraliséieren. Gelder bräicht een och fir de lokale Commerce als Gemeng mat stäerken ze kënnen.

Vertrieder aus all Gemeng sollen am zukünftege Schäfferot sinn

De Charme vun der Nordstad géif grad de Mix aus den zwou urbanen a dräi ländleche Gemengen ausmaachen, sou d'Bettenduerfer Buergermeeschtesch Pascale Hansen. Touristesch sollt ee gemeinsam Konzept ëm d'Sauer ausgeschafft ginn.

Eng Suerg vun de Bierger besonnesch aus de ländleche Gemenge war, datt d'Proximitéit an d'Identitéit vun den Uertschafte verluer geet, wann déi 5 Gemengen als eng fusionéieren. Déi Angscht wier awer onbegrënnt.

Am zukünftege Schäfferot wier op alle Fall ee Vertrieder vun alle Gemenge vertrueden, huet de Claude Haagen erkläert. Haut wier d'Liewensqualitéit an all Gemeng gutt. Duerfir géif se och duerno an enger fusionéierter Gemeng héich bleiwen.

D'Aarbechtsplazen op de Gemengen wier och ofgeséchert. Et géif souguer éischter an Zukunft nach méi Personal gebraucht.

Fusioun soll bis 2023 stoen

De viséierten Timing fir d'Fusioun bis 2023 stoen ze hunn, bleift den Ament d'Zil trotz Covid, sot d'Pascale Hansen. Et wier ee sech awer bewosst, datt een d'Bierger a Biergerinnen nach méi misst mat op de Wee huelen. Deenen géifen haut nach Informatioune feelen.

Wann eng Gemeng Nee seet, da géif et keng Nordstad ginn, do war de Claude Haagen kloer.

Background am Gespréich vum 3. Abrëll 2021

"Background am Gespréich" leeft ëmmer samschdes an der Mëttesstonn (vun 12 bis 13 Auer) op RTL Radio Lëtzebuerg an am Livestream um Internet respektiv an der App (Audio a Video). Dono ass d'Emissioun op RTL.LU an am RTL Play zu all Ament nach eemol ze lauschteren oder ze kucken - an der Rubrik "Radio" bei Emissiounen "Background" wielen.