Den Horesca-Generalsekretär, de Chef vu Concept and Partners an de Stater Hotelier waren e Samschdeg eis Invitéen am "Background am Gespréich".

Background am Gespréich vum 10. Abrëll 2021

25 bis 30 Prozent vun de Betriber am Horeca-Secteur hunn dës Woch hier Terrass opgemaach. Dee Chiffer huet de Generalsekretär vun der Horesca, de François Koepp an der Emissioun Background genannt, wou nieft him och de Marc Fusenig vum Grupp "Concept and Partners" an de Stater Hotelier Carlo Cravat invitéiert war.

Caféen a Restaurante wiere frou, datt se erëm dierfe schaffen, ënnersträicht de Marc Fusenig, och wann d'Auerzäiten, net déi sinn, déi ee sech gewëscht hat. Hien hat gehofft bis owes 21 oder 22 Auer kënnen op ze hunn,  d'Horesca hat gefuerdert, datt d'Betriber op d'mannst bis 20 Auer Clientë kéinten zerwéieren.

Fir d'Hotellerie an der Stad, déi an der Haaptsaach vu Business-Touriste lieft, ass d'Situatioun den Ament katastrophal, bedauert de Carlo Cravat. Elo wou och d'Leit aus den Nopeschlänner net dierfen op Lëtzebuerg kommen, hätt hie mat engem Taux d'occupation vu manner wéi 10 Prozent ze kämpfen.

D'Impfstrategie, hunn eis Invitéen ënnerstrach, wier extrem wichteg fir de Secteur. Schnelltester beim Personal a bei de Clientë wiere ganz kloer awer och eng Léisung, grad och fir den Evenementiel.

Eng kruzial Moossnam fir den Horeca-Secteur bleift de Chômage partiel. De Marc Fusenig sot d'Leit wiere schockéiert gewiescht, wéi op eemol driwwer rieds gaangen ass, datt dee soll op 50 Prozent reduzéiert ginn, nach ier d'Betriber iwwerhaapt erëm dierfen opmaachen.
Wann een op eng Kéier net méi dorop kéint zeréckgräifen an een awer net voll schaffe kann, da wier dat eng riseg Katastroph an och fir de Generalsekretär vun der Horesca ass kloer, datt déi Mesure esou muss bestoe bleiwen, esou laang et eng Fermeture administrative géif.

Méi wéi eemol gouf kritiséiert, datt d'Hëllefen net séier genuch ausbezuelt ginn, de Marc Fusenig seet hien hätt d'Erfarung gemaach, datt een d'Sue bannent engem akzeptabelen Zäitraum kritt, wann een en Dossier era gëtt, dee komplett ass.

De Carlo Cravat ass, am Prinzip, domadder averstanen, seet awer och, datt d'Gesetzer fir d'Hëllefen net séier genuch gestëmmt goufen, wann et ëm d'Fermeture gaange wier, wieren d'Politiker méi séier gewiescht.

Eng gewëssen Enttäuschung gëtt et dann och iwwert d'Roll, déi d'Banke gespillt hunn. De François Koepp sot, datt déi zum Deel ganz retizent waren, fir de Betriber an där schwéierer Zäit Suen ze léinen.

"Background am Gespréich" leeft ëmmer samschdes an der Mëttesstonn (vun 12 bis 13 Auer) op RTL Radio Lëtzebuerg an am Livestream um Internet respektiv an der App (Audio a Video). Dono ass d'Emissioun op RTL.LU an am RTL Play zu all Ament nach eemol ze lauschteren oder ze kucken - an der Rubrik "Radio" bei Emissiounen "Background" wielen.