Den Éierestaatsminister war e Samschdeg eisen Invité am "Background am Gespréich".

Background am Gespréich: Jean-Claude Juncker

Causa Engel: Jean-Claude Juncker gouf ni ëm Rot gefrot

Als "erwuesse Persoun mat post-pubertäre Reflexer", sou bezeechent de Jean-Claude Juncker d'Aart a Weis vun der CSV, wéi sech d'Partei an der Causa Engel verhalen huet. De fréiere Staatsminister war e Samschdeg Invité an eiser Emissioun "Background am Gespréich". D'Denonciatioun vum Ex-Parteipresident Engel beim Parquet wéinst engem Aarbechtskontrakt mat der CSV-Asbl "Frëndeskreees" huet den Éierestaatsminister rose gemaach. "Partei a Land si méi wichteg wéi esou Spillereien a mir hunn deen Tappage an dee Sträit net gebraucht", sou de Jean-Claude Juncker, deen an dëser Affär ni ëm Rot gefrot gi war. Och de Frank Engel hätt awer net alles richteg gemaach. Hie wier e Personnage, "dee sech selwer am Wee géif stoen".

Kee politesche Comeback

Wann hien ëm Support gefrot géif ginn, fir der Partei beim Renouveau ze hëllefen, wier hien disponibel; allemol bréicht d'nei Ekipp ëm de Claude Wiseler Häerz a Verstand, fir Politik ze maachen. Als Spëtzekandidat 2023 oder soss an der éischter Rei géif een de Jean-Claude Juncker net méi fir d'CSV erliewen, deen domat e politesche Comeback ausgeschloss huet.

D'CSV bezeechent de Jean-Claude Juncker nach ëmmer als Vollekspartei; net eng nostalgesch Betruechtung, mä eng Realitéit, déi sech op d'Sozialléier als Referenz soll baséieren. "Wale gewënnt een net am Schaukelstull", duerfir stéing der neier Ekipp Wiseler/Hansen/Galles vill Aarbecht bis 2023 an d'Haus, sou de fréieren CSV-Premier, deen d'Iddie vu méi Spëtzekandidate keng gutt Optioun fënnt. D'Partei misst sech mat hire Spëtzeleit och identifizéiere kënnen.

Problematik ëm de Logement bleift bestoen

Och wann d'Regierung villes an der Lutte géint d'Pandemie richteg gemaach hätt, sou wier de Logementsprobleem bei Wäitem nach ëmmer net geléist. Fir de fréiere Staatsminister misste sech d'Proprietären a Fro stellen an de Staat misst sech d'steierlech Moyene ginn, fir d'Offer u Wunnengen an d'Luucht ze kréien.

Wat d'Propositioun vum LSAP-Vizepremier Dan Kersch iwwert d'Aféiere vun enger selektiver Coronasteier fir d'Pandemie-Gewënner ugeet, sou sympathiséiert de Jean-Claude Juncker mat dëser Iddi; allemol wier se net "absurd". Datt et bannent de nächsten 10 Joer hei am Land zu enger Ierfschaftssteier an direkter Linn kënnt, schléisst den CSV-Politiker och net aus. Och d'CO2-Emissioune misste steierlech belaascht an also chiffréiert ginn.

Allgemeng gëtt de fréiere Staatsminister der DP-LSAP-Gréng-Koalitioun eng "bonne note", wat d'Coronamesuren an d'Meeschtere vun der Kris ugeet. D'Fro an eiser Emissioun "Background", ob d'Demande no der Demissioun vun der Familljeministesch Cahen net iwwerdriwwe gewiescht wier, huet de Jean-Claude Juncker esou beäntwert:

Jean-Claude Juncker iwwer Demissioun

Och op d'Polemik ëm Leit, déi sech bei der Covid-Vaccinatioun virgedréckt hunn, koum de Jean-Claude Juncker ze schwätzen a sot säin Onversteesdemech iwwer esou ee Behuelen.

Jean-Claude Juncker iwwer Impfdrängler

"Background am Gespréich" leeft ëmmer samschdes an der Mëttesstonn (vun 12 bis 13 Auer) op RTL Radio Lëtzebuerg an am Livestream um Internet respektiv an der App (Audio a Video). Dono ass d'Emissioun op RTL.LU an am RTL Play zu all Ament nach eemol ze lauschteren oder ze kucken - an der Rubrik "Radio" bei Emissiounen "Background" wielen.