D'Gesondheetsministesch war e Samschdeg eis Invitée an der Emissioun "Background am Gespréich".

"Et war en Hilfeschrei vum Kierper an deen hunn ech eescht geholl", esou d'Gesondheetsministesch Paulette Lenert. Dofir wier et immens wichteg gewiescht, dass si sech eng Paus geholl huet. Virun engem Mount hat d’LSAP-Politikerin e Malaise an huet sech doropshin 3 Wochen zréckgezunn an erholl. Et geréiert een eng Pandemie net zum Nulltariff, esou d'Paulette Lenert an eiser Emissioun Background am Gespréich. An der leschter Zäit hätt si awer däitlech de Réckhalt vun der Regierung gespuert.

Extrait Paulette Lenert (1)

impfen.lu: Gesondheetsministesch hat mam Succès vum Site gerechent

Zu den Aschreiwungen um Site impfen.lu, sot d'Gesondheetsministesch, dass si wuel mat deem Succès gerechent huet. Esou wéi et Leit ginn, déi éischter skeptesch sinn, ginn et awer och ganz vill Leit, déi sech wëllen impfe loossen an domadder hätt een elo d'Méiglechkeet, éischter drunzekomme wéi geplangt. Stand e Freideg hu sech 25.000 Leit tëscht 30 an 54 Joer ugemellt, fir fräiwëlleg mam AstraZeneca geimpft ze ginn. Si selwer huet sech och ugemellt. Wann een an där Altersgrupp an der Phase 6 „normal“ geruff gëtt, kritt ee keen Astra méi.

Extrait Paulette Lenert (2)

Elo hofft een, dass och genuch Impfstoff kënnt a sech de Pharmakonzern och un d'Liwwerunge fir déi nächst Wochen a Méint hält.

Impf-Niewewierkunge si ganz seelen

Ob ee mam Vaccin vun Johnson&Johnson op dee nämmlechten Wee geet, wéi mat AstraZeneca, well och do gouf et där rare Thrombosen am Gehier, gëtt den Ament gepréift, dat kéint een nach net soen, esou d'Gesondheetsministesch. De Conseil supérieur des maladies infectieuses schafft un engem Avis.

Si ënnersträicht, dass d'Niewewierkungen, déi bis ewell erhuewe goufen, ganz seelen optrieden. Eng Persoun, déi sech fir den AstraZeneca mellt, verléiert och zu kengem Ament hir Rechter, well dee Vaccin jo vun der EMA fir all Persounen zougelooss ass. D'Ministesch huet Versteesdemech fir d'Suerge vun de Leit an et wier och un der Regierung transparent opzeklären. Et kéint een awer keng Hierarchie tëscht den eenzele Vaccinen maachen.

Och wat déi 3 Doudesfäll no enger Impfung ugeet, misst ee präziséieren, dass nach kee Lien mam Vaccin konnt nogewise ginn. Bei den zwee eelere Männer, déi no enger Biontech-Impfung verscheet sinn, wier et éischter onwarscheinlech, datt e Lien besteet, steet am Rapport.

Bei enger Fra vu 74, déi Astra krut, gouf eng Autopsie gemaach. D’Resultater leien nach net vir. Mir hunn d'Optioun geholl, fir transparent ze spillen, mä do sollt een d'Donnéeën net verkierzt kucken an urteelen.

Personal am Gesondheetswiesen: Impfungen net duerch Zwang

D'Santéspersonal wier mëttlerweil midd, mä d'Motivatioun wier nach ëmmer do. D'Aarbechtskonditioune wieren hei am Land och besser wéi am Ausland an et hätt keng Kënnegungswell ginn, wéi dat zum Deel an anere Länner de Fall war.

D'Diskussioun ronderëm d'Alters- a Fleegeheemer wier eng ganz schwéier, esou d'Ministesch Paulette Lenert. Am Ufank vun der Pandemie sinn déi streng Mesuren hefteg kritiséiert ginn. Et wéilt een awer elo d'Situatioun réckbléckend beliichten, d'Clustere sollen elo analyséiert ginn.

Dass de Jeannot Waringo déi Charge soll iwwerhuelen, gouf vun den Deputéierten an der Chamberkommissioun proposéiert. An zwou Woche sollen d'Informatiounen zesummegedroen ginn, duerno gëtt zwee Méint laang d'Analyse gemaach.

Extrait Paulette Lenert (3)

Wat d'Impfunge beim Personal ugeet, misst een éischter op d'Sensibiliséierung wéi op en Zwang setzen, fënnt d'Paulette Lenert. Et befaasst ee sech mat enger eventueller Impfflicht, mä d'Ministesch huet sech perséinlech éischter dogéint ausgeschwat.

Aktuell Mesuren: Streng an aschneidend, ma awer kleng Deconfinementer méiglech

D’Corona-Infektiounszuele ginn erof, mä et si méi Leit op den Intensivstatiounen, méi jonk Leit an déi och méi laang musse behandelt ginn, dat sot d’Gesondheetsministesch Paulette Lenert am Background. D’Situatioun ass gutt a manner gutt.

Extrait Paulette Lenert (4)

Déi Covid-Mesurë gëllen den Ament jo bis Mëtt Mee. Hei gesäit d'Paulette Lenert, dass d'Akzeptanz trotz der Pandemie-Middegkeet nach grouss ass. Virun allem mat der Hëllef vu Schnelltester kéinten an 3 Woche kleng Ouverturë kommen. Wa mer d’Stabilitéit behalen, sou d’Ministesch. Da kéinten eng Rei Saache méiglech sinn. A klenge Schrëtt. Schnelltester kéinte gestes barrièren ersetzen, sou d’Ministesch.

Extrait Paulette Lenert (5)

An där Entwécklung wär ee mattsen dran. Wéi dat weider geet, misst ee kucken. De Long-Covid, also no enger Infektioun net méi richteg gesond ginn, wär och e grousse Sujet.

Extrait Paulette Lenert (6)

Op d’Ausgangsspär ugeschwat, huet d’Paulette Lenert geäntwert, datt déi en Deel vun eise Mesurë wär. Et wär eppes Schreckleches, huet d’Ministesch zouginn. Si géif sech och ëmmer schwéier doe mat der Virstellung. Ganz radikal, well se eréischt um 11 Auer owes ufänkt, wär se glécklecherweis ni gewiescht. Mä et sollt een déi Mesuren net kleng rieden. Jiddereen an der Regierung wär sech bewosst, datt et eng ganz aschneidend Mesure wär, huet d’LSAP-Politikerin ënnerstrach.

Cannabislegaliséierung a Co: Aner Projete kréien duerch Corona e Retard

Kuerz goufen an der Emissioun och aner Gesondheetssujeten ugeschwat. Ob de Cannabis fir de Fräizäitgebrauch nach an dëser Legislaturperiod autoriséiert gëtt, kéint si elo net soen. Et géif am Hannergrond dru geschafft ginn. Wéinst der Pandemie wär villes an de Verzuch komm. Forcement hätten eng Rei Projeten Retard. Wa mer aus der Pandemie eraus sinn, maache mer de Bilan, fir ze kucken wat nach méiglech ass, sou d’Paulette Lenert.

Background am Gespréich: Paulette Lenert

Deen nächste Background ass den 9. Mee mam neien CSV-Generalsekretär Christophe Hansen.

"Background am Gespréich" leeft ëmmer samschdes an der Mëttesstonn (vun 12 bis 13 Auer) op RTL Radio Lëtzebuerg an am Livestream um Internet respektiv an der App (Audio a Video). Dono ass d'Emissioun op RTL.LU an am RTL Play zu all Ament nach eemol ze lauschteren oder ze kucken - an der Rubrik "Radio" bei Emissiounen "Background" wielen.