De Finanzminister war e Samschdeg eisen Invité an der Emissioun "Background am Gespréich".

De Finanzminister Pierre Gramegna sot op RTL d'Pandemie wier nach net eriwwer. Et misst ee raisonablement virsiichteg bleiwen.

De Finanzminister huet e Samschdeg hei op RTL eng Steierreform virun 2023 definitiv ausgeschloss. Och wann ee mat enger Victoire géint de Covid am Hierscht kéint rechnen an och wa Lëtzebuerg besser duerch d'Kris kéint kommen ewéi gefaart, dierf een dem Pierre Gramegna no "net virun de Won sprangen". Als Finanzminister misst hien och "raisonablemet virsiichteg" sinn.

Ugeschwat op d'Situatioun vun den Elteren, déi eleng erzéien, de Jongesellen oder nach de Witfraen a Männer sot de liberale Minister: "D'Inegalitéiten an de Steiere schleefe mer zanter 30, 40, 50 Joer." De Pierre Gramenga huet awer un d'Steierreform vun 2017 erënnert, déi gerecht Erliichterunge bruecht hätt a bei där een elo erréischt géing d'Effete gesinn. Donieft gëtt et zanter där Reform schonn déi optional Individualiséierung. Dem Finanzminister no kéint een och net all d’Problemer mat de Steiere léisen an hien huet dowéinst op d’sozial Mesuren higewisen, déi déi lescht Joren decidéiert goufen oder nach d’Reindexéierung vum Kannergeld d’nächst Joer.

D'Steierreform ass also verluecht, fir no der Kris fuerdert d'LSAP beispillsweis eng Coronasteier op déi, déi vun der Kris profitéiert hunn. De Pierre Gramegna sot, hie kéint d'Raisonnement duerchaus novollzéien, mee d'Fro "vu wéi engem Gewënn u bezilt een X Steieren" géing weisen, ewéi schwiereg esou en Exercice wier. Donieft huet hien erkläert, datt déi Betriber, déi Gewënner gemaach hunn, schonn dorobber besteiert ginn. Verléierer bezuelen iwwerdeems keng Steieren. D'Steiere wieren och "net do, fir ze bestrofen", mee fir "fair" ze sinn. Do wier an der digitaler Ekonomie nach nozebesseren. A wann d'USA do géingen d'Lat héich setzen, da géing een "nozéien". D'Haaptsaach wier, datt Lëtzebuerg "raisonablement attraktiv" bleift.

Wat d'Betribsbesteierung ugeet, bräicht een elo "Rou". De Finanzminister huet Steierhaussen an Erliichterungen awer fir déi nächst Joren ausgeschloss. Lëtzebuerg hätt am Verglach mam Ausland zwar kee "Schlaraffellandtaux", mee den Taux wier scho vun der leschter Blo-Rout-Grénger Regierung reegelméisseg erofgesat vun 21 op elo 17% (15% fir Kleng- a Mëttelbetriber). Well d'Gewerbesteier vun de Gemengen dobäikënnt, wier den Taux bei ronn 25%. Do wier een an der Moyenne.

Beweegung gëtt et awer dann am Dossier "Grondsteierreform", déi zesumme mam Inneministère ausgeschafft gëtt. De Pierre Gramegna huet confirméiert, datt een elo all d'Donnéeën a Material hätt, mee déi 3 Regierungsparteie misste sech nach iwwert den Taux eens ginn. Dat eenzegt, wat sécher ass, ass, datt den Haaptsëtz, wou ee wunnt, "préférentiell traitéiert" gëtt.

Background am Gespréich mam Pierre Gramegna

"Background am Gespréich" leeft ëmmer samschdes an der Mëttesstonn (vun 12 bis 13 Auer) op RTL Radio Lëtzebuerg an am Livestream um Internet respektiv an der App (Audio a Video). Dono ass d'Emissioun op RTL.LU an am RTL Play zu all Ament nach eemol ze lauschteren oder ze kucken - an der Rubrik "Radio" bei Emissiounen "Background" wielen.