An der Emissioun "Background" waren de Samschdeg d'Josée Lorsché, de Georges Engel, de Gilles Roth an de Gilles Baum invitéiert.

D'Reform vun der Grondsteier dierft an dëser Legislatur kommen, sot den LSAP-Fraktiounschef Georges Engel am Background am Gespréich.

D'Fraktiounscheffe vun de 4 gréisste Parteien an der Chamber waren d'Invitéen.

Steieren eleng géifen de Logementsproblem net léisen. Eng Spekulatiounssteier gëtt vun DP, LSAP, déi Gréng a vun der CSV ënnerstëtzt. Eng Taxe op eidelen Haiser, Wunnengen oder Terraine wär eng Méiglechkeet.

De Gilles Roth CSV huet bedauert, datt den Tatendrang vun der Regierung um Wunnengsmaart verpufft ass. Si wär nëmmen hallefhäerzeg de Logementsproblem ugaangen. D'CSV ass fir aktiv Agrëff, och wann dat net ëmmer attraktiv bei de Leit wär.

Déi véier Invitéen ware sech och eens driwwer, datt d'Steier mat där een en Deel vu sengem Kafpräis vun enger Wunneng ofsetze kann déi ee verlount, de sougenannten "amortissement accéléré", weider zeréckgeschrauft soll ginn. De Steierkaddo war 2002 vun der CSV-DP-Regierung agefouert ginn, an der Hoffnung méi Wunnengen ze mobiliséieren. Haut awer géif d'Allgemengheet dozou bäidroen, datt Investisseure sech opgrond vun der Spekulatioun beräichere kënnen. Duerfir misst een haut hei ëmdenken, sot den CSV-Fraktiounschef Gilles Roth. Hie kéint sech perséinlech virstellen, datt de Montant, deen ee vun de Steieren ofsetze kann, gedeckelt ka ginn. Leit, déi een Appartement fir ze verloune kafen, solle weider vum „amortissement accéléré“ profitéiere kënnen, huet de liberale Gilles Baum gemengt.  Steierlech Kaddoen, wann een x Appartementer huet, hätte mat sozialer Gerechtegkeet a Léisungen um Wunnengsmaart awer wéineg ze dinn.

D'LSAP wier souguer bereet den "amortissement accéléré" ganz ofzeschafen. Déi Gréng hu sech, anescht wéi hir Jugendpartei, am Background net kloer positionéiert. D’Josée Lorsché huet just insistéiert, den Haaptproblem wiere manner Steieren a méi de Manktem un abordabele Wunnengen an ëffentlecher Hand.

D'Personalpolitik speziell vun der LSAP war och en Thema am Background, dat no den Annoncë vun de Ministeren Dan Kersch a Romain Schneider, datt se net méi fir eng nächst Regierung zur Verfügung stinn. Vläicht souguer nach am Laf vun dëser Legislatur als Minister ophalen. Detailer dozou wollt oder konnt den LSAP-Fraktiounschef Georges Engel net ginn. Nach wär näischt decidéiert.

De Problem vum „lame duck“ gesinn d‘Fraktiounscheffe vun de 4 gréisste Parteien an der Chamber net. D'Aarbecht misst egal wéi gemaach ginn.

Déi sektoriell Ziler, wou wéi vill CO2-Emissioune bis 2030 agespuert solle ginn, hu lo op sech waarde gelooss, mä lo si se do, sot déi gréng Fraktiounscheffin Josée Lorsché. Gekoppelt u konkret Mesurë wéi se erreecht sollt ginn an déi mussen elo zesumme mat de Leit, de Gemengen an der Wirtschaft ëmgesat ginn. Den CSV-Cofraktiounschef Gilles Roth huet betount, wéi wichteg et wier, d'Betriber duerch steierlech Entlaaschtungen oder administrativ Vereinfachungen ze motivéieren an d'Leit, déi drop ugewise sinn, mat soziale Kompensatiounen z'entlaaschten. Generell wier d'CSV ganz mat, fir méi fir de Klima ze maachen. De Klimaschutz géif och zur DNA vun enger grousser Vollekspartei gehéieren. Fir den DP-Fraktiounschef Gilles Baum kann de Klimawiessel nëmmen duerch e globalen Effort opgehale ginn. Dat géif awer net heeschen, datt hei am Land näischt geschitt wier, notamment an der Mobilitéit hätt déi heite Majoritéit vill investéiert. Iwwerdeems huet de Georges Engel fir d'LSAP betount, datt d'EU grousse Länner wéi China a Russland awer och misst weisen, wat mir bei eis fäerdeg bréngen. Wann net iergendwou ugefaange gëtt, géif et "d'Baach ragoen". Mat der energetescher Transitioun géife sech och Chancen opdoen. Et sollt een d'Leit duerfir mat positiven Ureizer motivéieren wéi se ze bestrofen.

Background am Gespréich vum 25. September 2021

"Background am Gespréich" leeft ëmmer samschdes an der Mëttesstonn (vun 12 bis 13 Auer) op RTL Radio Lëtzebuerg an am Livestream um Internet respektiv an der App (Audio a Video). Dono ass d'Emissioun op RTL.LU an am RTL Play zu all Ament nach eemol ze lauschteren oder ze kucken - an der Rubrik "Radio" bei Emissiounen "Background" wielen.