An der Emissioun "Background" waren dowéinst e Samschdeg d'Nora Back, de Patrick Dury an de Michel Reckinger invitéiert.

Background am Gespréich vum 2. Oktober 2021

"Mir hätte gär d'Leit geimpft", dat huet de Michel Reckinger, de President vun der UEL am Background am Gespréich ënnerstrach. Zesumme mat de Gewerkschaftspresidenten Nora Back a Patrick Dury goung et ënnert anerem ëm d'Impfen an de Betriber an déi méi normal Situatioun, déi d'Patronat fuerdert. Dat heescht schaffen ouni Mask an ouni Distanz. De CovidCheck an de Betriber kann eng Méiglechkeet vu ville sinn, seet de Michel Reckinger.

"Mir hu Secteuren, déi ganz verschidde sinn. E Coiffer an eng Estheticienne wäert sécherlech de Mask halen, well de Client dat gär hätt. Do ass een no beim Gesiicht. Déi wäerte beim Mask bleiwen. Den Horesca-Beräich, dee fiert ganz gutt mat de Schnelltester an da ginn et Beräicher, wou ee mam CovidCheck ka fueren. Mir hänken déi ganz Diskussioun gären op un der Sécurité et santé au travail. Dat heescht, de Patron ass responsabel fir d'Sécherheet vu senge Mataarbechter, en ass responsabel fir d'Sécherheet vu senge Clienten an de Fournisseuren. Zesumme mat der Delegatioun soll festgeluecht ginn, fir eng Situatioun, déi déi bescht fir de Betrib ass."

Deene Leit, déi geimpft sinn, muss een erëm eng normal Situatioun kënnen erlaben, fënnt de President vum Daachverband vun de Betriber. D'Nora Back, d'Presidentin vum OGBL sot, et wier een am Ufank net begeeschtert gewiescht iwwert d'Diskussioun vum CovidCheck an de Betriber, et wier een nämlech net an déi Diskussioune matabezu ginn:

"Mir hu just gesot kritt, d'Regierung soll mat de Betriber kucken, dass déi fräiwëlleg Betriber kënnen de CovidCheck maachen an déi aner net. Mir, d'Salariat, all déi Leit, déi schaffen an hir Vertriedungen an de Gewerkschaften, gi guer net an d'Gespréicher matabezunn. Dat war eppes, wou mir direkt gesot hunn, esou geet et net an dofir hu mer kritesch reagéiert. Mir waren net begeeschtert, net, well mir géint d'Impfung sinn, dat ass deen éischte Wee aus der Pandemie eraus a mir ënnerstëtzen och d'Impfcampagnen, mä mir sinn awer géint d'Impfflicht. Net, well mer géint de Wee zeréck an d'Normalitéit sinn, mir freeën eis dorop, mä d'Fro stellt sech awer, ob de CovidCheck de richtege Wee ass, well en awer och an de Betriber eng falsch Sécherheet gëtt."

D'Presidentin vum OGBL zielt eng ganz Rei Froen op, déi nach ze kläre sinn. Zum Beispill, wien déi Tester bezilt, déi déi Leit misste maachen, déi net geimpft sinn, ob se an der Aarbechtszäit gemaach ginn, a wéi ee ka verhënneren, datt de Patron gewuer gëtt, ob eng Persoun geimpft oder getest ass. Och de Patrick Dury, de President vum LCGB, huet ënnerstrach, datt d'Impfung deen eenzege Wee aus der Kris ass, stellt awer d'Informatiounscampagne vun der Regierung a Fro.

"Mir haten am November/Dezember eng Reunioun mat der Regierung, wou driwwer geschwat gouf, fir eng Informatiounscampagne ze starten. Do stellt sech haut d'Fro, ob dat, wat do gemaach gouf, duergaangen ass. Eis ass gesot ginn, et wéilt een eng grouss Campagne maachen, ech stelle fest, datt dat sech op eng Rei vu Pressekonferenze limitéiert huet, ob eng Rei vun Envoien a verschiddene Sprooche vläicht hätte misste méi e breeden Debat gefouert ginn, fir d'Leit matzehuelen. Wann ee keng Impfobligatioun wëll, da muss een op d'Fräiwëllegkeet setzen an et muss een d'Leit iwwerzeegt kréien."

Dem Patrick Dury vum LCGB no misst een elo Loft aus dem Dossier huelen. Hien huet sech staark gemaach fir eng effikass Impfcampagne, bei där d'Leit richteg iwwer d'Virdeeler vum Vaccin informéiert ginn. Dat wär d'Aufgab vun der Regierung an déi hätt se senger Meenung no bis elo net erfëllt.

Fir d'UEL sinn Impfbussen an den Instrustriezonen hei eng Méiglechkeet. Wann d'Leit sech dann nach ëmmer net wëllen impfe loossen, missten d'Patronen un déi allgemeng Sécherheet denken, sou de Michel Reckinger:

"Wann ech responsabel fir d'Sécherheet vu menge Leit sinn an ech hunn een, deen ech muss zum Beispill an en Altersheem schécken an dat ass en Impfgéigner, da schécken ech deen net an den Altersheem. Do muss een dann e Choix treffen. Da sinn ech bei der Sécurité et santé au travail, de Choix ass dann och ganz kloer. Wann ee säin Helm net wëll undoen, well een ze blöd, ass fir säin Helm unzedoen, da muss ech deen och sanktionéieren."

Fir d'Gewerkschaften ass de Wee vun der Sanktioun dee falschen. Salariéen also vun enger Impfung iwwerzeegen, awer keng Impfpflicht, dat ass d'Zil. "Mä dat läit an der Hand vun der Regierung, déi dat doe muss preparéieren. Mir kënnen do matbegleeden, mä deen do um Hiewel sëtzt, ass d'Regierung. Déi muss dofir suergen, dass d' Leit anstänneg opgekläert ginn. D'Fro stellt sech fir mech: Ass hei alles geschitt? Ass dat richteg ugepaakt ginn? Ech mengen, dass sech do Froen stellen, wann ech d'Situatioun vun der Gesellschaft, an där mir haut liewen, kucken", sou de Patrick Dury.

Allgemeng wënschen d'Gewerkschafte sech also eng besser Informatiounscampagne vun der Regierung. Wat d'Impfung ugeet, si Patronat a Gewerkschafte sech eens: se ass e Wee aus der Kris. Well eleng de sanitäre Pass mat sengen 3G géif nach Gefore mat sech bréngen, wéi d'Nora Back ze bedenke ginn huet. Fir de Michel Reckinger ass et kloer: wann den Impftaux vu 85 Prozent hei am Land erreecht ass, da kann een - wéi an Dänemark - alles an de Betriber ophiewen an nees normal fonctionéieren. D'UEL fuerdert dann awer och, dass d'Personal nees méi op de Büro kënnt a manner am Homeoffice bleift.

"Background am Gespréich" leeft ëmmer samschdes an der Mëttesstonn (vun 12 bis 13 Auer) op RTL Radio Lëtzebuerg an am Livestream um Internet respektiv an der App (Audio a Video). Dono ass d'Emissioun op RTL.LU an am RTL Play zu all Ament nach eemol ze lauschteren oder ze kucken - an der Rubrik "Radio" bei Emissiounen "Background" wielen.