Invitéen e Samschdeg waren d'Lëtzebuerger Justizministesch, den Ombudsman fir Kanner a Jugendlecher an de President vum Jugendrot.

Background am Gespréich vum 20. November 2021

Eng gewësse Fräiheet feelt, et spiert een Drock an eng Zukunftsangscht. Et mécht ee sech Suergen, déi ee sech als Jonken net sollt maachen. Dat hätt sech mat Corona verstäerkt, sot de Mathis Godefroid, de President vum Jugendrot e Samschdeg de Mëtteg am Background.

D’Kannerrechter an déi Jonk stoungen e Samschdeg um internationalen Dag vun de Kannerrechter am Mëttelpunkt vun der Emissioun.

Déi Jonk waren immens solidaresch an hu Villes a Kaf geholl, fir datt de Virus sech net ze séier verbreet, huet den Ombudsman fir Kanner a Jugendlecher Charel Schmit betount. Lo wieren déi Erwuesse gefuerdert, fir solidaresch ze ginn. Déi Jonk missten zum Beispill besser gehollef kréie bei mentale Problemer. D’Psychotherapie gëtt zum Beispill nach ëmmer net rembourséiert, dat wier absolut net ze verstoen.

Den Drock an der Schoul wär och héich a vill Jonker hätte grouss Zukunftsängscht. Dat wier virdru scho sou gewiescht, mä d'Pandemie hätt dat nach verstäerkt, sot de Mathis Godefroid.

D’Justizministesch Sam Tanson bedauert, datt Corona déi Jonk belaascht. Dat dierft een net kleng rieden an zesummen als Gesellschaft misst een do dogéint ugoen. Als Regierung hätt ee säi Bescht gemaach, fir d’Contrainte sou kleng wéi méiglech ze halen an d’Schoule laang opzehalen.

Wat d’Impfen ugeet, dierften déi Jonk net ënner Drock gesat ginn, huet et e Samschdeg de Mëtteg an der Emissioun geheescht. D’Solutioun, fir aus der Kris eraus, kéint net bei deene Jonke leien. De President vum Jugendrot huet iwwerdeems bedauert, datt Schnelltester op der Plaz net méi méiglech sinn. Déi sollten nees agefouert ginn, et wär ee gutt domadder gewuer.

E weidert Thema war Gewalt géint déi Jonk. Erwuessener, déi sech u Jonke vergräifen, dat géif einfach net goen. Et misst och ëmmer denoncéiert ginn, et sollt ee keng Angscht hunn. D'Invitéeë ware sech eens, datt Belästegunge vun Autoritéitspersoune géintiwwer Kanner a Jonken nach ëmmer mat engem gewëssenen Tabu behaft sinn.

Den Ombudsman fir Kanner a Jugendlecher Charel Schmit plädéiert fir e sougenannten "child protection officer" an all Schoul ze schafen, un dee sech Betraffener riichte kéinten. Et misst och allgemeng méi sensibiliséiert ginn. De President vum Jugendrot huet an deem Kontext bedauert, datt Jonker dacks kee Vertrauen hunn an dowéinst och zécken, sech engem mat hirem Leed unzevertrauen.

Justizministesch fir d’Ofschafe vu Verjärungsfrist bei schlëmme Fäll vu sexuellem Mëssbrauch

D’Verjärungsfrist vun 10 Joer bei Sexualstrofdote wäert konsequent an d’Luucht gesat ginn, huet d’Justizministesch op en Neits verséchert. Aktuell sinn et hei am Land 10 Joer, wou een Zäit huet. Bei Mannerjärege fänkt dat mat 18 Joer.

Natierlech wär et net einfach no sou ville Jore Beweiser ze sichen, mä et bräicht een awer deels och Zäit, fir sexualiséiert Iwwergrëff ze verschaffen. Perséinlech kéint d’Sam Tanson sech souguer virstellen, datt et bei ganz grave Fäll wéi Vergewaltegung d'Verjärungsfrist ofgeschaaft gëtt.

Gewalt a Mobbing gëtt et och am Internet. Suchtverhale wär an der Pandemie méi grouss ginn, huet de President vum Jugendrot Mathis Godefroid confirméiert.

Zwee Mannerjäreger den Ament am Erwuesseneprisong zu Schraasseg

Zanter September sinn am Prisong zu Schraasseg och nees zwee Mineuren. Si goufen an enger Géigenexpertise als mannerjäreg agestuuft an do wier et net ze verstoen, datt se net an d'Unisec op Dräibuer komm sinn, sot den Ombudsman fir Kanner a Jugendlecher Charel Schmit. Besonnesch wou do op den 1. Oktober just 5 Leit waren, also Plaze fräi wieren. Fir de Charel Schmit ass et e Skandal, datt Lëtzebuerg nach ëmmer Mineuren an den Erwuesseneprisong setzt. Virun allem, wann ee sech anengems géif "de schéine Männche maachen a Saache Mënscherechter."

D’Justizministesch Sam Tanson huet geäntwert, si wéilt déi Decisioun vum Geriicht net kommentéieren. Perséinlech wier si allerdéngs strikt dogéint, datt e Mannerjäregen an en Erwuesseneprisong kënnt. Déi aktuell Gesetzgebung géif et de Geriichter awer nach erlaben, sou Urteeler ze huelen. Duerfir wier et sou wichteg, datt déi nei Texter beim Jugendschutz a Jugendstrofrecht ëmgesat ginn.

"Background am Gespréich" leeft ëmmer samschdes an der Mëttesstonn (vun 12 bis 13 Auer) op RTL Radio Lëtzebuerg an am Livestream um Internet respektiv an der App (Audio a Video). Dono ass d'Emissioun op RTL.LU an um RTL Play zu all Ament nach eemol ze lauschteren oder ze kucken - an der Rubrik "Radio" bei Emissiounen "Background" wielen.