An der Emissioun "Background am Gespréich" waren eng Historikerin, de Chef vun der Lëtzebuerger Arméi an de fréiere Premier eis Invitéen.

Mir ware generell naiv, seet de fréiere Premier an EU-Kommissiounspresident Jean-Claude Juncker. Ma och de Westen hätt Feeler gemaach. Allerdéngs bräicht ee just een "Idiot", fir e Krich unzefänken, mä 50 Genien fir e Konflikt nees ze deeskaléieren. De Jean-Claude Juncker war ee vun 3 Invitéen an der Emissioun Background. Mir hunn all geduecht, de Putin géif d'Ukrain net esou attackéieren wéi en et gemaach huet, sou de fréiere Premier.

Grad wéi de Jean-Claude Juncker seet och de Chef vun der Lëtzebuerger Arméi, de Generol Steve Thull, datt mir eis aktuell keng Suerge wéinst enger Attack op den NATO-Raum misste maachen. Vun enger atomarer Eskalatioun bräicht een och net auszegoen, soen de Politiker an de Generol. De Steve Thull rechent dermat, datt et dem Putin drëms geet, d'Ukrain komplett z’annektéieren. Hien ass perséinlech der Meenung, datt déi russesch Arméi falsch Aschätzunge gemaach huet. D'Ukrainer wären op der Héicht a wéilte kämpfen, sou de Chef vun der Lëtzebuerger Arméi. D’Russe wieren zwar méi staark. Deemno wär et dem Steve Thull no besser gewiescht, der Ukrain méi fréi militärescht Equipement ze liwweren. Am Prinzip wär hien awer géint militäresch Oprëschtung.

D'NATO intervenéiert net direkt an dësem Konflikt. Si rëscht awer op. Baltesch Staaten, Polen a Rumänien an aner Länner hunn Angscht, gëtt de Generol ze bedenken.

D'NATO muss weisen, datt se bereet ass, sech ze verdeedegen, dat betount och de fréiere Premier. "Mir kommen an eng Spiral vun Oprëschtung an dat ass net dat, wat eise Kontinent brauch", bedauert hien awer. Ofrüstungsgespréicher wären elo méi wichteg. Et kann dem russesche President säin Dram sinn, d'Sowjetunioun nees opzebauen, mengt de Jean-Claude Juncker. De Putin hätt him an der Zäit selwer gesot, datt den Zerfall vun der USSR fir hien en Drama war. Hien huet mech maaslos enttäuscht, sou de Juncker. "Et ass net dee Putin, deen ech virun iwwer 20 Joer kenne geléiert hunn."

D’Historikerin Inna Ganschow, déi an der Sowjetunioun gebuer ass, elo hei am Land lieft an op der Uni schafft, huet erkläert, datt vill Leit a Russland net wéissten, datt Krich wär. Mediekonsum decidéiert iwwer Meenung. Alternativ Medie wären ofgeschalt ginn. Déi russesch Gesellschaft wär och passiv ginn a géif sech fir d’Konflikter net méi wierklech interesséieren. An an der russescher Sprooch géif een den Ament de Krich net "Krich" nennen, mä just eng "Militäroperatioun". Aktuell riskéiert een, wann ee vun engem "Krich" schwätzt och bis zu 15 Joer Prisong a Russland. Eng klassesch Oppositioun, wéi mir se hei kennen, wär schwiereg. Wann ee protestéiert, gëtt ee verhaft. An awer sollt een de Widderstand an der russescher Populatioun net ënnerschätzen.

Wat d’Russen hei am Land ugeet, sot d’Fuerscherin, datt si keng eenheetlech Communautéit wären. Et wären am Endeffekt "russeschsproocheg" Mënschen, déi aus verschiddene Géigenden aus der fréierer Sowjetunioun kommen, och aus der Ukrain. De Boykott vu russesche Sportler, Kënschtler, Wëssenschaftler oder datt Filmer aus engem Programm gestrach ginn, gesäit d’Inna Ganschow kritesch. Et misst een am Dialog bleiwen, fir een deen aneren ze héieren.

Background vum 5. Mäerz 2022

"Background am Gespréich" leeft ëmmer samschdes an der Mëttesstonn (vun 12 bis 13 Auer) op RTL Radio Lëtzebuerg an am Livestream um Internet respektiv an der App (Audio a Video). Dono ass d'Emissioun op RTL.LU an um RTL Play zu all Ament nach eemol ze lauschteren oder ze kucken - an der Rubrik "Radio" bei Emissiounen "Background" wielen.