E Samschdeg war d'Familljeministesch eis Invitée an der Emissioun Background am Gespréich um Radio.

D'Corinne Cahen kandidéiert um DP-Kongress am Juni net fir en drëtt Mandat vun der Partei-Presidentin. Dat huet d'Familljeministesch an DP-Presidentin an eiser Emissioun Background am Gespréich um Samschdeg ugekënnegt. Zwee Mandater géingen hir duergoen. Et wier elo un der Zäit fir nei Dynamik a frësche Wand, virun allem virum Super-Waljoer 2023 an nodeem d'DP 3 Wale gewonnen hätt.

Extrait Corinne Cahen - Parteipresident

Och fir de Posten vun der Familljeministesch steet d'Corinne Cahen net méi zur Dispositioun, wann d'DP nach emol d'Regierung géif stellen. En anere Regierungsressort huet d'liberal Politikerin net ausgeschloss.

Extrait Corinne Cahen - Familljeministère

Och fir d'Gemengewalen an der Stad an d'eventuell Successioun vun der Buergermeeschtesch Lydie Polfer huet d'Corinne Cahen sech interesséiert gewisen. Allemol géifen Si d'kommunalpolitesch Dossieren als "Stater Meedchen" interesséieren an um Häerz leien.

Extrait Corinne Cahen - Kandidat Stad

Covid-Clusteren an Alters- a Fleegeheemer

An hirer Funktioun als Familljeministesch sot d'Corinne Cahen, datt et aktuell am Land eng hallef Dose Covid-Clusteren an Alters- a Fleegeheemer gëtt, wou et aktuell eng ronn 200 eeler Covid-Positiver ginn.

Ausser Erkältungssymptomer géing et de Pensionnairen awer gutt goen a se wieren net vill krank. Ob a wéi genee d'Residenten isoléiert ginn, wier vu Fall zu Fall ofhängeg. Stierffäll géing et der net méi vill ginn, esou déi zoustänneg Ministesch.

Den Impf-Taux beim Personal wier allemol aktuell net gewosst.

Dossier ORPEA

D'Plainte, déi de franséische Staat géint de private Gestionnaire vun Altersheemer ORPEA gemaacht huet, kann d'Corinne Cahen gutt verstoen. D'Mëssstänn bannent deenen Haiser wiere grave gewiescht. Als Ministesch kéint si sech et awer net eraussichen, wéi ee Prestataire op Lëtzebuerg kënnt. Et wier awer gesetzlech garantéiert, dass den eelere Leit an de CIPAen déi beschtméiglechst Qualitéit gebuede gëtt.

E Gesetzesprojet iwwert d'Qualitéitsstandarden an de CIPAe läit aktuell beim Staatsrot. Den Agrement fir de Prestataire ORPEA gëtt aktuell gepréift. Geplangt ass eng Struktur zu Märel.

Extrait Corinne Cahen - ORPEA

Tripartite

Iwwert d'Tripartite sot d'Ministesch, dass de Kafkraaftverloscht vun de Stéit duerch d'viséiert Mesurë soll kompenséiert ginn. Do wiere sech och all d'Partner eens. Et wier och am Interêt vu jidderengem, fir manner ofhängeg vun de fossillen Energien ze ginn.

D'Corinne Cahen ka sech dann och schlecht virstellen, datt den nächsten Donneschdeg d'Gewerkschaften de Kompromëss net méi géife matdroen.

Wann et ëm de Kafkraaftverloscht geet, schwätzt Een awer och ëmmer nees iwwert déi héich Logementspräisser.

"Dee Beräich frësst ville Leit e groussen Deel vun der Pai", esou d'Corinne Cahen, déi d'aktuell Situatioun "choquant" fënnt. Keen Tabu-Thema ass allemol fir d'DP, datt eng Spekulatiounssteier agefouert gëtt. Et misst massiv a méi kleng gebaut ginn.

D'Thema Logement wäert dann och sécher am Waljoer 2023 eng grouss Roll spillen.

Extrait Corinne Cahen - Tripartite

Xavier Bettel

D'Corinne Cahen hofft, dass den Premier Bettel weider op sengem Poste bleift - dat wier och e Walzil. Hien hätt d'Land moderniséiert a géing national wéi international d'Leit zesummebréngen a Brécke bauen.

D'Affären ëm de Plagiat vum Xavier Bettel senger Unis-Aarbecht, grad wéi d'Mobbing-Accusatioune géint d'EU-Deputéiert Monica Semedo huet d'DP ad acta geluecht.

Absolut ze "bedaueren" wier der Corinne Cahen no, datt den Ex-Finanzminister Gramegna säi Posten opginn huet - et hätt ee vill probéiert hien z'iwwerzeegen ze bleiwen, mä dat wier net gelongen.

Background am Gespréich: Corinne Cahen

"Background am Gespréich" leeft ëmmer samschdes an der Mëttesstonn (vun 12 bis 13 Auer) op RTL Radio Lëtzebuerg an am Livestream um Internet respektiv an der App (Audio a Video). Dono ass d'Emissioun op RTL.LU an um RTL Play zu all Ament nach eemol ze lauschteren oder ze kucken - an der Rubrik "Radio" bei Emissiounen "Background" wielen.